1 Corinthians 5

Sa Basuḻ Atte Gimung

1Awad de dingngoḻḵu we awad ḵanu osa ḵan diḵayu we nangwa'tte ḵababbaine taḵon ay da pagano adidapun patut ḵoon ḵaḵnat. Te dinagdagasana pigwae asawan amana. 2Ḵad sissiyae ansoḵaḻ ḵayu! Siya oḵyan ḵoonyu idomdomyu ḵababbaine naḵwa ta paḻyawonyu ḵaḵnate tagu'tte gimungyu. 3-4Te taḵon ay nu ippunaḵ sinat, awad de ispirituḵ ḵad isun di awadaḵ sinat, ḵinoddongaḵ sanate tagu we nangwa si ḵaḵnate lawweng. Nu magimung ḵayu, anna bos ispirituḵ ḵan diḵayu, ḵad sa ḵabooḻan Apu taḵu we Jesus awad os ḵan diḵayu. 5Ipuḻangyu sanate laḻaḵi ḵan Satan#5:5 Sa pion ni mipuḻang ḵan Satan ḵanan, ḵaanonta'tte gimung. Ilanyu bos si 1 Timothy 1:19-20 mipanggob ḵan Hymenaeus ya Alexander we nipuḻang os ḵan Satan. ta dadailona long-agna, ta matagu ispirituna'tte aḻgawe angulinan Apu.

6Daḵampun aḵ ambaḻu ansoḵaḻ ḵayu. Adiyupun ḵamman igammu we sa poose yeast pabotaḻona losan niḵamsanae arina? 7Ḵasapuḻane ḵaanonyu ugaliyu we mipani'tte yeast ta sa ugaliyu ambalin aḵ ampoḻḵas ḵasasaadyu si antotollong Apudyus. Ḵasapuḻane ḵoonyu ḵatti ta mipani ḵayu si ḵaḵ-utu we tinapaye ippun ḵamosna'ḵ yeast we mitoḵom nu ansida da Judyu atte karnero si Gayagayae ngannonda Nallausan.#5:7 Sa Gayagayae Nallausane gangganason da Judyu, sana angiḵagasmoḵanda si nangiligsiyan Apudyus atta danaḵḵoḻdae nammusassu'd Egypt atte timpun Moses. Nanggaḵay ḵad anghel we ummoy nangongat atta losane panguḻu we abenge laḻaḵi'd Egypt, nilausana da boḻoy da Judyu we naḵuan da lewanganda si daḻan ni ubbu we karnero Exodus 12. Sa daanda angisaḻdan atte gayagaya, imballuda da losane yeast atta boḻoy. Te aḵ Kristu mipani'tte sadi ye karnero te natoy ta puḵayana ditaḵu'tta basuḻ. 8Pun sa maḵagayagayaan taḵu, adi taḵu ḵanon tinapaye naḵamsan atte yeast. Sa pioḵ ḵanan ḵan ditaḵu we namati, adi taḵu unudon ugali yaḵon sa ambaḻu ḵan ḵatuttuwaane naippun lawweng aḵ niḵamos.

9Sa osae suḻatḵu ḵan diḵayu,#5:9 Awad de insuḻat Paul atta gimung ad Corinth we ummunae naḵwa, yaḵon adipun nibelang aḵ ummunae suḻat ḵan dida te ippun igammu taḵu nu ngai insuḻatna. imbagaḵe adi ḵayu maḵabuḻbuḻun atta tagu we adaḻugonda da daḵampun aḵ asawada. 10Yaḵon sa ibagaḵ daḵampun atta tagu we adipun namati ye maḵadagdagas, ḵamommod ya da aḵḵawan baḵon nu andayaw atta sinan-apudyus. Te nu adi ḵayu maḵabuḻbuḻun ḵan dida, ḵasapuḻane tenanyu annae lubung. 11Sa pioḵ ḵanan ḵan diḵayu, adi ḵayu maḵabuḻbuḻun atta ibelangda da long-agdae sunud taḵu ḵan Kristu yaḵon dida da angadaḻug atta daḵampun aḵ asawada, ḵamommodda, andaydayawda'tta sinan-apudyus, an-ugudda'ḵ lawweng atta udume tagu, da bartekero ya da tulisan. Ḵad taḵon ay ḵaḵan, adi ḵayu miyubung ḵan dida.

12-13Naippun biyang taḵu we anguwis atta daḵampun aḵ amati te aḵ Apudyus asi anguwis ya anusa ḵan dida. Yaḵon ditaḵu we namati, awad de ḵaḻabbongan taḵu we anguwis atta buḻun taḵu si gimung. Te sa ḵanan ni nigili'tte Ugud Apudyus, “Ḵasapuḻane paḻyawonyu angwa'ḵ lawweng atte gimungyu.”#5:12-13 Deuteronomy 17:7.

Currently Selected:

1 Corinthians 5: kml

Highlight

Copy