2 Tesaloneka 2
2
Pa-mmean ma nulang mimon saraꞌ Tuhan
1Na siga danganakan, ni kapasal katakka Papuꞌ tabi si Isa Almasi ina maka ni hāl meꞌ tabi kumpo-kumpo nampang iya, meꞌ tuu silay mintu karuha na: 2Bong mintu luu māꞌ ningkaam llaw Papuꞌ pabeleng lai na pingkaꞌ, daa doꞌ lingog pamiki bi maka daa kam kuhi njadjuꞌ iman bi batan yaꞌ luu kabanahan na. San gi ina sila māꞌ Rū Sutsiꞌ mismu bay malahil ninsila, daa kam hidjab. Damikiyan, bong luu māꞌ bay taaka da atawa bay tabatsa da njawom suwat ma bay lakka man kami, daa du kam pitsayaꞌ. 3Daa kam mmeꞌ-mmeꞌ ninsila, batan inawnan llaw katakka Papuꞌ, yaꞌ sina takita ngkod-ngkoran yaꞌ gi luu duhuꞌ sakiyan manusiyaꞌ nuwak Tuhan. Maka subay luu doꞌ duhuꞌ pōꞌ disu pa-mmean ma tukang nulang saraꞌ Tuhan. Iya ilay sukuꞌ nalkaꞌ. 4Bbuwatan na ngangkat dī na saula-ula patingkat ya man mimon ma pinag-awnan meꞌ manusiyaꞌ tuhan da atawa oy-oy sinumba meꞌ da. Boꞌ patabbaꞌ gi sina ya pa jawom lumaꞌ Tuhan, yana langga mehe, boꞌ na ningkōꞌ ndooy magladjaꞌ-ladjaꞌ ngawnan dī na Tuhan.
5Saꞌ ba, jaman ku lagi ni lahat bi, ndang lay na kam bay baan ku siga pakaradjaan meꞌ tuu siꞌ? 6Ni masa batnaa, yaꞌ gi tanam man pa-mmean looy siꞌ pōꞌ, batan luu gi mampan niyat na. Katoonan bi du sina ilooy ma mampan iya. Dari yaꞌ gi kapōꞌ pa-mmean looy ma nulang saraꞌ Tuhan ngkod-ngkoran yaꞌ gi ngabut waktu bay ginantaꞌ niiya. 7Ni sabana na, minsan ni timpu batnaa, ndang luu na du meꞌ akka pa-mmean looy moo-moo manusiyaꞌ ngalangga saraꞌ Tuhan, sat na jaꞌ, yaꞌ tasayu jama. Sugaꞌ kuwan pa-mmean looy ma nulang saraꞌ Tuhan bbos-bbos, yaꞌ gi pōꞌ ngkod-ngkoran yaꞌ gi bay kinaddoan ilooy ma mampan iya. 8Dari pag taabut mintu waktu bay ginantaꞌ, pōꞌ na du sina pa-mmean looy. Sugaꞌ yaꞌ du sina mintu ya humallom batan ampud du sina ya meꞌ huwa napas Papuꞌ Isa pag beleng na. 9Sugaꞌ halloman na ina mintu yaꞌ gi bay ampud, luu na pin Ibilis muwanan iya kawasa man na buwat jinisan pabuwatan kahaylan-haylan man na magsian jama. 10Kajinisan na jalan man na ngakkahan jama ma song pa nalkaꞌ. Binasa sina mintu sila sabap yaꞌ bay hagaan ninsila kabanahan. Bong siꞌ ilay bay hagaan ninsila, mastiꞌ sinalamat jaꞌ sila meꞌ Tuhan mari sila yaꞌ binasa. 11Sangkon pinalingu na sina banahan meꞌ Tuhan pamiki da supaya pitsayaꞌ sila ni siga pakaradjaan ma yaꞌ bana. 12Pag toklas na, kalabuan na sina sila hukuman ma hinalliꞌ ni mimon ma yaꞌ pitsayaꞌ ni kabanahan ka tigiꞌ buwat kalaatan.
13Boꞌ kaam ina, siga danganakan, pabiddaꞌ man sila. Sangkon pataꞌ du kami wā muwan pagsukuhan pa Tuhan sabapan bi, yana siga kakasi Tuhan. Labba man sibuwa lagi, ndang lay na kam peneꞌ Tuhan tabeꞌ ni sukuꞌ na. Maksud Tuhan supaya kam salamat man sabapan Rū na nutsiꞌ pangatayan bi maka sabap meꞌ bi pitsayaꞌ ni kabanahan. 14Magsuku kami sabap lay na pakoy Tuhan umanat mahap lakka man kami man ngaliyun kaam supaya kam tumabeꞌ na ni kabantugan Papuꞌ tabi si Isa Almasi. 15Sangkon, siga danganakan, daa labbahan bi pangando bi. Maka kuwangkutan bi na siga tōꞌ ma bay pinasampay meꞌ kami ningkaam, labba man ilooy ma bay halling kami ningkaam balharapan sampay ni jawom suwat kami.
16-17Na siga danganakan, kakasi Tuhan, kamura-murahan pinagamgaman na pin atay bi meꞌ Mmaꞌ tabi Tuhan ka Papuꞌ tabi si Isa Almasi. Kamura-murahan ginaosan na pin kam meꞌ Tuhan mari mahap jaꞌ mimon tangge-tingkōꞌ bi ka bitsala bi. Batnaa, sabap Tuhan poonan tabang mehe ningkitabi, luu na kagakan njawom atay tabi saumu sampay holat ayad saꞌ alang-alang.
Currently Selected:
2 Tesaloneka 2: sjm
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.