Galatians 2

Sa Namigbiganda Si Ḵinaapostol Paul

1Naḻaḵpus ḵad nasawaḻan aḵ opate tawon, ummoyaḵ ḵasin ad Jerusalem we buḻunku'ḵ Barnabas. Innawitni bos aḵ Titus. 2Ummoyaḵ sidi te impailan Apudyus we sadi ḵasapuḻane ḵooḵ. Dummatong ḵani ḵad, abus aḵ naḵamitingaḵ da papangat woḵ illawlawagḵu ḵan dida Ambaḻu we Damag we iwwaḻagawagḵu'tta Gentil. Adiḵpun pione ippun anun da inayongḵu si awe ya sinsadi. 3Taḵon ay aḵ Titus we buḻunḵu we Gentil, adidapun impatute ampasogyat.#2:3 Ḵanan ni Ambaḻu we Damag we iwwaḻagawag Paul we adipun ḵasapuḻane ituttuwan da namati ḵan Kristu da lintog Moses ta mibelangdae maun-unan. Sa osa'tta lintog Moses we ampatog atta Judyu ya atta angituttudu'tta tuli, ḵasapuḻane masogyatan da losane laḻaḵi. 4Ummoy ḵani sidi gapu'tta allolloḵḵone namatida ḵan Kristu, da sanae tagu nidogada ḵan diḵani ta ansiputda ta igammuwonda nawayawayaanni gapu'tte niyossaananni ḵan Jesu Kristu. Piondae ambalin ḵani'ḵ musassu.#2:4 Da musassun ni lintog Moses, ḵasapuḻane ituttuwada da losane lintogna ta siya mataguwanda. On te da musassu, ḵasapuḻane siya tuttuwaonda da losane pion da ap-apuwonda. 5Yaḵon adinipun pulus iyyunud taḵon ay sin-aḵitan ta adi mabaliwan ḵatuttuwaan ni Ambaḻu we Damag we patiyonyu.

6Yaḵon da sadi ye niyiyap aḵ papangat, ippun ḵanana ḵan saḵon nu ngai ḵasasaadda te an-iisuwon Apudyus da tagu, ippun paat intuḻ-ayda si intuttuduḵ. 7Inniladae innatod Apudyus ḵan saḵon biyange angiwaḻagawag si Ambaḻu we Damag atta Gentil we isuna bos si nangittana ḵan Peter si biyange angiwaḻagawag atte Ambaḻu we Damag atta Judyu. 8Naawatandae aḵ Apudyus nangitod si ḵabooḻan ḵan Peter we anserbi ye an-apostol atta Judyu, siya bos nangitod ḵan saḵon si ḵabooḻane anserbi ye an-apostol atta Gentil. 9Binigbig da James ḵan Peter ya aḵ John we mibelange angipangpangu we intaḻgod Apudyus ḵan saḵon annae ḵewaaḻ gapu'tte ḵinabaḻuna. Sana gapunae nilamanuwanda'ḵ Barnabas ya saḵon ta angipaila si ambuḻbuḻunanni. Nan-uunudanni ye iwaḻagawagni Ambaḻu we Damag atta Gentil ya dida angiwaḻagawag atta Judyu. 10Abus aḵ ḵindawda ḵan diḵani pagatupanni ye bumadang atta ḵamḵamae Judyu we siya pasigḵu isisimoḵ ḵoon.

Sa Nanuppaḵan Paul Ḵan Peter

11Yaḵon ummali ḵad aḵ Peter ad Antioch, sinuppaḵaḵ atte sinagung da adu we tagu te nalawage daḵampun aḵ ustu ḵingwana. 12Te sa ḵaddaḵngana, patilayune miyubung atta susunud taḵu we Gentil. Pun dummatong ḵad da imbuun James, insaḻadnae nangiyagaye miyubung ḵan dida te maḵimut atte grupun da namati ye Judyu we angipatute mituttuwa lintog Moses. 13Ḵad da udume namati ye Judyu, inunudda bos ḵingwan Peter taḵon ay nu losanda inigammu we daḵampun aḵ ustu ḵoonda. Taḵon ay aḵ Barnabas, naawis woḵ unudona dida. 14Yaḵon innilaḵ sumullagi si ḵatuttuwaan ni Ambaḻu we Damag we ḵoonda, ḵanaḵ ḵan Peter si sinagung da losan, “Taḵon ay nu Judyuḵa, nalligligammuḵa si udume ugalin da Judyu we isun di daḵanḵapun aḵ Judyu. Ḵad nu ḵingwam ḵatti, ngaipam os ay ipatut paunud atta Gentil ugali taḵu?”

Da Losane Tagu Maun-unanda Gapu Si Pammati

15Niyanaḵ taḵu we Judyu, daḵampun aḵ isu taḵu da Gentil we ḵabasbassuḻan.#2:15 Naippun igammu taḵu nu imbagan Paul da sanae verse 15-21 ḵan Peter baḵon nu abus atta iGalatia. 16Yaḵon iniiggammu taḵu we sa antotollong Apudyus, daḵampun aḵ siya angwa si maun-unan ni tagu anuttuwaana'tte lintog te sa pammatina ḵan Jesu Kristu sanat angwa si maun-unana. Siya gapunae taḵon ay ditaḵu we Judyu, namati taḵu ḵan Jesu Kristu ta aḵ Apudyus angwa ḵan ditaḵu'ḵ maun-unan gapu si pammati taḵu we daḵampun si anuttuwaan taḵu si lintog. Te ippun pulus naun-unan si antotollong Apudyus gapu si anuttuwaana si lintog.

17Pun namnamaon taḵu we aḵ Apudyus angwa si maun-unan taḵu gapu'tte niyossaanan taḵu ḵan Kristu. Yaḵon da udume Judyu, ibelang ditaḵu'ḵ ḵabasbassuḻane tagu gapu'tte pammati taḵu ḵan Kristu ya aditaḵupun unudon lintogda ta maun-unan taḵu si antotollong Apudyus, piona ḵad ain ḵanane aḵ Kristu gapun ni maḵabasuḻan da tagu? Daḵampun paat! 18Te sa ḵatuttuwaan, ipailaḵe naḵabasuḻaḵ nu ansagungaḵ ya unudoḵ os ḵasin lintoge nan-awidaḵ si awe. 19Te gapu si lintoge adiḵpun lamog unudon, inigammuḵe naḵoddonganaḵ aḵ matoy ya misinaaḵ ḵan Apudyus. Pun ibelangḵu we natoyaḵ mipanggob atte lintog ta mataguwaḵ para ḵan Apudyus. 20Te mibelange naḵaḵatoyaḵ ḵan Kristu atte kros. Pun sinsadi, daḵampun ogon aḵ saḵon matattagu yaḵon aḵ Kristu we anna ḵan saḵon. Sa biyagḵu sinsadi, matattaguwaḵ si pammati atte Abeng Apudyus we nangayat ḵan saḵon ya nangitod si biyagna gapu ḵan saḵon. 21Adiḵpun idiyan ḵinabaḻun Apudyus. Nu maun-unan tagu si sinagung Apudyus gapu'tte anuttuwaana'tte lintog, naippun ain anun ni natoyan Kristu!

Currently Selected:

Galatians 2: kml

Highlight

Copy