Acts 7

Sa Imbagan Stephen

1Pun ḵanan ni ḵangatuwane padi ye nangimus ḵan Stephen, “Tuttuwa ḵamman da sanae ipabasuḻda ḵan siḵa?”

2Ḵanan Stephen, “Aamma ḵan susunude ganaḵ Israel, dongngonyu ud annae ibagaḵ. Sa awe, aḵ Apudyus we maḵabooḻ atta losan nampaila ḵan Abraham we daḵdaḵoḻ taḵu si inninggawana'd Mesopotamia si daanna ayan ad Haran, 3woḵ ḵanan Apudyus ḵan siya, ‘Tenam sanate ilim ya da agim ta inḵa si ili ye asiḵ ipaila ḵan siḵa.’#7:3 Genesis 12:1. 4Pun tinenan Abraham ilina'd Chaldea woḵ ummoy inninggaw ad Haran. Natoy ḵad de amana, indaḻan Apudyus si annae ili ye inggawan taḵu we sana. 5Sa sadi ye timpu, naippun luta'ḵ impatawid Apudyus ḵan Abraham taḵon ay sin-aliḵawog. Yaḵon sa inkarin Apudyus si umali ye aḻgaw asina itton annae ili ḵan siya'ḵ anḵuwana ya da ganaḵnae miyun-unud ḵan siya#7:5 Genesis 12:7; 13:15; 15:18; 17:1-8; 48:4. taḵon ay nu naippun yan abengda. 6Imbagan Apudyus ḵan siyae da ganaḵna asida umoy atte sabali ye ili. Ḵad ambalinonda dida'ḵ musassu ya mapaḵaḻamda'ḵ opatgasute tawon. 7Yaḵon ḵanan Apudyus, ‘Dusaoḵ da tagu we ammusassuwanda ta tenanda sadi ye ili ya mipaulida sina ta andaydayawda ḵan saḵon.’#7:6-7 Genesis 15:13-14; Exodus 3:12 8Pun imbilin Apudyus ḵan Abraham we ḵasapuḻane sogyatanda da abengdae laḻaḵi aḵ sinyal ni intuḻagna ḵan dida. Pun niyanaḵ ḵad aḵ Isaac we abeng Abraham, nasogyatan atte ḵawaḻun aḻgawna. Ḵingwan os Isaac atte abengnae aḵ Jacob, ḵingwan os Jacob atta nasawaḻan aḵ duwae abengnae lallaḻaḵi ye da danaḵḵoḻ taḵu.#7:8 Genesis 17:9-14; 21:2-4; 25:19-26; 29:31—30:24.

9“Da danaḵḵoḻ taḵu maaposda ḵan Joseph we sunudda woḵ ingnginada'tta udume tagu'd Egypt ta ambalin aḵ musassu sidi. Yaḵon awad aḵ Apudyus ḵan siya 10woḵ inligsin Apudyus atta losane nampaḵaḻamana. Innattan Apudyus aḵ Joseph aḵ ḵinalaing ḵan ambaḻu we ugali ya sadi gapunae nas-om aḵ Pharaoh we ari'd Egypt. Pun dinutuḵan Pharaoh aḵ gobernor ya ampangat atte intero we Egypt ya siya angayyuwan atta losane ḵuḵuwana.

11“Pune sadi, dummatong inggi si losane ili'd Egypt ya ad Canaan, pun amod de nampaḵaḻaman da tagu ya da danaḵḵoḻ taḵu ippun angaḻ-anda'ḵ ḵanonda. 12Dingngoḻ ḵad Jacob we awad de maḵan ad Egypt, imbuunna da abengnae laḻaḵi ye da danaḵḵoḻ taḵu ta umoyda ngumina'ḵ ḵanonda. Sadi damu we ummayanda. 13Pigwada ḵade ummoy, impaigammun Joseph ḵan didae siya sunudda woḵ inigammun Pharaoh mipanggob atte baḻyan Joseph. 14Pun impaayag Joseph aḵ Jacob we amana ya da losane susunudna ya da agida ta umoyda'd Egypt. Pitumpuḻu ya lima namungda. 15Ummoyda'd Egypt inninggaw woḵ sidi natoyan Jacob ya da abengnae danaḵḵoḻ taḵu.#7:9-15 Genesis da chapter 37-50. 16Da ladagda ḵad, intallayda'd Shechem woḵ illibonda dida si lilibbonane nginin-an Abraham atta abeng Hamor.#7:16 Genesis 23:1-20; 33:19; 50:7-13.

17“Madam-an ḵad timpu we mituttuwaan ni inkarin Apudyus ḵan Abraham, da danaḵḵoḻ taḵu we inggaw ad Egypt amo ummaduaduda. 18Inggana'ḵ nipasani ari ye ippun igammuna ḵan Joseph.#7:18 Exodus 1:8. 19Sa sadi ye ari, siniḵasiḵapana da danaḵḵoḻ taḵu woḵ pinaḵaḻamna didae impatutna impaiballu da uttinge laḻaḵi ta matoyda.

20“Sa sadi ye timpu, niyanaḵ aḵ Moses we ambaḻubaḻu we utting atte sinagung Apudyus. Tuḻu we buḻan nanagibiyan inana ḵan siya si boḻoyda, 21yaḵon napatutdae ummoy nanenan ḵan siya si igid ni tawwang. Pun indasan ni babaḻasange abeng Pharaoh woḵ pinadaḵoḻnae isun di mismu we abengna. 22Nituttudu ḵan Moses da losane ḵinalaing da iyEgypt woḵ nambalin aḵ nalainge an-ugud ya inggunayna.

23“Nantawon ḵad aḵ Moses aḵ opatpuḻu, simsimmoḵnae umoyna bisitaon da ḵailiyanae ganaḵ Israel. 24Ummoy ḵad, niyaspuḻe innilana osae iyEgypt we nampaḵapaḵaḻamona osae ganaḵ Israel. Pun ummoyna sinaḻaḵan woḵ imbaḻosna gingngat iyEgypt. 25Sa somsomoḵ Moses, maawatan da susunudnae ganaḵ Israel we siya pinilin Apudyus aḵ amuḵay ḵan dida yaḵon adidapun naawatan. 26Mabigat ḵad os ummoyna binisita dida woḵ indasana da duwae ganaḵ Israel we ampatoy woḵ pinadasna binoḻdaḵ dida woḵ ḵanana, ‘Susunudḵu we ganaḵ Israel, adiyupun ḵamman igammu we ansusunud ḵayu, ngaipa ḵayu ampapatoy?’

27“Yaḵon sa osae namabasuḻ, intuḵyudna'ḵ Moses woḵ ḵanana, ‘Ngai nangibaga ḵan siḵae anna ḵaḻabbongame angipangat ya anguwis ḵan diḵani? 28Piom os saḵon gongatone isun ni ḵingwam atte iyEgypt akkaḻbiyan?’#7:27-28 Exodus 2:14. 29Dingngoḻ ḵad Moses sadi naḵimtan woḵ ummawid ad Midian woḵ naḵaumili sidi. Nangasawa woḵ niyanaḵ da duwae abengnae laḻaḵi.#7:17-29 Exodus 1:6-2:22.

30“Naḻaḵpus ḵad de opatpuḻu we tawon, nampaila osae anghel Apudyus ḵan Moses si umapuapuye ḵayu si bumbummaaw si beleg Sinai. 31Innilan ḵad Moses nataag woḵ inadanina ḵad ta ilana dingngoḻna gingan Apu we ḵanana, 32‘Saḵon aḵ Apudyus we Apudyus da Abraham, Isaac ya aḵ Jacob.’#7:32 Exodus 3:6, 15. Dingngoḻ ḵad Moses sadi, namilpil si ḵimutna woḵ adipun maḵatuḻode angitollong. 33Pun ḵanan Apudyus ḵan siya, ‘Ḵaanom sandalnu ta mipailae patgam saḵon te annaaḵ si lugar we sumisiḵḵadam. 34Innilaḵe mapaḵapaḵaḻam da taguḵ ad Egypt ya dingngoḻḵu bos ayuwongda. Pun annae ummaliyaḵ ta iyyaḵ dida puḵayan. Umaliḵa ta ibuunḵu siḵa'd Egypt.’#7:30-34 Exodus 3:1-10.

35“Aḵ Moses, indiyan da danaḵḵoḻ taḵu si nangibag-anda ḵanane, ‘Ngai nangibaga ḵan siḵae anna ḵaḻabbongame angipangat ya anguwis ḵan diḵani?’#7:35 Exodus 2:14. Yaḵon imbuun Apudyus aḵ umoy angipangat ya amuḵay ḵan dida'tte nammusassuwanda gapu si badang ni anghel we nampaila ḵan siya si gumilagilabe ḵayu. 36Pun intallay Moses da ganaḵ Israel we naḻpu'd Egypt. Ḵad adu da ḵingwanae nakaskasdaaw ya sinyal si inninggawanda'd Egypt ya sa dummoḻmanganda'tte ngannonda Dilaage Baybay ya sa nanadtaddaḻananda si bumbummaaw si opatpuḻu we tawon.#7:36 Exodus 7:8—17:16. 37Aḵ Moses we mismu nangibaga'tta ganaḵ Israel ḵanane, ‘Sa umali ye aḻgaw, awad de osae profeta we isuḵe ibuun Apudyus ḵan diḵayu we maḻpu ḵan diḵani ye susunude ganaḵ Israel.’#7:37 Deuteronomy 18:15. 38Inninggaw si gimung da danaḵḵoḻ taḵu si bumbummaawe sa naḵaugudan ni anghel ḵan siya'tte beleg Sinai woḵ inawatna matattagu we Ugud Apudyus ta ittona ḵan ditaḵu.#7:38 Exodus da chapter 19-31.

39“Yaḵon da danaḵḵoḻ taḵu, indiyanda'ḵ Moses woḵ adidapun tinuttuwa da imbagana te piondae angulin ad Egypt. 40Nabayag ḵad aḵ Moses si sadi ye beleg Sinai, ḵananda ḵan Aaron,#7:40 Aḵ Aaron panguḻu we sunud Moses. Siya bos namadang ḵan Moses atte nangitallayana'tta ganaḵ Israel ad Egypt. Siya bos ummunae ḵangatuwane padin da ganaḵ Israel. ‘Angwaḵa ud aḵ sinan-apudyus aḵ angidaḻan ḵan diḵani te ippun igammuni nu ngai naḵwa ḵan Moses we nangipuyut ya nangitallay ḵan diḵani'd Egypt.’#7:40 Exodus 32:1, 23. 41Sa sadi ye timpu, nangwada'ḵ sinan-apudyuse isunan ubbun di baḵa'ḵ nandatunanda ḵan ginayagayaanda ḵingwadae mismu.#7:39-41 Exodus 32:1-6. 42Nan-awidan Apudyus dida ya binaybay-anae andayawda'tta init, soḻag ḵan da bituwon ad langit, isun ni nigili si iblun da profetan Apudyus we ḵanana,

“ ‘Diḵayu we ganaḵ Israel,

indatunyu ḵad ain ḵan saḵon da ayame

insidayu ya da atodyu si opatpuḻu we tawone

inninggawanyu'tte bumbummaaw?

43Naid! Yaḵon binuḵudyu tuldae inggawan ni

sinan-apudyusyu we ngannonyu Moloch

ya sa bituwone sinan-apudyus we ngannonyu Rephan

we ḵingwayu ta daydayawonyu.

Pun siya gapunae ibuunḵu diḵayu

si naadayu nu ad Babylon.’#7:42-43 Amos 5:25-27.

44“Sa inninggawan ḵad da danaḵḵoḻ taḵu si bumbummaaw, nangwada'ḵ tulda'ḵ angipailae awad aḵ Apudyus ḵan dida. Sa inondae nangwa niyiissu si naḵwaan ni impailan Apudyus ḵan Moses.#7:44 Exodus da chapter 25-31 ya 35-40. 45Natoy ḵad aḵ Moses, aḵ Joshua nipasani ye nangipangat ḵan dida si ummaliyanda si annae ili. Ḵad sa sadi ye tulda intagtaggaḵadda si nangop-opanda'tte ilin da tagu we pinaḻyaw Apudyus.#7:45 Joshua 3:14-17. Ḵad sa sadi ye tulda inniinggaw ḵan dida inggana si timpu we nan-Ari aḵ David. 46Nas-om aḵ Apudyus ḵan Ari David woḵ ḵindawna ḵan Apudyus ta iyunudnae antaḵad aḵ inggawana ta andayawan da ganaḵ Jacob ḵan Apudyus.#7:46 2 Samuel 7:1-16. 47Yaḵon aḵ Solomon we abengna nanaḵad atte boḻoye para ḵan siya.#7:47 1 Kings 6:1-38.

48“Yaḵon aḵ Apudyus we Ḵangatuwan, daḵampun aḵ inggaw atte boḻoye tinaḵad di tagu te sa ḵanan ni profeta,

49“ ‘Ad langit tumuḵduwaḵe ampangat

ya ad luta anggusdayaḵ.

Ngai kalasin ni boḻoye taḵadonyu we para ḵan saḵon?

Dinu lugar we maḵwae umillongaḵ?

50Saḵon nangwa'tta losane naḵwa.’ ”#7:49-50 Isaiah 66:1-2.

Ḵanan Stephen, sadi impaigilin Apudyus atte awe.

51Pinagatupan Stephen woḵ ḵanana, “Diḵayu we tummungitong! Isuyun pagano we adipun amati ḵan Apudyus ya tuḻtuḻḻongonyu ḵatuttuwaan. Isuyu bos da danaḵḵoḻyu we pasigda sullagiyon Ispiritu Santu. 52Awad ḵamman profeta'ḵ adin da danaḵḵoḻ taḵu nampaḵaḻamon? Gingngatda da imbuun Apudyus si awe ye ummoy nangipaigammu si umaliyan ni naun-unane aḵ Jesus ya sinsadi intuyuḵyu ya gingngatyu. 53Diḵayu da nanawid atte lintoge innatod Apudyus ḵan ditaḵu mipagapu'tta anghel yaḵon adiyupun tinuttuwa.”

Sa Namatubatuwanda Ḵan Stephen

54Dingngoḻ ḵad da papangat da Judyu da imbagan Stephen, ngumalitod da babada'tte ummamdane sangada. 55Yaḵon aḵ Stephen, naittan atte ḵabooḻan ni Ispiritu Santu woḵ nantangad ad langit. Pun innilana ḵinapaddan Apudyus ya aḵ Jesus we sisiḵad atte madawinanna. 56Pun ḵanana, “Ilanyu ḵad! Ilaḵ ad langite nabuḵtan ya sa Abeng Di Tagu we naḻpu'd langite niyanaḵ sina'd lutae sisiḵad atte madawinan Apudyus.”

57Yaḵon da papangat da Judyu, impupda da ingada ya nanugtug-uyda ta adida dongngon da ibagana woḵ losanda induḵḵus 58woḵ niluyluyda intallay si lasin ni siyudad ta batubatuwonda inggana'ḵ matoy. Da nanaḵdoḻe namabasuḻ ḵan siya, intabunuda da taḵḵop da silupda'tte sinagung ni babaḻu we nangngadan aḵ Saul. 59Sa amatubatuwanda ḵad ḵan Stephen, nalluwaḻu woḵ ḵanana, “Apu Jesus, awatom ḵalidodwaḵ.” 60Pun nanalluḵu woḵ ḵananae nangiyipḵaw, “Apu, adim oḵyan ipabasuḻ ḵan dida annae ḵingwada ḵan saḵon.” Ginangputna ḵad imbaga sana, natoy.

Currently Selected:

Acts 7: kml

Highlight

Copy