1 أيث-كورينث 10
10
ثَغنَّانْت ن أَيث-إِسْرَائِيل نتَّاث ذ يجّن ن لْعِبْرَا إِ نشِّين
1شُوْف آي اَيثْمَا، وَار خْسغ شَا اَذ تتُّوْم بلِّي ڒجْذُوْذ نّغ تُوْغَاثن قَاعِين سْوَادَّاي إِ وسيْنُو#10.1 أَيث-إِسْرَائِيل وَامِي اَروْڒن زِي مِصْرَا، سِيذِي أَربِّـي يݣُّوْر غَار زَّاث نْسن اَمشْنَاو يج وسيْنُو. أَسيْنُو نِّي تُوْغَاث اَم يِجّن ن وپِـيلَار يسظْهَار-اَسن-د اَبْرِيذ س وزِيڒ. س دْجِيڒث تُوْغَاث اَمشْنَاو يجّن ن ثْمسِّي، ثِمسِّي نِّي تݣّ-اَسن ثْفَاوْث حمَا اَذ ؤُيُوْرن س دْجِيڒث ذ وزِيڒ. أَسيْنُو نِّي ذ ثْمسِّي نِّي س ثْنَاين إِذْسن تُوْغَاثن قِّيمن ذِنِّي ڒبْدَا غَار زَّاث إِ أَيث-إِسْرَائِيل. نِّي يحطَّا-ثن. مَارَّا نِثْنِي ࢲْوَان غَار ؤُجمَّاض-ين ن ڒبْحَر اَزݣّْوَاغ.#10.1 وَامِي اَروْڒن أَيث-إِسْرَائِيل زِي مِصْرَا، ؤُوْضن غَار ڒبْحَر اَزݣّْوَاغ اَبْرِيذ نْسن يبلّع عْڒَاين اَخَاسن د حڒْثن ڒْعَسْكَار ن مِصْرَا. ڒخْدّنِّي يكَّر سِيذْنَا مُوْسَى يسَرّح فُوْس نّس غَار وجنَّا ن ڒبْحَر نِّي يسّكّ-د سِيذِي أَربِّـي اَسمِّيض ذ شَّرْقِي يجْهذ يَارَّا ڒبْحَر اَڒ ثْشَرْمِين، س دْجِيڒث نِّي يَارِّي-ث ذ ثَمُوْرْث ثُوْزغ. ئِقِّيم ڒبْحَر نِّي ينْفْرق خ ثْنَاين، ࢲْوَان أَيث-إِسْرَائِيل ذِي ڒْوسْط خ ثْمُوْرْث نِّي يُوْزْغن. أَمَان ذوْڒن اَمشْنَاو ثْنَاين ن ڒحْيُوْض يجّن خ وࢲڒْمَاض يجّن خ وفُوْسِي. 2مَارَّا نِثْنِي تْوَاطهَّارن س وَامَان عْلَاحْسَاب مُوْسَى وَامِي عْذُوْن ذݣ وسيْنُو نِّي ذ ڒبْحَر نِّي. 3مَارَّا نِثْنِي شِّين زݣ يِجّن ن لْمَكْلَا رُوْحِيَا. 4مَارَّا نِثْنِي سْوِين زݣ يِجّن ن ثْسسِّي رُوْحِيَا. لِأَنَّا نِثْنِي سْوِين زݣ وغْبَاڒ نِّي ن وزْرُو#10.4 أَيث-إِسْرَائِيل وَامِي صَافِي اَروْڒن زِي مِصْرَا قِّيمن ؤُݣُّوْرن ذِي ڒخْڒَا، وَار ؤُفِين مِين غَا سْون قِّيمن يوْذَان تْشثْشَان خ سِيذِي أَربِّـي ذ سِيذْنَا مُوْسَى. ئِيْسِي سِيذْنَا مُوْسَى ثَغْرِيث نّس زَّاث إِ سِيذِي أَربِّـي مَامّش ث يُوْمَر. ئِكَّر سِيذْنَا مُوْسَى ذ ؤُمَاس هَارُوْن يجْمع-د شَّعْب زَّاث إِ يِجّن ن وزْرُو ذ اَمقّْرَان ينَّا-ٱسن سِيذْنَا مُوْسَى: "صنّْطم آ يِنِّي وَار يتݣّن شَا اَرَّاي إِ أَربِّـي، مَا يتْخصَّا-يَانغ اَذَاوم د نْسُوْفغ اَمَان زݣ وزْرُو-يَا؟" ڒخْدّنِّي يسِيڒِي سِيذْنَا مُوْسَى فُوْس نّس يُوْوْثَا اَزْرُو نِّي مَرّْثَاين يذْوڒ ذ اَغْبَاڒ. دُوْقْزن زَّايس وَامَان اَطَّاس، سْوِين شَّعْب ذ ڒكْسِيبث نْسن زݣ وغْبَاڒ ن وَامَان نِّي. رُوْحِيَا إِي ثن يذفَّارن، أَغْبَاڒ نِّي ن وزْرُو تُوْغَاث نتَّا ذ لْمَسِيح. 5وَاخَّا اَمنِّي ڒبْعَاض زَّايْسن وَاهَا مِيخف يَارْضَا أَربِّـي، ينّغْنِي منْضَارن ذِنِّي ذ يمُّوْرْضَاس ذِي ڒخْڒَا نِّي.
6ثِمسْڒَايِين-أَ وقْعنْت ذ يجّن ن لْعِبْرَا إِ نشِّين. مَايمِّي؟ بَاش وَار ذَايْنغ يتِيڒِي مزْڒِي خ شَّرّْ مَامّش تُوْغَا شهَّان نِثْنِي. 7وَار عبّْذث شَا لْأَصْنَام مَامّش ݣِّين ڒبْعَاض زَّايْسن. مَامّش يقَّار لْكِتَاب: <ئِوْذَان نِّي قِّيمن اَذ سْون اَذ شّن، أُوْشَا كَّرن اَذ زْهُوْن.> 8ئِتْخصَّا وَار نْفسّذ شَا مَامّش ݣِّين ڒبْعَاض زَّايْسن، مُّوْثن وْضَان غَار ثْمُوْرْث شَان ثْڒَاثَا أُو عِشْرِين اَڒَاف زَّايْسن ذݣ يِجّن ن نْهَار. 9ئِتْخصَّا وَار نْزعّم شَا أَ نْࢲر مِين غَا يݣّ لْمَسِيح، مَامّش ݣِّين ڒبْعَاض زَّايْسن أُوْشَا تْوَانْغن س يفِيغرَان. 10ئِتْخصَّا وَار نتْشثْشَا شَا مَامّش ݣِّين ڒبْعَاض زَّايْسن وَامِي خَاسن يقْضَا عَزْڒَاين.
11وقْعنْت-اَسن ثِمسْڒَايِين-أَ ذ يجّن ن لْعِبْرَا إِ نشِّين. زمّْمن-ثنْت حمَا اَزَّايْسنْت نڒْمذ نشِّين، يعْنِي خضْڒنْت-يد خَانغ اَڒ ونݣَّارُو-يَا ن زْمَانَاث. 12س مَانَايَا ونِّي ؤُمِي يتْغِيڒ-اَس قَا يبدّ وَار يوطِّي شَا، ئِتْخصَّا-يَاس اَذ د يَارّ ڒْبَاڒ نّس. 13ثِمسْڒَايِين نِّي ثِنِّي إِݣ يتِيڒِين ڒبْدَا اَك بْنَاذم ذ ثِنِّي إِي كنِّيو يتْغَارَّان. أُو أَربِّـي نتَّا ذَايس تِّقث، وَار كنِّيو يتجِّي شَا اَذ تْوَاغَارَّام س مِين وَار ثْزمَّرم اَذ تصْبَرم؛ لَّا، أَذَاوم يذبَّر يجّن ن ثوَّارْث حمَا اَذ تصْبَرم إِ مَانَاينِّي.
14س مَانَاينِّي آي يمْعِيزّن ينُو، اَروْڒث زِي لْأَصْنَام. 15سَّاوَاڒغ اَكِذْوم غَارْوم ڒَعْقڒ نْوم، ميّْزث مِين قَّارغ مَا ذ صَّح مَا لَّا. 16ڒْكَاس نِّي ن لْبَرَكَا إِي زِي نتْبَرَاك نشِّين، زَّايس إِي نْشَرّش ذݣ يذَامّن ن لْمَسِيح. أَغْرُوْم نِّي إِي نتْرزَّا، زَّايس إِي نْشَرّش ذِي دَّات ن لْمَسِيح. 17ذِنِّي يجّن ن ثْخبَّاسْت ن وغْرُوْم وَاحْذس، س سَّبَاب-أَ نشِّين ذ يجّن، وَاخَّا ذِنِّي اَطَّاس إِي إِذْنغ. مِينْزِي نشِّين مَارَّا إِذْنغ نْشَرّش ذݣ يِجّن ن ثْخبَّاسْت. 18فكَّرث ذِي أَيث-إِسْرَائِيل، يَاك يِنِّي يتتّن دْبِيحَاث نِثْنِي شَرّشن ذِي ڒْمذْبَاح نِّي، نِغ لَّا؟ 19مِين خْسغ نش اَذ ينِيغ؟ مَا قَّارغ بلِّي لْمَكْلَا نِّي يتْقدَّامن إِ لْأَصْنَام نتَّاث ذ شَا ن ڒْحَاجث؟ نِغ قَّارغ بلِّي لْأَصْنَام نِثْنِي ذ شَا ن ڒْحَاجث؟ 20لَّا، وَلَكِن قَّارغ بلِّي مِين غَرّْصن لْكُفَّار ذ دْبِيحَاث تْقدَّامن-ثنْت إِ شَّيَاطِين مَاشِي إِ أَربِّـي. نش وَار خْسغ شَا اَكِذْسن ثْشَرْشم اَك شَّيَاطِين. 21وَار ثْزمَّرم شَا اَذ تسْوم زِي ڒْكَاس ن سِيذِيثْنغ نِغ زِي ڒْكَاس ن شَّيَاطِين س ثْنَاين إِذْسن. وَار ثْزمَّرم شَا اَذ تْشَرْشم ذِي مِيسَّا ن سِيذِيثْنغ ذ مِيسَّا ن شَّيَاطِين س ثْنَاين إِذْسنْت. 22مَا نْرزُّو أَ نسْعصّب سِيذِيثْنغ س لْغِرَا؟ نِغ مَا نجْهذ خَاس نشِّين؟
لْحُرِّيَا ن ڒْمُوْمِنِين
23مَارَّا ثِمسْڒَايِين حدْجْڒنْت، وَلَكِن مَاشِي مَارَّا ثِمسْڒَايِين تسْتنْفَاعنْت. مَارَّا ثِمسْڒَايِين حدْجْڒنْت، وَلَكِن مَاشِي مَارَّا ثِمسْڒَايِين اَذَانغ سْجهْذنْت. 24وَار رزُّوْث شَا ڒْخِير إِ يِيخف نْوم، رْزُوْم-ث إِ وَاجَّار نْوم. 25شّث مِين مَا ثُوْفِيم يتْمنْزَا ذِي سُّوْق ن يݣزَّارن، وَار تْسقْسَام شَا جّث ضَّمِير نْوم مرْتَاح. 26لِأَنَّا يقَّار: <ثَمُوْرْث-أَ نتَّاث ذ مَارَّا مِين ذَايس ن سِيذِي أَربِّـي.>
27مڒَا شَان يِجّن مَاشِي ذ ڒْمُوْمن يعَرض-يكنِّيو بَاش اَذ تشّم اَكِذس أُو كنِّيو ثْرزُّوْم اَذ تْرَاحم، شّث مِين مَا ثُوْفِيم سرْسن-ت زَّاث نْوم وَار تْسقْسَام شَا، جّث ضَّمِير نْوم مَرْتَاح. 28وَلَكِن مڒَا ينَّا-ٱوم حَدّ قَا مَانَايَا قدّْمن-ث ذ دْبِيحث إِ لْأَصْنَام، وَار ت تتّم شَا. مَانَايَا عْلَاحْسَاب ونِّي إِي ذَاوم ث يقَّارن أُو عْلَاحْسَاب ضَّمِير. 29يعْنِي ضَّمِير ن ونِّي إِي كنِّيو يعَرْضن، مَاشِي ذ ضَّمِير نْوم. ڒَاحقَّاش نش مَايمِّي ضَّمِير ن يِجّن نّغْنِي اَذ يحْكم خ لْحُرِّيَا ينُو؟ 30مڒَا شكَّرغ أَربِّـي خ شَان لْمَكْلَا، مَايمِّي إِي ذَايِي غَا حَاسْبن خ مَانَاينِّي إِي زِي شكَّرغ أَربِّـي؟
31إِذن، مڒَا ثْسسّم نِغ تتّم نِغ مِين مَا تݣّم، ݣّث مَارَّا مَانَاينِّي بَاش اَذ يتْوَاسمْغَار أَربِّـي. 32وَار غطّْڒث حَدّ وَاخَّا نِثْنِي ذ يسْرَائِيْلِيْين نِغ ذ ييُوْنَانِيْين نِغ ذ جْمَاعث ن ڒْمُوْمِنِين ن أَربِّـي. 33نش رزُّوْغ اَذ سَارْضِيغ مَارَّا يوْذَان ذِي مَارَّا مِين تݣّغ. وَار رزُّوْغ شَا ڒْخِير إِ يِيخف ينُو، رزُّوْغ-ث إِ مَارَّا يوْذَان بَاش اَذ نجْمن.
Currently Selected:
1 أيث-كورينث 10: ريف
Highlight
Share
Copy
Want to have your highlights saved across all your devices? Sign up or sign in
