22 أيث-كورينث 6
6
1فَا نشِّين إِݣ يخدّْمن اَك أَربِّـي نْتتَّار إِ كنِّيو نقَّار-اَوم: مَاشِي اَذ تْقبّْڒم اَرْضَا ن أَربِّـي وَار زَّايس ثْخدّْمم شَا. 2أَقَا نتَّا يقَّار:
<وَامِي إِي خَافِي ثَارْضَا ڒْوقْث سْڒِيغ-اَش،
نْهَار نِّي ن وفكِّي عَاوْنغ-ش.>
هَاقَاش، ڒخُّو ذ ڒْوقْث إِݣ يَارْضَان خ أَربِّـي. هَاقَاش، ڒخُّو ذ نْهَار إِݣ يسنْجَامن.
3وَار نسْرُوْسِي وَالُو ذݣ وبْرِيذ إِ حَدّ بَاش اَث نغْضڒ حمَا وَار تِيفن بُو ڒْعِيب ذِي ڒْخذْمث نّغ. 4إِنَّمَا، نشِّين نتْقدَّام-اَوم يخف نّغ س مَارَّا مِينْزِي نشِّين ذ يخدَّامن ن أَربِّـي: يعْنِي نْصبَّر اَطَّاس؛ تكّنْت خَانغ ڒمْحَاين ذ تَمَارَا ذ وزِيَّار؛ 5نشِّين تْمَرَّاثن-اَنغ، تْحبَّاسن-اَنغ، تݣّن-اَنغ ڒْفَوْضَا؛ نشِّين نشَّاث تَمَارَا، نقِّيم ذِي دْجِيَاڒِي بْڒَا يضص، ندْجُوْز. 6نتْقدَّام-اَوم يخف نّغ س صّْفَا إِي غَارْنغ ذ ڒفْهَامث ذ تَّسِيع ن ڒْخَاضَر ذ ڒْخِير ذ أَرُّوْح يقدّْسن ذ يجّن ن ڒمْحِبّث بْڒَا نِّفَاق؛ 7س وَاوَاڒ ن لْحَقِيقَا ذ جّْهذ ن أَربِّـي ذ ڒسْنَاح ن ڒْحَقّ إِݣ يدْجَان ذݣ وفُوْسِي ذ وࢲرْمَاض. 8نتْقدَّام-اَوم يخف نّغ لِأَنَّا يوْذَان تْوقَّرن-اَنغ سْبهْدَاڒن-اَنغ؛ قَّارن ذَايْنغ ڒْبَاطڒ سمْغَارن-اَنغ؛ تَارَّان-اَنغ ذ يغشَّاشن وَلَكِن نشِّين وَار ذَاينغ بُو يخَرِّيقن؛ 9نكَّرن-اَنغ وَلَكِن نشِّين نتْوَاسّن مْلِيح؛ نتْمتَّا وَلَكِن نشِّين نْتدَّر؛ تْعَاقَابن-اَنغ وَلَكِن نشِّين وَار ذَانغ نقّن شَا؛ 10نشِّين نتْوَازيَّار وَلَكِن ڒبْدَا نفَرّح؛ نشِّين ذ يپُـوْبْرِيثن نْسرْبَاح اَطَّاس ن يِوْذَان؛ وَار غَارْنغ وَالُو وَلَكِن غَارْنغ كُڒْشِي.
11آي أَيث-كُوْرِينْث، نسِّيوڒ اَكِذْوم س مَارَّا صَّرَاحَا، ؤُڒَاون نّغ نُّوْرْزْمن اَطَّاس إِ كنِّيو. 12ڒمْحِبّث نّغ وَار خَاوم ت نْتغْلِيق شَا نشِّين، ذ كنِّيو إِي خَانغ ت يتغْلَاقن. 13سَّاوَاڒغ اَكِذْوم اَم ثَارْوَا ينُو. إِيوَا جّث وَاخَّا ذ ؤُڒَاون نْوم اَذ نُّوْرْزْمن اَطَّاس اَم نشِّين.
وَار شَرّْشم شَا اَك يِنِّي وَار يُوْمِينن شَا
14وَار تݣّث خَاوم ثْزَايْڒُوْت#6.14 ثْزَايْڒُوْت نتَّاث ذ ثْزَاݣْڒُوْت. تݣّن-تث خ يِيڒَاون ن يفُوْنَاسن يجّن ن نْهَار شرّْزن زَّايس. اَك يِنِّي وَار يُوْمِينن شَا، وَار تِيڒِيث شَا ذ ثِيُوْيَا#6.14 ثِيُوْيَا نتَّاث ذ ثِيُوْݣَا. اَكِذْسن. مَا ذِنِّي شَا ن ڒْحَاجث إِݣ يشَرّش ڒْحَقّ اَك ڒْبَاطڒ؟ لَّا. مِين يشَرّش نُّوْر اَك ثَادْجسْت؟ وَالُو. 15مَا ذِنِّي شَا ن ڒْحَاجث كِيف-كِيف جَار لْمَسِيح ذ إِبْڒِيس؟ لَّا. مَا ذِنِّي شَا ن ڒْحَاجث ثشَرّش جَار ڒْمُوْمن ذ ونِّي وَار يُوْمِينن شَا؟ وَالُو. 16مِين ثْشَرّش ثمْزِيذَا ثَمقّْرَانْت ن أَربِّـي اَك لْأَصْنَام؟ وَالُو. شُوْف، نشِّين إِي يدْجَان ذ ثَمْزِيذَا ن أَربِّـي يدَّرن. أَمنِّي يقَّار أَربِّـي:
<نش اَذ زذْغغ اَكِذْسن اَذ ؤُيُوْرغ جَارَاسن،
أَذ يڒِيغ ذ أَربِّـي نْسن،
نِثْنِي اَذ يڒِين ذ شَّعْب ينُو.
17خ مَانَايَا يقَّار سِيذِي أَربِّـي:
فّْغم-د زِي ڒْوسْط نْسن عزْڒث يخف نْوم،
وَار تْحَاذَاث شَا مِين يدْجَان حَرَام.
أُوْشَا نش اَكنِّيو قبْڒغ،
18أَذ يڒِيغ ذ بَابَاثْوم،
كنِّيو اَذ تِيڒِيم ذ ثَارْوَا ينُو ذ يِيسِّي ينُو.
أَمنِّي يقَّار أَربِّـي يزمَّرن إِ كُڒْشِي.>
Currently Selected:
22 أيث-كورينث 6: ريف
Highlight
Share
Copy
Want to have your highlights saved across all your devices? Sign up or sign in
