1 थिस्सुलुनिक्यों 5
5
परबू का पाच्छा आबा का दन वाते त्यार रेणो
1हो भायाँ-बेना, परबू का पाच्छा आबा की टेम अन दनाँ का बारा में लिकबा की माँने जरूत ने हे। 2#मत्ती 24:43; लूका 12:39; 2 पत 3:10काँके थाँने खुद अणी नुवी बात को हव तरियाऊँ पतो हे के, जस्यान रात में चोर अणाचेत को आ जावे हे वस्यानीस परबू के पाच्छा आबा को दन वेई। 3जद्याँ मनक केरिया वेई के, “हारोई हव हे अन कई दरपणी ने हे,” वणी दाण एकदम परकोप आ पड़ी जस्यान जापा वाळी लुगई पे दुक वेवे हे। वीं कणी भी तरियाऊँ बंच ने सकी।
4पण भायाँ-बेना, थाँ तो ईं अंदारा में ने हो के, परबू के पाच्छा आबा को दन थाँका पे अणाचेत को चोर की जस्यान आ जावे। 5काँके थाँ रात अन अंदारा का ने हो, पण थाँ हाराई दन अन उजिता की ओलाद हो। 6ईं वाते दूजाँ के जस्यान आपाँने हूतो तको ने रेणो छावे, पण हेंचेत अन खुद ने काबू में राकणो छावे। 7काँके जतरा होवे हे, वीं रात मेंईस होवे हे अन जतरा पियावाळा वेवे हे वीं रात मेंईस नसो करे हे। 8#यसा 59:17; इपि 6:13–17पण आपीं जतरा दन का हाँ, आपाँने विस्वास अन परेम को हत्यार पेरन अन बंचबा को टोपो लेन हेंचेत रेणो छावे। 9काँके परमेसर आपाँने वींका गुस्सो ने भुगतबा का वाते ने, पण परबू ईसू मसीऊँ बंचाबा का वाते चुण्या हे। 10ईसू मसी आपाँ वाते ईं वजेऊँ मरिया हाँ के, आपाँ पलई जीवता वा कन पलई वाँके आबाऊँ पेल्याँ मरी जावा, पण हाराई मलन वाँका हाते जीवा। 11ईं वाते जस्यान थाँ करता आरिया हो वस्यानीस एक दूजाँ ने जेलो देन हिम्मत बड़ाता रेवो अन विस्वास में गाटा करता रेवो।
आकरी आदेस अन नमस्कार
12हो भायाँ-बेना माँ थाँकाऊँ आ अरज करा हाँ के, जतरा भी मण्डली का अगुवाँ थाँका वाते मेनत करे, परबू में थाँने गेलो बतावे हे अन आदेस देवे हे, वाँको मान करिया करो। 13अन वाँका कामाँ की वजेऊँ परेम का हाते वाँने घणा आदर-मान का जोगा हमज्या करो अन एक-दूजाऊँ मेल-मिलापऊँ रेवो।
14हो भायाँ-बेना, माँ थाँने हमजावा हाँ के, जी आळकातक हे वाँने हमजावो, दरपे वाँकी हिम्मत बड़ावो, कमजोरा ने हमाळो अन हाराई का हाते नरमाई राको। 15कुई भी बुरई का बदले बुरई ने करे, पण एक दूजाँ को अन हाराई मनकाँ को भलो करबा का वाते आगता रेवो।
16हमेस्यान राजी-खुसी रेवो। 17हमेस्यान परातना करबा में लाग्या तका रेवो। 18हरेक बाताँ में धन्नेवाद देता रेवो, काँके थाँका वाते ईसू मसी में परमेसर की याईस मरजी हे।
19पुवितर आत्मा का कामाँ ने रोको मती। 20परमेसर का आड़ीऊँ किदी तकी बाताँ ने बेकार मती जाणो। 21बाताँ ने परको अन ज्यो हव हे वाँने गरण करो। 22हारी तरियाँ की बुरईऊँ बचन रेवो।
आसिरवाद देणो
23सान्ती देबावाळा परमेसर खुद थाँने हव तरियाँ पुवितर करी अन थाँ थाँकी आत्मा, जीव अन देह ने आपणाँ परबू ईसू मसी का पाच्छा आबा का दन तईं पुरी तरियाऊँ निरदोस बणन हाँजाहाँतरा रेवो। 24थाँने बलाबावाळा परमेसर विस्वास जोगा हे अन वो अस्यानीस करी।
25हो भायाँ-बेना, मारा वाते भी अरज करिया करज्यो।
26हाराई विस्वास्याँ के गळे मलन जे मसी की करिया करो।
27ओ कागद हाराई भायाँ ने भणन हूणाज्यो, ईंको मूँ थाँने परबू का अदिकारऊँ हुकम दूँ हूँ।
28आपणाँ परबू ईसू मसी की करपा थाँका पे वेती रेवे।
Currently Selected:
1 थिस्सुलुनिक्यों 5: एम टी आर
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
