2 تيموتاوس 2
2
أَخدَّام ن لْمَسِيح
1إِذن فَا شك آ مِّي، سْجهّذ يخف نّش ذِي اَرْضَا نِّي يدْجَان ذِي عِيْسَى لْمَسِيح. 2ثِمسْڒَايِين نِّي إِي ثسْڒِيذ زَّايِي زَّاث إ وَاطَّاس ن ڒشْهُوْذ، اجّ-يثنْت اَم يِجّن ن لْأَمَانَا اَك يرْيَازن اَتَاف ذَايْسن تِّقث، عَاوذ يرْيَازن نِّي زمَّرن اَذ سْڒمْذن يوْذَان نّغْنِي. 3إِڒِي اَكِذِي ذݣ وعدّب اَم وعسْكَارِي اَصبْحَان ن عِيْسَى لْمَسِيح. 4وَار ذِنِّي بُو شَان وعسْكَارِي إِݣ يتمْخُوْمْبُوْرن ذِي دُّوْر نّس ذِي ثْمسْڒَايِين ن دُّنشْت-أَ ڒَاحقَّاش يرزُّو اَذ يَارْضَا خ ونِّي إِي ث يَارِّين ذ اَعسْكَارِي. 5أَمنِّي عَاوذ ونِّي يتمْعَانَاذن ذِي لْملْعَب؛ مڒَا وَار يتمْعَانَاذ شَا عْلَاحْسَاب لْقَانُوْن وَار يربّح شَا لْجَائِزَا. 6أَفدْجَاح إِݣ يتَمَارن ذِي ڒْخذْمث أُو لَابُد اَذ ييْسِي ڒْحَقّ نّس نتَّا ذ اَمزْوَارُو زِي ثْفدْجَاحْث نِّي. 7فكَّر ذِي مِين ذَاش قَّارغ، أَقَا ذ سِيذِي أَربِّـي نتَّا إِي ش غَا يسفْهَامن ذِي مَارَّا ثِمسْڒَايِين-أَ.
8فكَّر ذِي عِيْسَى لْمَسِيح ونِّي إِي د يسكَّر أَربِّـي زِي ڒْموْث، نتَّا لْأَصل نّس زِي دَاود. ذ مَانَايَا إِݣ يدْجَان ذِي لْإِنْجِيل إِي تْبشَّارغ نش. 9خ لْإِنْجِيل-أَ إِي تْوَاعدَّابغ نش قنّن-اَيِي س سْنَاسڒ اَم يِجّن ن لْمُجْرِيم. وَلَكِن اَوَاڒن ن أَربِّـي لَّا، وَار زمَّرن اَثن قنّن س سْنَاسڒ. 10خ مَانَايَا نش صبَّارغ خ مَارَّا ثِمسْڒَايِين عْلَاحْسَاب يِنِّي يتْوَاخْضَرن حمَا ؤُڒَا ذ يِيْنَا اَذ نجّْمن س وفُوْس ن عِيْسَى لْمَسِيح، أَكِذس يجّن لْعَظَمَا إِي وَار يفنِّين شَا.
11أَقَا يجّن وَاوَاڒ ذَايس تِّقث:
مڒَا نمُّوْث اَكِذس،
أُوْشَا أَ ندَّر اَكِذس.
12مڒَا نصْبَر،
أُوْشَا أَ نحْكم اَكِذس.
مڒَا ننْكَر-يث،
أَوْشَا عَاوذ نتَّا اَذَانغ ينْكَر.
13مڒَا نسْمح نشِّين ذِي لْأَمَانَا نّغ،
مَاشِي اَذ يسْمح نتَّا ذِي لْأَمَانَا نّس،
مِينْزِي وَار يزمَّر اَذ ينْكَر يخف نّس.
أَخدَّام نِّي يدْجَان نِيشَان ن سِيذِي أَربِّـي
14سْفكَّر ڒْمُوْمِنِين خ ثْمسْڒَاِيِين-أَ. عْڒم-اَسن زَّاث إِ أَربِّـي بَاش وَار تْمنْغِين شَا خ وَاوَاڒن. أَمنْغِي نِّي وَار ذَايس وَالُو، غِير اَذ يسُوْفغ زݣ وبْرِيذ يِنِّي يتسْڒَان. 15اݣّ لْمجْهُوْد نّش بَاش اَذ تْسحْضَارذ يخف نّش غَار أَربِّـي اَم يِجّن غَارس يدْجَان مقْبُوْل، يعْنِي اَم يِجّن ن وخدَّام وَار غَارس مِينْخف إِي غَا يسذْحَا يتْفسَّار نِيْشَان اَوَاڒ ن لْحَقِيقَا.
16فَا اَوْݣّْوج زݣ وَاوَاڒن نِّي يخْوَان ن يِوْذَان ن دُّنشْت-أَ مِينْزِي اَوَاڒن نْسن اَذ ارْنِين غِير ذِي ڒقْفَاڒث نْسن خ أَربِّـي. 17أَوَاڒ نْسن اَذ يغزّ ذݣ ويْسُوْم اَم ڒهْرَاش ن سَّرَطَان، زَّايْسن حِمِّيْت ذ فِيْلِيْتُوْس. 18نِثْنِي فّْغن اَبْرِيذ ن لْحَقِيقَا قَّارن قَا صَافِي يُوْم لْقِيَامَا يوْقع، تْضيَّاعن لْإِيمَان ن ڒبْعَاض ن يِوْذَان. 19وَلَكِن دْسَاس يجهْذن ن أَربِّـي وَار يتنْهزِّي شَا، خَاس إِي نقْشنْت ثِيْرَا-يَا قَّارنْت قَا سِيذِي أَربِّـي قَا يسّن يوْذَان يدْجَان نّس. قَّارنْت عَاوذ قَا مَارَّا يِنِّي يشهّْذن س يِيسم ن سِيذِيثْنغ يتْخصَّا أُو لَابُد اَذ بعّْذن خ شَّرّْ.
20شُوْف، ئِجّن ن ثدَّارْث ثَصبْحَانْت وَار ذَايس شَا غِير ڒقْشُوْع ن دّْهب نِغ ذ نُّقَارْث وَاهَا؛ لَّا، ذَايس ؤُڒَا ذ ڒقْشُوْع ن ؤُكشُّوْض ذ ؤُشَاڒ. ڒبْعَاضِيث تْوَاسْتعْمَالن إِ مِين يدْجَان ذ شَّان، ڒبْعَاضِيث تْوَاسْتعْمَالن إِ مِين يدْجَان عَادِي وَاهَا. 21ونِّي يسِّيصْفَان يخف نّس زِي مَارَّا ثِمسْڒَايِين نِّي ثِعفَّانِين اَتَاف اَذ يِيڒِي اَم ڒقْشُوْع نِّي إِي تْوَاسْتعْمَالن إِ مِين يدْجَان ذ شَّان، نتَّا اَذ يِيڒِي يصْفَا اَذ يِيڒِي ينفّع إِ بَاب نّس، أَذ يِيڒِي يوْجذ إِ كُڒ ڒْخذْمث ثَصبْحَانْت.
22فَا ارْوڒ زِي شَّهَاوَاث نِّي ثِعفَّانِين ن ثمْࢲِي، ذفَّار صُّلْح ذ لْإِيمَان ذ ڒمْحِبّث ذ ڒهْنَا اَك يِنِّي إِي د يڒَاغَان خ سِيذِيثْنغ س يِجّن ن وُوْڒ يصْفَا. 23أَوْݣّْوج زݣ ؤُمْنَاقَار نِّي إِي ذِي يدْجَا غِير ثُوْبُوْهْڒِيَا ذ ڒقْفَاڒث وَاهَا مِينْزِي ثسّْنذ بلِّي يتَارو غِير اَمنْغِي أُو صَافِي.
24فَا اَخدَّام ن سِيذِيثْنغ لَابُد وَار يتْمنْغِي شَا س وَاوَاڒ اَطَّاس؛ ئِتْخصَّا-ٱس اَذ يِيڒِي ضْرِيف اَك مَارَّا يوْذَان، أَتَاف يسّن اَذ يسڒْمذ، أَتَاف غَارس تَّاسِع ن ڒْخَاضَر. 25أَذ يصحَّاح س يِجّن ن وُوْڒ يصبَّارن إِ يِنِّي إِي ذَاس يتْعَارَّاضن؛ حمَا مڒَا يخس أَربِّـي اَثن يجّ اَذ تُوْبن اَذ سّْنن لْحَقِيقَا. 26أُوْشَا اَذ د اَرّن ڒْبَاڒ نْسن اَذ اَروْڒن زِي ثخْشبْث ن إِبْڒِيس ونِّي إِي ثن يحبّْسن حمَا اَذ ݣّن ڒْخَاضَر نّس.
Currently Selected:
2 تيموتاوس 2: ريف
Highlight
Share
Copy
Want to have your highlights saved across all your devices? Sign up or sign in
