Acts 12

Da Adu We Ampaḵaḻaman Da Namati

1Sa sadi ye timpu, insaḻad Ari Herod Agrippa#12:1 Aḵ Ari Herod Agrippa, apun Herod we Mabigbig ya amunaḵon Herod Antipas we sa nampasiwat atte uḻun John we Ambobonyag. we namaḵaḻam atta udume namati. 2Impasiwatna uḻun James we sunud John. 3Innilana ḵade nas-om da Judyu si ḵingwana, impadoḵmana bos aḵ Peter. Sana naḵwa si Gayagayan da Judyu we ngannonda Tinapaye Naippun Yeastna. 4Pun nadoḵmaan ḵad aḵ Peter, impaibaḻud Herod woḵ paguwaḻdana'tta opate grupun da suḻdadu we nasin-oppatdae ampaspasani. Sa panggobna, maabus ḵad de Gayagayan da Judyu we ngannonda Nallausan,#12:4 Sa anna Gayagayan ni Nallausane gangganason da Judyu, iḵagasmoḵda nangiligsiyan Apudyus atta danaḵḵoḻdae nammusassu'd Egypt atte timpun Moses. Nanggaḵay ḵad anghel we nangongat atta losane panguḻu we abenge laḻaḵi'd Egypt, nilausana da boḻoy da Judyu we naḵuan da lewanganda si daḻan ni ubbu we karnero Exodus12. Tinawone gangganasonda ḵad waḻun aḻgawe gangganasonda. Pun da Judyu, adu we ili naḻpuwanda ya nandadatongda'd Jerusalem we umoy maḵagayagaya si annae ngannonda Nallausan. ḵuwisona'ḵ Peter si sinagung da tagu.

Sa Napuḵayan Peter Atte Babaḻḻudan

5Pun aḵ Peter inninggaw si babaḻḻudan yaḵon impapatin da namati ye nangiluwaḻu ḵan siya.

6Sa sadi ye labi si daan Herod angilawaan ḵan Peter ta maḵuwis, nasusuyop atte boot da duwae guwaḻdae naḵawadan imana si duwae ḵawad ḵan naguwaḻdaan atta suḻdadu si sawang ni babaḻḻudan.

7Baag-en nampaila anghel Apu woḵ nasilawan kuwartu we inggawan Peter. Pineḵpeḵ ni anghel aḵ Peter we namangon woḵ ḵanana, “Ganasom! Bumangonḵa!” Pun daguse naottag da ḵawad ni imana. 8Pun ḵanan ni anghel ḵan siya, “Ansilupḵa ya ansandalḵa.” Pun tinuttuwana woḵ ḵanan os ni anghel, “Iggam taḵḵop ni silupnu ya unudom saḵon.” 9Aḵ Peter ḵad, nitun-ud atte anghel we lummawa si babaḻḻudan. Ippun igammunae tuttuwa ḵingwan ni anghel yaḵon ḵananapun nu in-inop. 10Nilausanda ḵad de ummuna ya sa ḵumagwae guwaḻda, dummatongda si baḻyange lewangane umoyon atte siyudad. Nabuḵtan lawa lewangan woḵ lummawada. Anadtaddaḻanda ḵad si osae ḵaḻsa, baag-en tinenan ni anghel.

11Pune sadi nan-imonga ḵad aḵ Peter ḵanana, “Tuttuwa pagaye imbuun Apudyus anghelna'ḵ nangiligsi ḵan saḵon ta adiyaḵ gongaton ḵan Herod ya adi mituttuwa da losane ninamnaman da Judyu we ḵoonda ḵan saḵon.”

12Simsimmoḵna ḵad sana, ummoy si boḻoy da Mary ye inan John Mark, we sa madagudagupan da adu we tagu we alluwaḻu. 13Nanḵugḵug ḵad aḵ Peter si lewangan, sa sammilu we nangngadan aḵ Rhoda ummoy nangila. 14Immatunana gingan Peter, gapu'tte amode layadna adinapun binuḵtan lewangan woḵ nanoddaḵe ummoy nangibagae awad aḵ Peter we sisiḵad si lewangan.

15Ḵananda ḵan siya, “Nadong-ogḵa!” Yaḵon impatutna pagaye tuttuwa imbagana. Ḵananda, “Na anghelna nin.”

16Yaḵon aḵ Peter pinagapagatupanae nanḵugḵug. Binuḵtanda ḵad, inniladae siya woḵ nataagda. 17Pun sininyasan Peter dida ta giginnoḵda woḵ inug-uggudna inon Apudyus we nangilawa ḵan siya'tte babaḻḻudan. Pun ḵanana, “Ibagayu ḵan James#12:17 Sa de James atte annae verse sunud Jesus ya siya angipangpangu'tta magimugimunge namati'd Jerusalem. Sabali ye tagu we nangngadan aḵ James napatoye nangngadan aḵ James atte Acts 12:2. ya da udume susunud taḵu ḵan Kristu.” Pun ḵesan woḵ ummoy atta udume lugar.

18Bigbigat ḵad, nabanig da suḻdadu te ippun igammuda nu ngai naḵwa ḵan Peter. 19Pun impasngit Herod atta suḻdadu'ḵ Peter. Yaḵon adidapun ḵad naḵaodas, sinumaḻyan Herod da guwaḻda woḵ imbilinnae magongatda. Nagangput ḵad, tinenana probinsiya'd Judea woḵ ummoy inninggaw ad Caesarea.

Sa Natoyan Ari Herod

20Sa inninggawan Herod sidi, amod de sangana'tta tagu we iTyre ḵan iSidon. Yaḵon ḵingwan ḵad da umili, ummoyda inawis aḵ Blastus we osa'tta mataḻgodane sammilun ni ari ta an-os-ossaandae umoy maḵauḻnus si ari te sa ilina maḻpuwan ni ḵanonda.

21Dummatong ḵad aḻgawe inḵoddong Herod, nansilup si langgoyode silup di ari. Pun ummoy tummuḵdu si tronona woḵ nampalawag atta tagu. 22Naabus ḵad nampalawag, ḵanan da tagu we nanug-uy, “Daḵampun aḵ gingan di tagu yaḵon gingan di Apudyus!” 23Pune sadi, daguse dinusan ni anghel Apu'ḵ Herod te adinapun pinadayawan aḵ Apudyus woḵ ḵinan da ogos long-agna woḵ natoy.

24Yaḵon napagatupan niyasaḵ Ugud Apudyus woḵ ummaduadu da namati.

25Ginangput ḵad da Barnabas ḵan Saul ḵewaaḻda'd Jerusalem, nipaulida'd Antioch. Innawitda'ḵ John Mark.

Currently Selected:

Acts 12: kml

Highlight

Copy