इपिसियों 3

ज्यो यहूदी ने हे वाँका में पोलुस की सेवा

1मूँ पोलुस थाँ ज्यो यहूदी ने हा थाँका वाते ईसू मसी को दास हूँ, ईंवाते जेळ में बन्द हूँ। 2परमेसर करपा करन थाँकी भलई का वाते ज्यो काम मने हुप्यो हो, वींका बारा में थाँ हुण्योईस वेई। 3अन परमेसर आपणी गुप्त की बाताँ ने मारा पे परगट किदो, जिंका बारा में, में थोड़ोक पालाँ पाटाँ में लिक चुक्यो हूँ। 4#कुलु 1:26,27जणीऊँ थाँ, भणन हमज सको हो के, मूँ वीं मसी का राज ने कतरोक हव जाण हूँ। 5पुराणी टेम में ईं राज ने मनकाँ पे परगट ने किदो ग्यो हो, अबाणू परमेसर पुवितर आत्माऊँ वींका पुवितर थरप्या तका अन वाँका आड़ीऊँ बोलबावाळा पे परगट किदो ग्यो। 6ओ राज ओ हे के, हव-हमच्यारऊँ यहूदियाँ का हाते ज्यो यहूदी ने हे वी भी वारिस वेवे अन एकीस डील का भाग वे अन ईसू मसी का गट-जोड़ऊँ परमेसर का वादा में पाँती लेवे।

7मूँ परमेसर की करपा का दानऊँ, जिंने वणा वाँके काम करबावाळी तागतऊँ दिदो, जणीऊँ मूँ हव हमच्यार को दास बण्यो। 8मूँ हाराई पुवितर मनकाँऊँ फोरो हूँ, पण मारा पे आ करपा वीं के, मूँ मसी का अनमोल धन ने ज्यो हमजऊँ बारणे हे वींका हव हमच्यार ने ज्यो यहूदी ने हे वाँ लोगाँ ने हूणाऊँ 9अन हाराई पे परमेसर का राज की ओजणा ने परगट करूँ, ज्यो हारई चिजाँ ने बणाबावाळा परमेसर ठेटऊँ छाने राक्यो हो, 10ताँके अबे मण्डळीऊँ परमेसर को तरे-तरे को ग्यान वाँ हरग का मोटा राजा अन अदिकारियाँ पे परगट किदो जावे। 11परमेसर ओ, आपणाँ अमरकाळ का मकसद के जस्यान किदो हो अन ईंने आपणाँ परबू ईसू मसीऊँ किदो हो। 12मसी का गट-जोड़ऊँ अन वींपे विस्वास करबाऊँ बना दरपता तका परमेसर का हामे जाबा को भरोसो हे। 13ईं वाते मूँ हात-जोड़न केवूँ के, ज्यो कळेस थाँका वाते मने जेलणो पड़रिया हे, वीं मस हिम्मत ने छोड़ो, काँके ओ थाँकी भलई का वाते हे।

मसी को लाड़

14ईं मस मूँ बापू परमेसर का हामे परातना करबा ने गोडा टेकूँ हूँ। 15ज्याऊँ हरग अन दनियाँ में, हाराई परवाराँ ने ओळकाण मले। 16परमेसर आपणी आत्माऊँ आपणाँ मेमा भरिया धनऊँ थाँकी अंतर-आत्मा जोरावर वेबा का वाते थाँने तागत देवे। 17अन विस्वासऊँ मसी थाँका हरदा में बसे अन थाँकी जड़ा अन नीम परेम में धस जावे। 18हारई पुवितर मनकाँ का हाते हव तरिया ओ हमजबा की तागत पावो के, मसी को परेम कतरो लम्बो, चोड़ो, ऊसो अन ऊण्डो हे। 19अन मसी का वीं परेम ने जान सको, ज्यो हाराई ग्यानऊँ बारणे हे, जणीऊँ थाँ परमेसर का हारई गुणऊँ भर जावो।

20अबे परमेसर आपणाँ में काम करबावाळी वाँकी तागतऊँ आपणे पूँछबाऊँ अन हमजबाऊँ भी घणो हेलो काम कर सके हे। 21मण्डली में अन ईसू मसीऊँ परमेसर की मेमा जुग-जुग तईं वेती रेवे। आमीन।

Currently Selected:

इपिसियों 3: एम टी आर

Highlight

Copy