Salsila siga Rasul 17

Ga si Pol ka si Saylas ndooy ni Tesaloneka

1Lakka ga si Pol man Pilipi, pingkaꞌ sila man jawom siga daira Ampipolis ka Apolloniya sampay lay na sila nakka daira Tesaloneka. Ndooy siꞌ, luu disu langga bangsa Yahudi. 2Pag taabut Llaw Pahali, lay paasok si Pol pa jawom langga looy meꞌ ndang kabiyasahan na ni mimon daira. Ndooy siꞌ, njawom min tallu pituꞌ, tuktuk Llaw Pahali, buwatan na magbilmaarup ka sila pasal siga suwat njawom kitab pasal Almasi. 3Lay ya makitahan sila siga tunaꞌ njawom kitab man na mahatiyan sila subay Almasi lumingkaꞌ doꞌ duhuꞌ njawom kabinsanaan sampay matoy, boꞌ na pinakallum. Pag-anu, yuk si Pol ninsila, “Na si Isa ilay ma bay awnan ku nsiniꞌ, yana Almasi na silay.”

4Dari meka na bay takoleꞌ binitsalahan sampay lay na matabeꞌ dī da ni ga si Pol ka si Saylas. Kasohean sila bangsa Yahudi sugaꞌ kaekahan bangsa Greek ma luu tawu da pa Tuhan, maka meka du danda balkanan tabeꞌ ninsila.

5Sugaꞌ kasohean Yahudi ndooy, pag ndaꞌ da meka na jama pitsayaꞌ ni tōꞌ si Pol, takkahan dangkiꞌ na baw. Dari bbuwatan da ngumpo siga jama maat binoo hiluhalaꞌ ni sikaliput daira looy. Maka lay gi sila pa lumaꞌ disu lalla inawnan si Jason man da miha si Pol ka si Saylas. Maksud da moo sila pa poan pa jawom baanan jama ndooy. 6-7Pag yaꞌ jaꞌ tatammu da, si Jason na baw ka ga kasohean pagkahi na sukuꞌ si Isa lay guyud-guyud da pa awpan siga saraꞌ ni daira da. Boꞌ maghowapan na pin sila sa tahaꞌ-tahaꞌ lān song da pilay. Takka jaꞌ siꞌ sila, yuk da, “Si Jason itu bay ngannaꞌ duwa jama maat ni lumaꞌ na. Boꞌ ga jama looy ilay sikaduwa, bbuwatan da ngalataan kalahat-lahatan buwat kalingogan paninggai-paninggai jaꞌ. Boꞌ masi gi silay sila luntuu ni daira tabi. Sila ilay ka ga mimon pagkahi da nguntra pamarinta Panghuluꞌ Sultan. Baꞌ-bāꞌ da, luu gi konoꞌ sultan sarī subay binean pinag-awnan si Isa.”

8Pag takale bay bitsala da leꞌ siga saraꞌ ka ga jama ma ndang luu ndooy, tud bay hipos sila. 9Dari siꞌ, lay sohoꞌ ga saraꞌ looy si Jason ka ga soheꞌ na mayaran piyansa. Sugaꞌ halling saraꞌ looy, bong mintu ga si Pol yaꞌ na mōꞌ kalingogan, papoleꞌ da sa sīn da. Na lay jaꞌ siꞌ sila muwan piyansa, lay na du sila pinōꞌ.

Ga si Pol ka si Saylas ndooy ni Bereya

10Pag ndaꞌ siga sukuꞌ si Isa ndooy meꞌ looy, honaꞌ-honaꞌ da gam na sohoꞌ da ga si Pol ka si Saylas halin pa daira Bereya. Dari sangom looy du, lay na ga si Pol tinuhiyan meꞌ siga sukuꞌ si Isa pa behe lān. Pag takka da ni Bereya, lay na baw sila paasok pa jawom langga siga Yahudi.

11Na siga Yahudi ndooy ni Bereya, mas mahap baw arat-tabiat da man siga Yahudi ndooy ni Tesaloneka. Tinagi sila pakale ni umanat ga si Pol sampay lay du hinasi meꞌ da. Dari llaw pa dangallaw, wā sila maliksaꞌ njawom kitab man da masā bong tud mawjud du bitsala ga si Pol. 12Song hallom, meka na siga Yahudi sampay na ga bangsa Greek ma balkanan, danda-lalla, pitsayaꞌ na ni si Isa.

13Sugaꞌ pag taaka jaꞌ meꞌ siga Yahudi ni Tesaloneka masaplag na baw si Pol umanat Tuhan pasal Almasi ndooy ni Bereya, lay sila patuhut. Takka jaꞌ siꞌ sila, bbuwatan da moo-moo jama hiluhalaꞌ ngalasuhan ga si Pol. 14Dari magti si Pol sinohoꞌ leꞌ siga pagkahi na sukuꞌ si Isa patangkaw pa kalawakan ndooy ni tapiyan mari tahan na mmeꞌ patuwak taꞌ adjung. Sugaꞌ kuwan ga si Saylas ka si Timuti, lay na doꞌ tamban ndooy ni Bereya. 15Si Pol siꞌ bay palakka, lay gi ya tinuhiyan meꞌ kasohean sukuꞌ si Isa ngkod daira Aten. Pag poleꞌ siga soheꞌ si Pol pa Bereya, lay gi si Pol nugun ninsila nohoꞌ ga si Saylas ka si Timuti patuhut deꞌ-dēꞌ pa mman na.

Si Pol masaplag ndooy ni Aten

16Sasang si Pol ngagad sila ndooy ni Aten, tud bay susa atay na pag ndaꞌ na meka jama-jama ma sinumba ni sikaliput daira looy. 17Dari siꞌ bbuwatan na, llaw-llaw lay ya pa plasa man jama biyasa kumpo-kumpo. Ndooy siꞌ, masaplag na pin ya pasal si Isa ni soysoy soheꞌ na sitammu ndooy. Maka daran du ya paasok pa jawom langga siga Yahudi moo sila magbilmaarup pasal si Isa. Maka luu du palamud ninsila siga bangsa Greek ma mmeꞌ du numba ndooy.

18Ndooy siꞌ ni Aten, luu duwa palhimpunan ga guru ma tigiꞌ magbilmaarup pasal jinisan hāl ma kinapitsayaan meꞌ manusiyaꞌ. Disu palhimpunan inawnan Epikuru, kuwan ilooy disu Istoik. Na ga jama looy siꞌ tu, pag lay jaꞌ pinasaplagan meꞌ si Pol pasal si Isa sampay hāl meꞌ na bay pinakallum, yuk kasohean, “Uy, magligaw jaꞌ bina lalla naa! Bitsala oy doꞌ ina meꞌ naa?” Yuk kasohean baw siꞌ tu, “Marean ta bina binitsala meꞌ na siga tuhan ma yaꞌ gi tasayu tabi.”

19Dari lay si Pol binoo meꞌ da pa lugar inawnan Areyapagas mman siga pa-mmean daira looy kumpo-kumpo. Pag takka da ndooy, yuk da ni si Pol, “Bong siꞌ kadarihan ningkau, passaun doꞌ ningkami banahan tōꞌ bahau looy siꞌ ma bay pasaplag nu ningkami. 20Ag-agan la tōꞌ nu! Tud doman kami toon bong oy kamaatunan na.”

21Na danan da ilay siꞌ bay nohoꞌ pinahatiyan ni si Pol batan tud tinagi jama Aten sampay ga jama sampi ndooy magbilmaarup tuktuk luu tōꞌ bahau.

22Dari siꞌ, lay na nangge si Pol ni awpan sikamimon ndooy ni Areyapagas, boꞌ na halling, “Kaam, siga jama Aten, ni lilingan ku tiggo kam la magtaat ni siga tuhan bi. 23Batan sasang ku bay maglanan ni daira bi, lay ku ngita jinisan jama-jama ma sinumba meꞌ bi. Maka lay gi ku bay pingkaꞌ ngita disu batu mehe, yana pangulbanan. Njataꞌ na, luu kabtangan bay llukisan, yuk na, ‘Para Tuhan Ma Yaꞌ Kinatoonan.’ Na Tuhan looy ilay siꞌ ma sinumba meꞌ bi san yaꞌ katoonan bi, iya na situ pinasaplag meꞌ ku ningkaam. 24Iya na sina Tuhan ma bay mapayak junyaꞌ sampay mimon isi na pa jawom, pa poan. Iya na Magbayaꞌ ni mimon-mimon taꞌ babaw junyaꞌ sampay ni sulgaꞌ. Yaꞌ ya maglumaꞌ ni siga langga ma bay jaꞌ pinabuwat meꞌ manusiyaꞌ. 25Yaꞌ gunahan niiya tabang manusiyaꞌ batan ndang langkap na ya. Gam pin iya ya muwan nyawa ka napas ni manusiyaꞌ sikamimon sampay na mimon kulang-kabus da. 26Labba man disu jaꞌ jama bay papayak na, luu na mimon kabangsa-bangsahan taꞌ babaw junyaꞌ. Maka iya na du silay magbayaꞌ bong pooy halloman siga bangsa ngantanan kawasa marinta sampay ngkoran siga panggaan paglahat da.

27“Iya ilay siꞌ bay mapayak manusiyaꞌ supaya ya piniha meꞌ da. Kawu-kawu sila nammu iya san sila meꞌ sapantun jama bagagap njawom lindom. Boꞌ ni sabana na, yaꞌ du ya lawak man bihing tabi saliꞌ-saliꞌ. 28Batan sabapan na, luu na kitabi, maka llum na kitabi sampay kapausik na kitabi. Meꞌ halling sambat kasohean pagkahi bi ma alistu ngandalil, ‘Mimon kitabi manusiyaꞌ yana anak Tuhan.’ 29Dari pagka kitabi anak Tuhan, daa na kitabi ngingat Tuhan meꞌ karuha siga jama-jama bay jaꞌ pinabuwat meꞌ manusiyaꞌ ka mmas atawa pilak porol atawa batu. Siga jama-jama meꞌ looy ilay lay jaꞌ tinulun-tulun meꞌ pamiki manusiyaꞌ.

30“Maruhuꞌ, ni kaawam manusiyaꞌ pasal Tuhan, lay gi pabiya na karupangan da. Sugaꞌ batnaa, sohoꞌ na na mimon jama ni sikaliput junyaꞌ nawbatan dusa da. 31Batan luu du sina mintu disu llaw bay ginantaꞌ meꞌ Tuhan man mimon manusiyaꞌ hinukum meꞌ disu lalla bay pineneꞌ meꞌ na. Hukuman na ilay mintu intong jaꞌ. Lalla looy ilay siꞌ bay na matoy. Sugaꞌ lay na du ya pinakallum meꞌ Tuhan mari tumatandaꞌ na ni manusiyaꞌ sikamimon iya na bay pineneꞌ ngahukum sila.”

32Na pag takale da bitsala si Pol hāl jama matoy pinakallum, kuwan kasohean, ngaludjum lagi. Boꞌ kasohean baw, yuk da, “Bong siꞌ luu gi dapat, doman gi kami la pakale ningkau pabalik.”

33Pus meꞌ looy, lay na lakka si Pol man baanan jama ndooy. 34Kasohean sila lay mmeꞌ niiya sampay pitsayaꞌ na ni Papuꞌ Isa. Disu, yana si Diyonisi, disu pa-mmean ndooy ni Areyapagas. Maka luu gi disu danda lay na du pitsayaꞌ inawnan si Damaris maka luu gi sarī.

Currently Selected:

Salsila siga Rasul 17: sjm

Highlight

Copy

Compare