Romans 4

Sa Naun-unan Abraham Gapu Atte Pammatina

1Sosomḵon taḵu ḵad aḵ Abraham we daḵdaḵoḻ taḵu we Judyu. Ngai inon Abraham we nibelang aḵ naun-unan ḵan Apudyus? 2Nu gapu'tte ambaḻu we ḵingwan Abraham nangwaan Apudyus ḵan siya'ḵ naun-unan, maḵwae isḵaḻna'tta tagu. Yaḵon tuttuwae adipun maḵwae isḵaḻna'tte sinagung Apudyus. 3Te sa nigili ye Ugud Apudyus ḵanana, “Namati'ḵ Abraham ḵan Apudyus, pun siya nangibelangan Apudyus ḵan siya'ḵ naun-unan.”#4:3 Genesis 15:6; Galatians 3:6; James 2:23. 4Awatna, nu awad tagu'ḵ anḵewaaḻ, daḵampun aḵ mibelang aḵ atode libli ḵan siya tangdanna yaḵon illabbuna. 5Yaḵon ngaimane adi angwa'tta ambaḻu we banag ta awaton Apudyus yaḵon amati ḵan Apudyus we angwa'tta ḵabasbassuḻan aḵ maun-unan, sa pammatina gapun ni angwaan Apudyus ḵan siya'ḵ maun-unan. 6Sana pion Ari David ugudon si nangibag-ana'tte pian tagu we imbelang Apudyus aḵ naun-unane daḵampun aḵ gapu'tte ḵingwana. 7Ḵanana,

“Pian tagu we pinakawan Apudyus da ḵingwana

ya ḵinaanna dusan da basuḻna.

8Pian tagu we adimpun Apudyus ogon iḵagasmoḵ da basuḻna.”#4:7-8 Psalm 32:1-2.

9Ngai nangibag-an Ari David si ḵananae pian? Abus taḵu ḵad aine Judyu aḵ nanuttuwa si ugali ye masogyatan? Naid! Te taḵon ay da Gentil we adipun nasogyatan, nidogada. Ḵananni ye imbelang Apudyus aḵ Abraham aḵ naun-unan gapu'tte pammatina.#4:9 Genesis 15:6; Romans 4:3; Galatians 3:6; James 2:23. 10Ḵamaan ni naḵwaan ni sana? Sa daan Abraham masogyatan baḵon nu sa nagangputana, imbelang Apudyus aḵ naun-unan.#4:10 Inggan ni namatiyan Abraham si karin Apudyus ḵan siya inggana si nasogyatana, nasawaḻan aḵ opat tawone naḻaḵpus. 11Pun nasogyatan aḵ Abraham ta angipanoḵnoḵe imbelang Apudyus aḵ naun-unan gapu si pammatina si daannapun masogyatan. Pun nambalinon Apudyus aḵ aman da losane namati taḵon ay nu adidapun nasogyatan, mibelangda'ḵ naun-unan. 12Ḵad siya nambalin aḵ aman da losane Judyu we nasogyatan ya inunudda bos pammatin Abraham atte daanna masogyatan.

Sa Angawatan Da Losane Amati Si Inkarin Apudyus

13Sa awe, inkarin Apudyus ḵan Abraham ya da ganaḵnae allaḵsunda annae lubung. Yaḵon daḵampun aḵ gapu'tte nanuttuwaan Abraham si lintog nangibelangan Apudyus ḵan siya'ḵ naun-unan yaḵon gapu'tte pammatina. 14Te nu maatod inkarin Apudyus atta anuttuwa si lintog, ippun ogon anun ni pammatin da tagu ḵad ippun anun ni inkarin Apudyus. 15Te sa lintog ambanag si sumang-an Apudyus ḵan ditaḵu te aditaḵupun lamog tuttuwaon. Yaḵon nu naippun lintog naippun malisalis.

16Pun sana gapunae mibatay atte pammati ta sa inkarin Apudyus mibatay si ḵinabaḻuna ya aaddi ye mituttuwa'tta losane mibelang aḵ ganaḵna, daḵampun aḵ abus da Judyu aḵ angigammu'tte lintog yaḵon da losane amati ye isun ni pammatin Abraham. Te siya ama taḵu losan.#4:16 Galatians 3:7. 17Ḵanan ni nigili ye Ugud Apudyus, “Nambalinoḵ siḵa'ḵ aman da adu we ili.”#4:17 Genesis 17:5. Siya ama taḵu si antotollong Apudyus we pinatin Abraham, siya maḵabooḻe anagu'tta natoy ḵan angwa'tta banage naippun. 18Pinatin Abraham imbagan Apudyus ḵan siya taḵon ay nu ippun namnamana'ḵ mituttuwa, siya nambalin aḵ aman da adu we ili ye sa ḵaadun da ganaḵna isuna ḵaadun da bituwon ad langit. Sadi nigili'tte Ugud Apudyus we maḵwa.#4:18 Genesis 15:5. 19Sa sadi ye timpu, madam-an ansinggasut tawon Abraham ḵan ippun namnamana'ḵ maganaḵ te aḵ Sarah ḵad mummammad-an. Yaḵon sissiyae ampigsa pammatina taḵon ay nu naḻaḵay. 20Yaḵon adipun nanduwaduwa somsomoḵna si mipanggob atta inkarin Apudyus ḵan siya yaḵon amo pummigsapigsa pammatina ya indaydayawna'ḵ Apudyus, 21te aaddi ye lamog Apudyus ḵoon da inkarina. 22Pun gapu si pammatina, siya nangibelangan Apudyus ḵan siya'ḵ naun-unan#4:22 Genesis 15:6; Romans 4:3, 9; Galatians 3:6; James 2:23. te namati'tta inkarin Apudyus ḵan siya. 23Yaḵon sa sadi ye nigili ye ugud ḵanana, “Imbelang Apudyus aḵ Abraham aḵ naun-unan,” daḵampun aḵ abuse para ḵan Abraham, 24te nigili'ḵ para bos ḵan ditaḵu. Ditaḵu we namati ḵan Apudyus we nanagu ḵan Apu taḵu we Jesus. 25Impuḻang Apudyus aḵ matoy aḵ Jesus ta bayad da basuḻ taḵu ya tinaguna ta ibelang Apudyus ditaḵu'ḵ naun-unan.#4:25 Isaiah 53:4-5.

Currently Selected:

Romans 4: kml

Highlight

Copy