Ephesians 5

Sa Ḵoon Da Abeng Apudyus

1Pun gapu ta diḵayu da abeng Apudyus we ayatona, ḵasapuḻane siya oḵyan unudonyu, 2ta miyisu oḵyan an-aayatyu si nan-aayat Kristu ḵan ditaḵu. Te innatodna long-agna'ḵ matoy para ḵan ditaḵu ya sa natoyana, isunan ambangu we datun ḵan Apudyus we mas-omana.#5:2 Sa mipanggob si ambangu we datun ḵan Apudyus we mas-omana, ilanyu'tte Exodus 29:15-18.

3Pun adiyu oḵyan ḵoon da ḵababbain ya adiyu bos ḵoon da udume kalasin di ḵaissawe banag. Adiyu bos ḵamommodon da daḵampun aḵ ḵuwayu. Ḵad naippun oḵyan os maugudanyu we tagun Apudyus atta ḵassanae banag. 4Adipun os mibagay ḵan diḵayu ḵaissaw an-uugudyu ya dinodong-og an-uugudyu we ippun anuna yaḵon siya oḵyan ḵoonyu anggappiya ḵayu ḵan Apudyus. 5Te inigammuyu we naippun maḵadagdagas ya angwa'tta ḵababbain aḵ midoga si ampangatan Kristu ya aḵ Apudyus. Isuna bos da ḵamommodona ḵuwan da udum te sa ḵamommodna, siya isun di apudyusna. 6Adi ḵayu oḵyan maallelaw atte tulin da angibagae maḵwa ḵoon taḵu da sanae banag te da sanae basuḻ gapunae dusaon Apudyus da adipun tumuttuwa ḵan siya. 7Pun adi ḵayu maḵabuḻbuḻun atta ḵassadi ye tagu. 8Te diḵayu ḵad, isun di anggiḵbot somsomoḵyu si awe yaḵon sinsana nasilawanda gapu si niyossaananyu ḵan Apu. Pun matagu ḵayu oḵyane isun da tagu we iinggaw atte padda. 9Te nu nasilawan somsomoḵ ni tagu, bumaḻu ugalina ya naun-unan ḵan tuttuwa. 10Padasonyu oḵyan adaḻon da mas-oman Apu ya ḵoonyu dida. 11-12Adi ḵayu maḵaḵwa'tta banage ḵababbain ḵan ippun anunae ḵoḵoḵḵon da tagu we awad si giḵbote nililimod. Siya oḵyan ḵoonyu ipaḵaawatyu ḵan didae lawwelawweng da ḵoonda taḵon ay nu ḵababbain aḵ ugudon da sanae banag. 13Te nu masilawan da awad atte anggiḵbot, aaddi ye maila nu ngai isuda. 14Ḵad pumadda da losan nu nasilawanda. Sadi piona ḵanan atte nigili ye Ugud Apudyus we ḵanana,

“Bumangonḵae masusuyop, mataguḵae natoy,

ta silawan Kristu somsomoḵnu.”

15Pun ummanyu'tta antataguyu. Daḵampun oḵyan aḵ matagu ḵayu we isun di nadong-og yaḵon matagu ḵayu we isun di nalaing ḵan naangsane tagu. 16Usaronyu da losane gundawayyu we angwa si ambaḻu te sinsana ḵad adu da angwa si lawweng. 17Pun adi ḵayu oḵyan andongdong-og yaḵon siya somsomḵonyu da pinion Apu we ḵoonyu. 18Ḵad adi ḵayu ambarbartek te dumadail yaḵon iyunudyu oḵyane sa ḵabooḻan ni Ispiritu Santu awad ḵan diḵayu. 19Te nu siya angidaḻan si somsomoḵyu, magimung ḵayu ḵad, ḵantaonyu da ḵantae naḻpuda'tta de Psalm, sa udume nigili'tte Ugud Apudyus ya da udume ḵantan da namati ye andayaw ḵan Apudyus. Ḵad daḵampun aḵ abus sungadyu'ḵ angiḵanta yaḵon maḻpu oḵyan si pusuyu. 20Ḵad pasig ḵayu anggappiya ḵan Apudyus we Ama atta losane banag atte ngadan Apu taḵu we Jesu Kristu.

21Sa osa bos an-asipakumbaba ḵayu gapu si angisipoganyu ḵan Kristu.

Sa Bagbagan Paul Atta An-asawa

22Diḵayu ḵade bubbubai, ampakumbaba ḵayu'tta asawayu we isun ni ampakumbabaanyu ḵan Apu te sadi pionae ḵoonyu. 23Te sa laḻaḵi siya angituray si asawana. Sadi isun Kristu we siya angipangat atta gimung da namati ye isun di long-agna. Ḵad aḵ Kristu anagu'tta losane namati. 24Pun diḵayu we bubbubai ye namati, ḵasapuḻan ose ampakumbaba ḵayu we ustu'tta asawayu'tta losane banage isun ni gimung da namati ye paipangat ḵan Kristu.

25Ḵan diḵayu bose lallaḻaḵi, ḵasapuḻane ayatonyu da asawayu we isun ni an-aayat Kristu ḵan ditaḵu we namati. Te sa ḵingwana, innatodna biyagna para ḵan ditaḵu si natoyana, 26ta itotoḵḵon ditaḵu we namati'ḵ taguna gapu ta pinapoḻḵasna ditaḵu'tte danum ya sa Ugud Apudyus. 27Ḵingwana ḵatti ta umali ḵade angayag ḵan ditaḵu we namati ḵan siya, ambaḻu ugali taḵu si antotollongna ya ippun ḵadellawan taḵu we isun ni bubai ye mikasar we ambaḻubaḻu ya ippun ḵaissawna ḵan dipiḵtuna. 28Pun diḵayu we lallaḻaḵi, ḵasapuḻane ayatonyu da asawayu we isun ni an-aayatyu'tta long-agyu. Nu ḵatti ḵoonyu, sa long-agyu ay-ayatonyu te diḵayu we an-asawa, nambalin ḵayu'ḵ ossaane long-ag. 29Naippun tagu'ḵ sasangngaana long-agna yaḵon siya ḵoona ummana ayyuwanan. Ḵatti isun ni ḵingwan Jesu Kristu ḵan ditaḵu we namati, 30te ibelangna ditaḵu'ḵ long-agna. 31Awad de Ugud Apudyus we ḵanana, “Sadi gapunae tenan ni laḻaḵi da amana ḵan inana ḵad nitipun atte asawana ḵad didae duwa nambalinda'ḵ ossaane long-ag.”#5:31 Genesis 2:24; 1 Corinthians 6:16.

32Annat ampatog ḵan naadaḻome tuttudu we sa an-aawatḵu, sa nan-ossaanan da namati ya aḵ Jesu Kristu. 33Yaḵon awad de amo piona ḵanan atta an-asawa. Ḵad siḵae laḻaḵi, ḵasapuḻane ayatom asawame isun ni an-aayatnu si long-agnu. Siḵae bubai, ḵasapuḻane patgam aḵ asawam.

Currently Selected:

Ephesians 5: kml

Highlight

Copy