1 Corinthians 2

Sa Mipanggob Atte Natoyan Kristu

1Susunudḵu ḵan Kristu, sa ummaliyaḵ ḵan diḵayu sinate nangiwaḻagawag atte impaigammun Apudyus, adiḵpun inusar naadaḻome ugud ya ḵinalaing di tagu. 2Te simsimmoḵḵu we sa inninggawaḵ ḵan diḵayu, naippun udum aḵ intuttuduḵ yaḵon abus mipanggob ḵan Jesu Kristu ya sa nipattoḻana'tte kros. 3Sa inninggawaḵ ḵan diḵayu, anḵuya long-agḵu ya amilpilpilaḵ atte ḵimutḵu. 4Ḵad sa nantuttuduwaḵ ḵan nangiwaḻagawagaḵ ḵan diḵayu, adiḵpun inusar maḵaawise ugud ta mipaila ḵinalaing di tagu yaḵon mipaila ḵabooḻan ni Ispiritu Santu. 5Ta sa pammatiyu adipun mibatay atte ḵinalaing di tagu yaḵon sa ḵabooḻan Apudyus.

Sa Ḵinalainge Naḻpu Ḵan Apudyus

6Yaḵon awad de ḵinalainge ituttuduni'tta naangsan si pammati, daḵampun aḵ naḻpu'tte ḵinalaing da tagu si sanae timpu ya ḵinalaing da pangat si sanae timpu we amungtu ḵabooḻanda. 7Te sa nilimode ḵinalaing Apudyus we ibagabagani, siya simsimmoḵna si daan ni lubung maḵwaan ta midoga taḵu si ḵabaḻuwane antatagu ḵan Apudyus ad langit. 8Naippun naḵaawat atta pangat si sanae timpu. Te nu naawatanda oḵyan, adidapun impaipattoḻ ḵangatuwane Apu atte kros. 9Yaḵon sa ḵanan ni nigili ye Ugud Apudyus,

“Sa adimpun da tagu innila ya adidapun dingngoḻ

baḵon nu adidapun simsimmoḵ,

sadi insaganan Apudyus

para'tta angayat ḵan siya.”#2:9 Isaiah 64:4.

10Sana impaigammun Apudyus ḵan ditaḵu mipagapu'tte Ispirituna. Te sa Ispiritu Santu igammuna da losane banag taḵon ay da naadaḻome somsomoḵ Apudyus. 11Te naippun angigammu'tte awad si somsomoḵ ni tagu nu adi siyae mismu. Isuna ḵan Apudyus, naippun angigammu'tte somsomoḵna nu adi abus Ispirituna. 12Sinsadi ditaḵu we namati, daḵampun aḵ sa ispiritun da tagu we adipun namati inawat taḵu yaḵon sa Ispiritu we naḻpu ḵan Apudyus ta maawatan taḵu mipanggob atta losane innatod Apudyus ḵan ditaḵu gapu si ḵinabaḻuna. 13Pun sa angituttuduwanni daḵampun aḵ somsomoḵ baḵon nu ḵinalaing di tagu naḻpuwana yaḵon sa intuttudun ni Ispiritu Santu ḵan diḵani.#2:13 Sa pion ni udume saḻupati ḵanan atte Greek, sa ituttuduni, adinipun usaron ugude mibatay atte ḵinalaing di tagu nu adi sa ugude intuttudun ni Ispiritu Santu ḵan diḵani. Ipaḵaawatni mipanggob ḵan Apudyus atta tagu we igaw ni Ispiritu Santu. Ḵad ipaḵaawatni da naispirituwane ḵatuttuwaan atta tagunae inggawan ni Ispirituna. 14Yaḵon sa tagu we naippun Ispiritu Santu ḵan siya, adinapun awaton da ngaimane atode maḻpu'tte Ispiritu Santu te dinodong-og ḵan siya. Ḵad adinapun maawatan dida te abus da tagu we iinggawan ni Ispiritu Santu aḵ maḵaawat. 15Ḵad ngaimane iinggawan ni Ispiritu Santu, lamogna maawatan da ḵinapatog da losan. Yaḵon da udume tagu adidapun maawatan. 16Te sa ḵanan ni nigili ye Ugud Apudyus,

“Awad ḵamman angigammu si ḵasomsomḵan Apu

ta bagbagaana?”#2:16 Isaiah 40:13 Maila bos atte Romans 11:34.

Yaḵon anna somsomoḵ Kristu ḵan ditaḵu.

Currently Selected:

1 Corinthians 2: kml

Highlight

Copy