Salsila siga Rasul 28

Ga si Pol ndooy ni nusa Malta

1Salamat jaꞌ siꞌ kami ndooy ni tapiyan, lay na kami kabaan awon nusa looy yana Malta. 2Kahapan jama lahat looy tud bay mahap meꞌ da ka kami. Lay gi kami pakalluman da api man kami nohoꞌ mapasuꞌ-pasuꞌ baran kami batan uwan lahat boꞌ tanne lagi.

3Na si Pol siꞌ tu, lay ya nappuk engas kayu-kayu man ngalambunan api looy siꞌ. Sasang na ngalambun, ilooy ma pōꞌ na sō man jawom tappukan looy kahawān meꞌ pasuꞌ api. Boꞌ lay gi tinduk na tangan si Pol sampay lay na ga ngagot. Boꞌ ilooy na silay sō makapatoy ni kabasag latsun na. 4Pag takita leꞌ jama lahat looy patonton na sō looy ni tangan si Pol, yuk dangan pa dangan, “Batiꞌ ta la, lalla naa pamomonoꞌ. San ya bay kapuwas man bahaya ni dilawut, pag batnaa basta yaꞌ na baw tu tatangkis na kisas ni jataꞌ na.”

5-6Sugaꞌ si Pol baw siꞌ tu lay jaꞌ pesekan na sō looy pa jawom api. Na ga jama ndooy baw siꞌ tu, kanna da song bahaꞌ na tangan na bong saꞌ matoy du ya sarunduun. Sugaꞌ hallom na siꞌ intoy-intoyan da, yaꞌ du san ya bay kongoy-kongoy. Dari siꞌ, halin na baw bandingan da sampay yuk da, “Lalla naa bina disu tuhan!”

7Na ni nusa looy siꞌ, panghuluꞌ da yana si Publiyus. Tanaꞌ na tapit pa tapiyan. Dari lay na kami boo na pa lumaꞌ na. Ndooy siꞌ, lay kami hinulmat paayad njawom tallu ngallaw. 8Ni waktu looy siꞌ, kuwan mmaꞌ si Publiyus lammunan boꞌ sungiꞌ-sungiꞌ lagi. Pabāk na jaꞌ ya taꞌ patulihan na. Dari lay doꞌ si Pol pa mman na makuhan iya duwaa sambayan na nappak bumbunan na sampay lay du magti kaulian. 9Sabap meꞌ looy, bahuklud na pilay sagannap jama nusa looy ma sakihan nohoꞌ inulian ni si Pol. Boꞌ lai du kaulian sikamimon.

10-11Na kami siꞌ tu bay pahantiꞌ ndooy ni nusa Malta luu ga tallum buwan batan noy paddus na timpu landos boꞌ luu adjung patuwak mandooy. Sasang kami ndooy, kajinisan na meꞌ jama nusa looy bay ngahulmat man da maehe kami. Sampay pag taabut kami patuwak, lay gi kami pinalutuan mimon barang ma gunahan ningkami. Dari siꞌ, lay na kami patuwak taꞌ adjung bay lakka man Aleksandriya ma ndang luu na ndooy ni nusa Malta halloman timpu landos. Ni mundaꞌ adjung looy siꞌ, lay llukisan limbagan duwa tuhan-tuhan inawnan “Siga Tuhan Kamba.”

Palomehan ga si Pol man Malta song pa Rom

12Na ni bay katuwak kami siꞌ man Malta, lay gi kami pahās ndooy ni daira Sirakus njawom tallu ngallaw. 13Lakka mandooy, lay na baw kami ngalē luꞌ pilay pa daira Regiyum. Pag meꞌ sumawung, niyup na baw baliyu man sātan, boꞌ ayad man patūd. Dari lay na kami pawus sampay lay na kami nakka daira Putole njawom duwa ngallaw. 14Ndooy siꞌ, lay kami sitammu ka kasohean danganakan kami sukuꞌ si Isa, boꞌ lay gi kami kinaddoꞌ meꞌ da nohoꞌ pahantiꞌ ni lumaꞌ da. Paddus sakayi pituꞌ halloman kami bay ndooy, lay na kami pawus pilay pa Rom man taꞌ dile.

15Na taaka jaꞌ siꞌ meꞌ siga danganakan kami sukuꞌ si Isa ndooy ni Rom luu na kami song pilay, tā lagi, luu na sila pōꞌ nampang. Kasohean nampang kami ni disu kawum inawnan Tabuꞌ Apiyus, kasohean ni kawum inawnan Tallu Kadday. Takita jaꞌ siꞌ sila meꞌ si Pol, magti ya muwan pagsukuhan pa Tuhan sampay kagamgaman na ya.

Katakka ga si Pol pa Rom

16Na takka jaꞌ siꞌ kami pa Rom, lay baw pinadari si Pol maglumaꞌ di-dī na. Sugaꞌ luu na pin baw disu sundalu nohoꞌ nganjagahan iya.

17Paddus jaꞌ siꞌ tallu ngallaw halloman si Pol ndooy, lay tawag na ga pa-mmean Yahudi ma maglahat ni Rom. Kumpo jaꞌ siꞌ sila, yuk na ninsila, “Siga mbuwaꞌ danganakan, kon ku itu bay tapilisu meꞌ parinta bangsa Rom batan lay ku pinalkalaꞌ meꞌ siga pagkahi tabi Yahudi ndooy ni Jerusalem. Mingkan ilay siꞌ, yaꞌ ku bay buwat dusa ninsila. Boꞌ na, yaꞌ du situ luu arat kabboꞌ-bboan tabi bay langga ku. 18Sasang ku ndooy, lay na ku bay sinumariya meꞌ saraꞌ bangsa Rom. Sugaꞌ katobtoban pamiki da, subay ku pinōꞌ batan yaꞌ du luu dusa ku magtūk ka aku binotangan hukuman kapatoy. 19Sugaꞌ hangat siga Yahudi ndooy naggaꞌ, yaꞌ luu dapat man ku kapuwas. Dari lay ku muhun nohoꞌ binoo palkalaꞌ ku pa mman Panghuluꞌ Sultan. Sugaꞌ yaꞌ baw tu luu maksud ku malkalaꞌ siga pagkahi ku Yahudi.

20“Na kon ku itu bay nawag kaam mari kam tahappatan ku balharapan bong oy sabap ku pinusas ka karina meꞌ tuu. Kon ku itu meꞌ tuu sabap meꞌ ku pitsayaꞌ luu na bay takka tukang nalamat ma masi inagad meꞌ bangsa tabi Israil.”

21Yuk siga Yahudi looy baw siꞌ tu ni si Pol, “Yaꞌ kami la bay kasambut suwat man Yahudiya pasal kau. Maka yaꞌ du luu siga pagkahi tabi Yahudi mandooy bay nuntut pitu ga luu kalaatan nu. 22Sugaꞌ ninggai-ninggai jaꞌ lahat, luu jaꞌ jama malaat ntan bahau ma kinapitsayaan meꞌ nu ka ga pagkahi nu. Dari doman kami kale bong oy njawom pamiki nu.”

23Dari lay na baw sila isun bong llaw oy tanam man da pakale ni bitsala si Pol. Na taabut llaw looy, meka na lay pilay pa lumaꞌ man si Pol. Pag-anu siꞌ, lay na sila pahatiyan si Pol kabanahan pasal pamarinta Tuhan. Boꞌ na, lay gi ya mōꞌ buktiꞌ man jawom saraꞌ Nabi Musa ka kitab kanabi-nabihan inaa si Isa yana tukang nalamat ma bay njanjiꞌ meꞌ Tuhan. Boꞌ tud bay pinagtuyuan bana meꞌ si Pol mitsalahan sila labba man sayu ngabut sampay sangom bong pin sila pitsayaꞌ jaꞌ ni si Isa. 24Dari kuwan kasohean, lay na du takoleꞌ binitsalahan, sugaꞌ kuwan kasohean, yaꞌ kuhi pitsayaꞌ. 25Dari bbuwatan siga Yahudi looy siꞌ, lay na ga magjaw-jawap. Tapit jaꞌ siꞌ sila palakka, yuk si Pol ninsila, “Na bong ina kam yaꞌ pitsayaꞌ, pahap-hap kam taggahaꞌ tuwaꞌ du pa kaam umanat looy ma bay sohoꞌ Rū Sutsiꞌ pinasampay ni Nabi Isaya pa mman siga kabboꞌ-bboan tabi. Yuk Rū Sutsiꞌ ni Nabi Isaya,

26‘Pilay ko pa mman bangsa nu, boꞌ da baan nu, san ina sila sigi-sigi pakale, yaꞌ du sila kuhi kahati. San ina sila ngandaꞌ, yaꞌ du sila kakila.

27Ngkon na ilay meꞌ looy sabap tohas kōk da. Sibuꞌ du karuha da ka jama lay na sompong da tinga da maka lay na pakaddom da mata da. Bong siꞌ saꞌ meꞌ looy, mastiꞌ ngita jaꞌ sila, kale sila sampay kahati sila. Boꞌ na, mastiꞌ nawbat jaꞌ sila, boꞌ taulian ku pangatayan da.’ ”#(28.26-27) Kitab Nabi Isaya 6.9-10.

28Yuk si Pol lagi, “Na, mbuwaꞌ danganakan, pagka kaekahan Yahudi yaꞌ kuhi pitsayaꞌ ni umanat Tuhan pasal kasalamatan njataꞌ si Isa, baan ta kam banahan, pinasaplag na du sina ni kabangsa-bangsahan saꞌ Yahudi. Boꞌ tatantu ku, mastiꞌ hinasi jaꞌ sina meꞌ da.”

29Pag poleꞌ baanan ga Yahudi looy siꞌ, yaꞌ magsudjaꞌ pamiki da sampay tud bay mehe meꞌ da magjawap.

30Na si Pol siꞌ tu, luu duwan taun halloman na bay tamban ni lumaꞌ looy ma bay sukayan na. Maka luu-luu jama luꞌ pilay ngandaꞌ-ngandaꞌ iya, lay jaꞌ du hinasi meꞌ na. 31Boꞌ yaꞌ na ya bay paagak masaplag ninsila pasal pamarinta Tuhan sampay noan sila pasal Papuꞌ Isa Almasi. Maka halloman na ndooy, yaꞌ na luu bay naggaꞌ iya.

Currently Selected:

Salsila siga Rasul 28: sjm

Highlight

Copy

Compare