أيث-روما 4
4
سِيذْنَا بْرَاهِيم ذ لْإِيمَان نّس
1إِيوَا مِين غَا نِينِي خ جدِّيثْنغ بْرَاهِيم؟ مِين ذَاس يوقْعن إِ نتَّا؟ 2مَعْلِيك نتَّا يسمْصْڒَاح-يث أَربِّـي اَكِذس عْلَاحْسَاب ڒخْذَايم نّس،#4.2 ذِي لْأَيَا-يَا ڒخْذَايم يخس اَذ يِينِي لْحَسَنَاث. أَتَاف بْرَاهِيم غَارس ڒْحَقّ إِي زِي غَا يفْتَخر زݣ يِيخف نّس وَلَكِن زَّاث إِ أَربِّـي لَّا. 3مَامش يقَّار لْكِتَاب:
<أُوْشَا يُوْمن بْرَاهِيم زِي أَربِّـي،
ئِكَّر أَربِّـي يسمْصْڒَاح-يث اَكِذس س لْإِيمَان نِّي.>
4فَا ونِّي غَا يݣّن شَان ڒْخذْمث، مَا يسْذَاهدْج اَخَاس يتْوَاخدْجس نِغ لَّا؟ وَاه، مَانَايَا ذ تخْڒِيسث نّس مَاشِي ذ كَادُو. 5ونِّي وَار يتْوكِّيڒن#4.5 ئِتوكِّيڒن يخس اَذ يِينِي يتْڬڒ. خ ڒخْذَايم إِݣ يتݣّ، ئِتْوكِّيڒ خ أَربِّـي يتَارَّان لْعَاصِي غَار وبْرِيذ، وَانِيتَا يسمْصْڒَاح-يث أَربِّـي اَكِذس س لإِيمَان إِي ذَايس.
6 نَّبِي دَاود ؤُڒَا ذ نتَّا، ئِسَّاوَاڒ خ سَّعْذ ن بْنَاذم وَامِي ث يسمْصْڒَاح أَربِّـي اَكِذس بْڒَا ڒخْذَايم. ئِقَّار:
7<سَّعْذ ن يِنِّي ؤُمي تْوَاغْفَارنْت سَّيِّئَاث نْسن،
تْوَامْحَانْت ڒْمُعْصِيَاث نْسن.
8سَّعْذ ن ونِّي وَار يتْحِيسِيب سِيذِي أَربِّـي
خ ڒْمُعْصِيَاث نّس.>
9أُو سَّعْذ-أَ، مَا ن يِنِّي وَاحذْسن يتݣّن طَّهَارث نِغ ؤُڒَا ذ يِنِّي وَار يتݣّن شَا طَّهَارث؟ شُوْف، نشِّين نقَّار: "أَربِّـي يسمْصْڒَاح بْرَاهِيم اَكِذس س لإِيمَان نّس." 10مڒْمِي إِي ث يسمْصْڒَاح اَكِذس؟ مَا قْبڒ مَا ٱذ يݣّ طَّهَارث نّس نِغ منْبَعْد مَا ت يݣّ؟ لَّا، مَاشِي منْبَعْد إِ طَّهَارث نّس وَلَكِين قْبڒ. 11ثُمَّا طَّهَارث-أَ ثُوْسَا-ٱس-د ذ يجّن ن لْعَلَامَا ذ يجّن ن دَّلِيل بلِّي أَربِّـي يسمْصْڒَاح-يث اَكِذس س لإِيمَان نِّي إِي تُوْغَا ذَايس قْبڒ مَا ٱذ يطهَّار. مَايمِّي مَانَايَا؟ بَاش اَذ يِيڒِي بْرَاهِيم ذ جدِّيثْسن ن يِنِّي مَارَّا يتَامْنن وَاخَّا وَار ݣِّين شَا طَّهَارث، بَاش ؤُڒَا ذ يِنِّي اَثن يسمْصْڒَاح أَربِّـي اَكِذس. 12أُو نتَّا ذ جدِّيثْسن عَاوذ ؤُڒَا ن يِنِّي يݣِّين طَّهَارث، وَلَكِن مَاشِي ݣِّين طَّهَارث أُو صَافِي. لَّا، ئِتْخصَّا-يَاسن اَذ ذفَّارن ڒَاثَار ن لْإِيمَان مَامش تُوْغَا يدْجَا غَار جدِّيثْنغ بْرَاهِيم وَامِي تُوْغَا عَاذ وَار يݣِّي بُو طَّهَارث.
أَربِّـي يوْعذ سِيذْنَا بْرَاهِيم اَغَارس يِيڒِي مِّيس
13ڒْعَهذ إِي زِي يوْعذ أَربِّـي بْرَاهِيم ذ دُّوْرِّيث نّس حمَا اَذ يوَارث نتَّا دُّنّشْت. ڒْعَهذ نِّي وَار د يُوْسِي شَا س شَّرِيعَا، يُوْسَا-د س لإِيمَان نِّي إِݣ يسمْصْڒَاحن يوْذَان اَك أَربِّـي. 14مَعْلِيك اَذ وَارْثن يِنِّي يذفَّارن شَّرِيعَا، أَتَاف لإِيمَان-أَ وَالُو، أَتَاف ڒْعَهذ-أَ يخْوَا. 15أَقَا شَّرِيعَا ن مُوْسَى تَاوِي-د لْعِقَاب ن أَربِّـي. وَلَكِن مَانِي وَار تِيڒِي شَا شَّرِيعَا وَار تِيڒِي شَا ذِنِّي ڒْمُعْصِيّث.
16س مَانَاينِّي ڒْعَهذ-أَ يبْنَا خ لإِيمَان وَاحْذس: حمَا ڒْعَهذ-أَ اَذ د يَاس زِي اَرْضَا نّس، حمَا اَث يضْمن أَربِّـي إِ مَارَّا دُّوْرِّيث ن بْرَاهِيم. أُو مَاشِي غِير ونِّي يذفَّارن شَّرِيعَا ن مُوْسَى؛ لَّا، ؤُڒَا ذ ونِّي يشَرّْشن ذِي لإِيمَان ن بْرَاهِيم. نتَّا ذ جدِّيثْنغ مَارَّا. 17مَامّش يقَّار لْكِتَاب: <أَرِّيغ-شك ذ جدِّيثْسن إِ وَاطَّاس ن ڒݣْنُوْس.>
ذِنِّي بْرَاهِيم زَّاث إِ أَربِّـي إِي زِي يتَامن، يعْنِي ونِّي د يسْنكَّرن يِنِّي يمُّوْثن، يعْنِي ونِّي د يخڒْقن مِين عمَّارْص وَار يدْجِين. 18وَاخَّا وَار ذِنِّي بُو لْأَمَال قَاع، يُوْمن بْرَاهِيم يݣَّا لْأَمَال. أَمنِّي إِي يذْوڒ ذ جدِّيثْسن إِ وَاطَّاس ن ڒݣْنُوْس مَامّش تُوْغَا ذَاس يتْوَانَّا زِي قْبڒ: <مِين يدْجَان ذ يثْرَان ذݣ وجنَّا اَمنِّي إِي غَا ثِيڒِي دُّوْرِّيث نّش.>
19ثُمَّا لإِيمَان نّس وَار ينْقِيص شَا وَاخَّا غَارس عْڒَاين مِيَّا ن يسݣّْوُسَا، وَاخَّا يسّن يخف نّس وَار يزمَّر شَا ثَمْغَارْث نّس سَارَا وَار تِيرو شَا. 20وَاخَّا اَمنِّي وَار ينْقِيص شَا لإِيمَان نّس، وَار يتْشكِّي شَا ذِي ڒْعَهذ نِّي إِي ذَاس يُوْشَا أَربِّـي. وَلَكِن يَرنِّي ذِي لإِيمَان نّس يحمّذ أَربِّـي، 21نتَّا أَقَاث متْأَكّد اَطَّاس أَربِّـي يزمَّر اَذ يكمّڒ خ ڒْعَهذ نّس. 22س مَانَايَا يسمْصْڒَاح-يث أَربِّـي اَكِذس.
23مَايمِّي يقَّار لْكِتَابَ قَا <أَربِّـي يسمْصْڒَاح-يث اَكِذس>؟ مَا يقَّار اَوَاڒ-أَ عْلَاحْسَاب بْرَاهِيم وَاحْذس؟ 24لَّا، يُوْرَا عَاوذ عْلَاحْسَاب نشِّين ؤُمِي ذَانغ يسمْصْڒَاح اَكِذس وَامِي زَّايس نُوْمن زِي أَربِّـي ونِّي إِي د يسكَّرن سِيذِيثْنغ عِيْسَى زِي ڒْموث. 25ئِتْوَاسلّم حمَا اَذ يمّث خ ڒْمُعْصِيَاث نّغ، ئِتْوَاسكَّر-د حمَا اَذَانغ يسمْصْڒَاح أَربِّـي اَكِذس.
Currently Selected:
أيث-روما 4: ريف
Highlight
Share
Copy
Want to have your highlights saved across all your devices? Sign up or sign in
