1 कुरिन्थियों 13

हाराईऊँ मोटो परेम

1यद्याँ मूँ मनकाँ अन हरग-दुताँ की बोली बोलूँ पण लोगाऊँ परेम ने करूँ, तो मूँ टन टन करतो तको पीतळ अन फालतू में बाजतो तको ढोल हूँ। 2#मत्ती 17:20; 21:21; मर 11:23अन यद्याँ मूँ परमेसर की बाताँ भी बता सकूँ अन मूँ हारोई भेद भी खोल सकूँ, हारोई ग्यान भी जाण जऊँ अन मने अटे तईं विस्वास भी वे के, मूँ मंगरा ने भी हरका सकूँ हूँ, पण परेम ने करूँ, तो मूँ कई भी ने हूँ। 3अन यद्याँ मूँ मारी हारी धन-दोलत गरीबा ने बाँट दूँ, अन मूँ हव-हमच्यार हुणाबा का वाते मारी देह ने बाळन बली दी दूँ अन पच्छे भी परेम ने करूँ तो मने कई नफो ने हे।

4काँके जिंमें परेम वेवे हे वो धिज्यो राके हे अन दया करे हे अन वो रिस्याँ ने बळे हे अन ओ खुद की बड़ई ने करे अन मेपणोऊँ मोटो ने वेवे हे। 5अन वो बुरी चाल कोयने चाले, अन वो खुद की भलई भी ने छावे, नेई पगई गुस्सा करे अन नेई किंकी बुरई को लेको राके, 6अन ने वो कूकरमऊँ राजी वेवे हे पण वो ओ हाँचऊँ राजी वेवे हे। 7वो हारी बाताँ ने सेण करे हे, अन हारी बाताँ पे विस्वास राके हे, अन हारी बाताँ की आस राके हे अन हारी बाताँ का वाते धीरज राके हे।

8परेम कदी भी टळे कोयने पण परमेसर का आड़ीऊँ बोलबावाळा को बोलणो खतम वे जाई, अलग अलग बोली में बोलबा को वरदान भी खतम वे जाई अन ग्यान भी खतम वे जाई। 9काँके आपणो ग्यान पूरो ने हे अन परमेसर का आड़ीऊँ बोलबावाळा की बाताँ भी पुरी ने हे। 10पण जद्याँ वो पूरो करबावाळो आई तो या कमी ने रेई।

11काँके जद्याँ मूँ बाळक हो तो मूँ बाळक का जस्यान बोलतो हो, अन बाळक के जस्यान मारो मन हो, अन बाळक के जस्यान हमज ही। पण जद्याँ में मोटो वेग्यो तो में बाळक के जस्यान की बाताँ छोड़ दिदी। 12अबे तो आपाँने धूँदळा काँस में धूँदळो-धूँदळो दिके हे, पण वीं टेम आपाँ आमे-हामे देकाँ। ईं टेम मारो ग्यान पूरो ने हे पण वीं टेम पूरो वे जाई, जस्यान मूँ परमेसरऊँ ओळक्यो जाऊँ। 13पण अबे विस्वास, आस, अन परेम ईं तीनई टळे कोयने अन अणा हारईऊँ मोटो परेम हे।

Currently Selected:

1 कुरिन्थियों 13: एम टी आर

Highlight

Copy