أيث-فيليـپـي 3
3
أَ نمْصْڒَاح اَك أَربِّـي س عِيْسَى لْمَسِيح
1ڒخُّو آي أَيثْمَا اَذ كمّْڒغ، فَرْحث س سِيذِيثْنغ! وَار غَارِي بُو لْمُشْكِل اَذَاوم عَوْذغ ثِمسْڒَايِين-أَ س ثِيرَا، كنِّيو عَاوذ اَزَّايْسنْت تْوَاحْضَام زِي لْخَطَر.
2حْضَام يخف نْوم زݣ يقْزِينن نِّي، يعْنِي يرْيَازن نِّي يتݣّن شَّرّْ يتْحجَّامن إِ بْنَاذم. 3شُوْف، ذ نشِّين إِݣ يدْجَان ذ طَّهَارث نِّي ن صَّح. يعْنِي نْعبّذ س أَرُّوْح ن أَربِّـي، غِير نْتفْتَخَر س عِيْسَى لْمَسِيح، وَار نتْرِيجِي شَا اَڒ لْحَسَانَات نّغ. 4إِيوَا ؤُڒَا ذ نش غَارِي سَّبَاب اَذ رَاجِيغ اَڒ لْحَسَانَات ينُو زَعْمَا. مڒَا ذِنِّي شَان يجّن غَارس سَّبَاب اَذ يرَاجَا اَڒ لْحَسَانَات نّس، أَتَاف نش غَارِي كْتَار زَّايس. 5مَايمِّي؟ نش تهَّارغ نْهَار وِيس ثْمنِيَّام. لْأَصل ينُو زِي أَيث-إِسْرَائِيل زِي أَيث-بنْيَامِين. نش ذ اَعِبْرَانِي مِّيس ن يعِبْرَانِيْين. عْلَاحْسَاب شَّرِيعَا، نش زِي ڒْحِزب نِّي ن يفَرِّيسِيْين. 6عْلَاحْسَاب زْعَامث ينُو نش تُوْغَا تْعدَّابغ جْمَاعث ن ڒْمُوْمِنِين ن لْمَسِيح. عْلَاحْسَاب لْقَوَانِين إِي يدْجَان ذِي شَّرِيعَا تُوْغَايِي س بْڒَا ڒْعِيب.
7وَلَكِن خ سَّبَاب ن لْمَسِيح مِين ذَايِي ينفّْعن قْبڒ، ڒخُّو حسّْبغ-ث ذ ثَخْصَارْث. 8ذ صَّح حسّْبغ ثِمسْڒَايِين-أَ قَاع ذ ثَخْصَارْث خ سَّبَاب ن لْقِيمَا ثَمقّْرَانْت بَاش اَذ سّْنغ عِيْسَى لْمَسِيح نتَّا ذ سِيذِي. خ سَّبَاب نّس إِي خْصَرغ ثِمسْڒَايِين-أَ قَاعِين، حسْبغ-ثنْت ذ زّْبڒ بَاش اَذ ربْحغ عِيْسَى لْمَسِيح. 9حمَا اَذَايِي اَفن ذَايس بْڒَا شَا ن صُّلْح اَك أَربِّـي إِي د يتَاسن زَّايِي نش وَاهَا عْلَاحْسَاب شَّرِيعَا. لَّا، صُّلْح نِّي ينُو اَك أَربِّـي يتَاس-د س لْإِيمَان ينُو زِي لْمَسِيح، يعْنِي صُّلْح نِّي يتَاس-د زِي أَربِّـي يتَاس-د س لْإِيمَان. 10رزُّوْغ اَذ سّْنغ لْمَسِيح ذ جّْهذ نّس وَامِي د يكَّر زِي ڒْموْث. أَذ سّْنغ عَاوذ ثَمْعَشَارْث نِّي خْمِي غَا نْشَرش اَكِذس س وعدّب نِّي إِي خَاس يكِّين نتَّا، أَ نذْوڒ اَمشْنَاو نتَّا س ڒْموْث نّس. 11أَمنِّي مَامش مَا يݣَّا، نش اَذ اَفغ يُوْم لْقِيَامَا اَذ يِيڒِي ينُو.
يَالَاهث أَ نْحَاوْڒث بَاش أَ نطّف مِين نْرزُّو
12وَار يدْجِي شَا صَافِي طّْفغ مَارَّا ثِمسْڒَايِين نِّي نِغ صَافِي وَار ذَايِي بُو شَا ن ڒْعِيب؛ لَّا، نش عَاذ تْحَاوَاڒغ اَذ طّْفغ ثِمسْڒَايِين نِّي إِي زِي ذَايِي يطّف عِيْسَى لْمَسِيح. 13آي أَيثْمَا، وَار حسّْبغ شَا صَافِي طّْفغ قَاع ثِمسْڒَايِين نِّي. وَلَكِن ذِنِّي يجّن ن ثْمسْڒَايْث تݣّغ-ت: تتُّوْغ مِين يتعْقَابن غَار ذفَّار، تݣّغ لْمجْهُوْد ينُو غَار مِين د يݣُّوْرن غَار زَّاث. 14تْحَاوَاڒغ خ مَانَاينِّي إِي خف رزُّوْغ بَاش اَذ ربْحغ لْجَائِزَا نِّي إِي زِي ذَايِي د يڒَاغَا أَربِّـي غَارس غَار وجنَّا س عِيْسَى لْمَسِيح. 15فَلِيهَاذَا مَارَّا نشِّين إِݣ يتمْغُوْرن ذِي لْإِيمَان يتْخصَّا أَ نفكَّر اَمنِّي. مڒَا كنِّيو وَار ثْفكَّرم شَا اَمنِّي ذ أَربِّـي إِي كنِّيو غَا يسْفهْمن. 16وَلَكِن مِين نسّن عَاذ نِيشَان لَابُد اَذَايس نطّف مْلِيح.
17آي أَيثْمَا، مُوْنث اَك يِنِّي يتݣّن اَم نش. خْزَرث مْلِيح غَار يِنِّي يݣُّوْرن ذݣ وبْرِيذ نّغ. 18لِأَنَّا ذِنِّي اَطَّاس ن يِنِّي يݣُّوْرن ذ ڒْعَذْيَان خ صَّلِيب ن لْمَسِيح. أَوَاڒ-أَ نِّيغ-اَوم-ث زِي قْبڒ، ڒخُّو تْعَوَاذغ-اَوم-ث س يمطَّاون ينُو. 19أَنݣَّارُو نْسن اَذ يتْوَامْحَا. أَربِّـي نْسن نتَّا ذ اَعدِّيس نْسن. سمْغَارن يخف نْسن س ڒفْضَايح نْسن. ڒَعْقُوْڒَاث نْسن نُّوْغن ذِي ثْمسْڒَايِين ن دُّنشْت-أَ. 20نشِّين لَّا، لْجِنْسِيَا نّغ اَقَات ذݣ وجنَّا. سّنِّي إِي د غَا يَاس ونِّي إِي نتْرَاجَا إِي ذَانغ غَا يسْنجْمن يعْنِي سِيذِيثْنغ عِيْسَى لْمَسِيح. 21دَّات نّغ ن دُّنشْت-أَ اَت يسْبدّڒ لْمَسِيح بَاش اَذ تِذْوڒ اَم دَّات نّس لْعَظِيم. ئِتݣّ مَانَايَا س جّْهذ نِّي إِي زِي يزمَّر اَذ يَارّ قَاع ثِمسْڒَايِين سْوَادَّاي إِ لْحُكم نّس.
Currently Selected:
أيث-فيليـپـي 3: ريف
Highlight
Share
Copy
Want to have your highlights saved across all your devices? Sign up or sign in
