इब्रानियों 3

ईसु मूसा सुं बड़ो छ

1ह पवितर भायाओ थे ज्यो सरग का बलावा का सीरी छो, उं थरपेड़ा अर महायाजक ईसु माळ्अ ध्यान धरो, जीन्अ आपा चोड़्अ-धाड़्अ मान्या छा। 2वो उन्अ टाळबाळा परमेसर क ताणी बस्वासहाळो छो, जस्यान मूसा परमेसर का काम#3:2 काम परमेसर का लोगबागा न्अ मिसर सुं नखाळर ल्यायो वोई काम परमेसर को काम छ। मं बस्वासहाळो छो। 3जस्यान घर न्अ बणाबाळा न्अ घर सुं साउटो मान मल्अ छ, वस्यान ई ईसु बी मूसा सुं साऊटो आदरहाळो मान्यो गियो छ। 4क्युं क हरेक घर न्अ कोई न्अ कोई बणाव्अ छ, पण परमेसर'ई छ ज्यो सबळी चीजान्अ बणायो छ। 5मूसा परमेसर का घर मं एक सेवक की जस्यान बस्वासहाळो रियो छो। अर वो वा बाता की गुवाई छो ज्यांन्अ परमेसर खेबाळो छो। 6पण मसी छोरो होबा की बजेसुं परमेसर का घरको अधिकारी छ। अर आपा हिम्मत रांखा अर आपणी आस को भरोसो रांखा छा, तो आपां'ई बीको घर छा।

बेबस्वासी मनखा न्अ चेताबो

7जिसुं पवितर-आत्मा खेव्अ छ क;

“ज्यो आज थे परमेसर की आवाज सुणो,

8तो थे थांका मना न्अ कळ्डा मत करज्यो, जस्यान थांका आग्लाबड़ा परमेसर को बिरोध करबा क दन कर्या छा,

जस्यान उजाड़ थळा मं उं दन कर्या छा

जद्‍या वे परमेसर को अंथ्याम लिया छा।

9परमेसर खेव्अ छ क, थांका आग्लाबड़ा चाळीस बरस ताणी म्हारा काम देख्या

फेरबी म्हारा धीरज न्अ जांच्या अर परख्या,

10ई बजेसुं म उं पीढ़ी का मनखा सुं रोषा होर खियो छो क,

‘वाका मन सदाई भटकता रिया

अर वे म्हारा गेल्‍ला न्अ कोन जाण्या।’

11जद म रोषा मं आर सोगन्द खायो क,

‘वे कद्‍या बी उण्डअ कोन पूछ्अला जण्ढ्अ म वान्अ बसराम देऊलो!’”

12म्हारा भायाओ, साउचेत रेवो, क थाम्अ सुं अस्यान का कोई दुष्ट अर बेबस्वासी मन को कोन होव्अ, ज्यो जीवता परमेसर सुं आंतरअ हट जाव्अ। 13पण जद ताणी आजको दन खुवाव्अ छ, जद ताणी एक-दूसरा न्अ आमा-सामा हिम्मत बन्धावो, क कढ्अ थाम्अ सुं कोई पाप का छळबा मं आर खुदका हीया न्अ कळ्डो कोन करले। 14अर ज्यो आपा आपणा सरूवात का भरोसा माळ्अ आखरी ताणी मजबुती सुं बण्या रेवां जद्‍याई आपा मसी का सीरी होव्अला।

15जस्यान खेव्अ छ क,

“ज्यो थे आज बीकी आवाज सुणो,

तो थांका मन न्अ कळ्डो मत करो,

जस्यान थांका आग्लाबड़ा बिरोध करबा क दन कर्या छा।”

16परमेसर को बचन सुणर कुण बिरोध कर्यो छो? वे ज्यांन्अ मूसा मिसर मं सुं नखाळर ल्यायो छो। 17अर परमेसर कुण सुं चाळीस बरस ताणी रोषा रियो? कांई वाप्अ नई ज्यो पाप कर्या अर उजाड़ थळा मं मरग्या। 18अर वो कुण सुं सोगन्द खायो क थे म्हारा बसराम मं कोन जा पाव्अला? बस वांसु ज्यो परमेसर को खियो कोन्अ मान्या। 19अस्यान आपा देखां छा क, वे कोन उळ सक्या क्युं क वे बस्वास कोन कर्या।

Currently Selected:

इब्रानियों 3: डि एच डि

Highlight

Copy