Acts 10

Da Peter Si Boḻoy Da Cornelius

1Awad ad Caesarea tagu we nangngadan aḵ Cornelius, kapitan da suḻdadun da iRome we ngannonda Regiment da iyItaly. 2Naapudyusan losan da Cornelius we simbaḻyan ya isipogda'ḵ Apudyus. Allaayda'tta ḵapus ya patilayunda alluwaḻu ḵan Apudyus.

3Sin-ag-agawan ḵad, inninggaw impailan Apudyus ḵan siyae isun di in-inop. Innilana anghel Apudyus we nillumnoḵ atte boḻoyda woḵ ḵanana, “Cornelius!”

4Immumusḵoḻ Cornelius te naḵimtan woḵ ḵanana, “Apu, ngai ibagam?”

Ḵanan ni anghel, “Dingngoḻ Apudyus da luwaḻum ya inigammunae allaayḵa'tta ḵapus. 5Pun sinsadi, angibuunḵa'ḵ umoy ad Joppa angayag ḵan Simon we nangngadan aḵ Peter. 6Awade niḵamboḻoy aḵ ḵuwan da Simon we anḵoḵopya'ḵ laḻat ḵad sa boḻoyna awad si igid ni baybay.”

7Ummoyon ḵad anghel, inayagan Cornelius da duwae sammiluna ya sa osae suḻdadu we naapudyusan ya anserserbi ḵan siya. 8Imbagana ḵan dida da losane naḵwa woḵ imbuunna dida'd Joppa.

9Anna ḵade mumamatuḵ atte mabigat, da sadi ye nibuun inggawda si daḻan ya annae madam-anda'd Joppa, ummoy aḵ Peter nalluwaḻu si ampanade otop#10:9 Sa otop da boḻoy da tagu'tte annae timpu, maḵwae umoyda umillongan ḵan an-uugudan. ni boḻoyda. 10Nauḻat woḵ pionae angan yaḵon anna ḵade isaganada ḵaḵan, inggaw impailan Apudyus we isun di in-inop. 11Innilana'd langite nabuḵtan woḵ inninggaw isun di aḻwae lupute nauyude nataḵodan da opate dugyuna. 12Inninggaw da losane nankalakalasi ye ayam ad luta, nidoga da ḵumayam, da sissiwit ya da udume tumayap. 13Pun dingngoḻna gingae ḵanana, “Peter, sumiḵadḵa ta angisidaḵa si piom ḵanon.”

14Yaḵon ḵanan Peter, “Naid Apu! Naippun paat nanganaḵ atte ibelangni ye Judyu aḵ ḵaissaw.”#10:14 Maḵwa basaonyu'tte Leviticus chapter 11 mipanggob atta ayame ampoḻḵas ḵan ḵaissaw para'tta ganaḵ Israel.

15Ḵanan os ni ginga ḵasin ḵan siya, “Da pinapoḻḵas Apudyus, adim dida ibelang aḵ ḵaissaw.” 16Namiḵlu we naḵwa sadi woḵ baag-en nipangatu'd langit sadi ye luput.

17Ḵuttuḵuttumon ḵad Peter nu ngai pion ni inin-inopna ḵanan, nadanatong da imbuun Cornelius woḵ inimusda boḻoy Simon. Summiḵadda'tte lewangan, 18woḵ inimusda nu awad aḵ Simon we ngannonda Peter.

19Sissiya ḵade ḵuttuḵuttumon Peter nu ngai pion ni impailan Apudyus ḵanan, ḵanan ni Ispiritu Santu ḵan siya, “Peter annat da tuḻu we laḻaḵi ye singtonda siḵa. 20Lumogsadḵa, adiḵa ansuḵnae mibuḻun ḵan dida te saḵon nangibuun ḵan dida.”

21Pune sadi, lummogsad aḵ Peter woḵ ḵanana'tta sadi ye tuḻu, “Saḵon singtonyu. Ngai ḵad ain panggobyu we ummali sina?”

22Ḵananda, “Aḵ Kapitan Cornelius nangibuun ḵan diḵani'ḵ angayag ḵan siḵa te imbagan ni anghel Apudyus we ayagana siḵa ta dongngona da ibagam. Siya ḵad naun-unan ya isipogna'ḵ Apudyus ya mapatgan atta losane Judyu.” 23Pun minangilin Peter dida woḵ umiyanda sidi.

Mabigat ḵad, naḵalibbat aḵ Peter ḵan dida woḵ nibuḻun os da udume susunud ḵan Kristu we iJoppa. 24Mabigat ḵad os dummatongda'd Caesarea. Inuuway Cornelius dida woḵ inayagana da susunudna ya da buḻbuḻunna. 25Anna ḵade lumnoḵ aḵ Peter, ummoy Cornelius inabot woḵ nanalluḵu si sinagung Peter woḵ nandayaw ḵan siya. 26Yaḵon pinataḵdog Peter woḵ ḵanana, “Tumaḵdogḵa te saḵon ḵad, taguwaḵe isum.” 27Pun nillumnoḵda ḵade nan-ug-uggud, innilan Peter da adu we tagu we nadagup sidi, 28woḵ ḵanana ḵan dida, “Iniiggammuyu we sa ugalini ye Judyu, miyadi mitimpuyug ḵan maḵabuḻbuḻun ḵani'tta Gentil. Yaḵon impaigammun Apudyus ḵan saḵone ḵasapuḻane umadiḵ ibelang ngaimane tagu'ḵ ḵaissaw. 29Sa nampaayagam ḵan saḵon, ummaliyaḵe adiyaḵpun nansuḵna. Pun imusoḵ ud nu ngai gapunae impaayagaḵ.”

30Ḵanan Cornelius, “Opat aḻgaw ḵad naḻaḵpus si nalluwaḻuwaḵ atte sin-ag-agawan, natanaḵdog laḻaḵi ye sumilisiling silupna. 31Ḵanana ḵan saḵon, ‘Cornelius, dingngoḻ Apudyus luwaḻum ya insisimoḵna da ḵingwame allaayḵa'tta ḵapus. 32Pun sinsadi, angibuunḵa'ḵ umoy ad Joppa angayag ḵan Simon we nangngadan aḵ Peter. Awade niḵamboḻoy aḵ ḵuwan da Simon we anḵoḵopya'ḵ laḻat ḵad sa boḻoyna awad si igid ni baybay.’ 33Sana gapunae impaayagḵu siḵae dagus, ḵad ambaḻu ta annae ummaliḵa. Pun sinsadi anna ḵani si sinagung Apudyus ta andongoḻ ḵani'tta losane imbilin Apu ḵan siḵae paibagana.”

Sa Nangiwaḻagawagan Peter Atte Ambaḻu We Damag Ḵan Da Cornelius

34Pun insaḻad Peter we nan-ugud woḵ ḵanana, “Tuttuwae maawataḵe aḵ Apudyus ippun laḵlaḵsigona'ḵ tagu,#10:34 Deuteronomy 10:17. 35yaḵon awatona da ngaimane tagu, Judyu man baḵon nu Gentil we angisipog ḵan Apudyus ya ustu da ḵoonda. 36Igammuyu Ambaḻu we Damag we impaigammun Apudyus ḵan diḵani ye ganaḵ Israel. Impaigammun ni Ambaḻu we Damag ḵan ditaḵu inon ni allin-awae maḵabuḻbuḻunan taḵu ḵan Apudyus mipagapu ḵan Jesu Kristu we Apun da losane tagu. 37Inigammuyu bos da ampatoge naḵwa si intero we probinsiya'd Judea, nisaḻad atte probinsiya'd Galilee si nagangpute iwwaḻagawag John mipanggob atte bonyag. 38Igammuyu we dinutuḵan Apudyus aḵ Jesus we iNazareth ya innatodna Ispiritu Santu ya sa ḵabooḻana ta dinumane ayana, ḵoona da ambaḻu ya ḵinaanna da ampaḵaḻaman da nampaḵapaḵaḻamon Satan te anna'ḵ Apudyus ḵan siya. 39Ḵad diḵani ye apostol nanaḵdoḻ atta losane ḵingwana'd Jerusalem ya da udume ilin da Judyu. Impattoḻda'ḵ Jesus atte kros woḵ natoy. 40Yaḵon tinagun Apudyus ḵasin atte miḵaḵlu we aḻgaw woḵ nampaila ḵan diḵani. 41Daḵampun aḵ nampaila'tta losane tagu yaḵon ḵan diḵani ye pinilin Apudyus aḵ anaḵdoḻ ḵan siya, naḵaḵan ḵan naḵainum ḵani ḵan siya si nagangput ummuliyana. 42Binilinna diḵani ye iwaḻagawagni Ambaḻu we Damag mipanggob ḵan siya ya taḵdoḻanni ye siya dinutuḵan Apudyus aḵ anguwis atta matattagu ya da natoy. 43Da losane profetan Apudyus si awe, tinaḵdoḻanda mipanggob ḵan Jesus ta ngaimane amati ḵan siya mapakawan da basuḻda mipagapu'tte ngadanna.”

Sa Nangawatan Da Gentil Atte Ispiritu Santu

44Sissiya ḵade an-ugud aḵ Peter, ummoy Ispiritu Santu atta losane nandongoḻ atte ugudna. 45Nataag da namati ye Judyu we nibuḻun ḵan Peter te taḵon ay da Gentil naatod Ispiritu Santu ḵan dida. 46Te dingngoḻda didae nan-ugudda'tta nansabasabali ye ugud ya indaydayawda'ḵ Apudyus. Pun ḵanan Peter, 47“Inawat da annae tagu Ispiritu Santu we isun ni nangawatan taḵu. Awad ḵamman osa'ḵ angiyadi ye aditaḵupun bonyagan da annae tagu si danum?” 48Pun imbilin Peter we mabonyaganda si ngadan Jesu Kristu. Pun tinawidanda'ḵ Peter ta inggaw ḵan dida'ḵ adu we aḻgaw.

Currently Selected:

Acts 10: kml

Highlight

Copy