1 أيث-كورينث 1
1
أَرَّسُوْل بُوْلُس يتْسدْجَام خ جْمَاعث ن ڒْمُوْمِنِين ذِي ثنْدِينْت ن كُوْرِينْث
1 ثَبْرَات-أَ زَّايِي نش بُوْلُس اَكِذِي ؤُمَاثْنغ سَاسْتِين. ئِڒَاغَا-ٱيِي-د أَربِّـي س ڒْخَاضَر نّس حمَا اَذ يڒِيغ ذ اَرَّسُوْل ن عِيْسَى لْمَسِيح. 2نتْسدْجَام خَاوم كنِّيو إِي يدْجَان ذ جْمَاعث ن ڒْمُوْمِنِين ن أَربِّـي ذِي ثنْدِينْت ن كُوْرِينْث. تْوَاسِّيصْفَام ذِي عِيْسَى لْمَسِيح، تْوَاخْضَرم بَاش اَذ تِيڒِيم ذ صَّالِحِين اَك مَارَّا يِنِّي يتْڒَاغَان خ يِيسم ن سِيذِيثْنغ عِيْسَى لْمَسِيح ذِي مَارَّا يمُوْشَان. نتَّا ذ سِيذِيثْنغ ذ سِيذِيثْسن. 3أَكِذْوم يِيڒِي اَرْضَا ذ ڒهْنَا زِي أَربِّـي بَابَاثْنغ ذ عِيْسَى لْمَسِيح سِيذِيثْنغ.
4تْشكَّارغ أَربِّـي خَاوم ڒبْدَا خ اَرْضَا إِي ذَاوم يُوْشَا ذِي عِيْسَى لْمَسِيح. 5زِي نتَّا، يتْوَارْنِي-يَاوم ڒْخِير ذِي كُڒْشِي، يعْنِي ذِي مَارَّا اَوَاڒن ذ ثُوْسْنَا.#1.5 ثُوْسْنَا نتَّاث ذ لْمَعْرِيفَا. 6ذَايْوم كنِّيو إِي د يسْمظْهَار أَربِّـي لْحَقِيقَا خ شْهَاذث نّغ خ لْمَسِيح. 7س مَانَايَا وَار ذَاوم ثْنقِّيص ؤُڒَا ذ يجّن ن لْقُدْرَا رُوْحِيَا خْمِي تْرَاجَام اَذ د يمظْهَار سِيذِيثْنغ عِيْسَى لْمَسِيح. 8ذ نتَّا إِي كنِّيو غَا يسْبدّن غَار ونݣَّارُو اَتَاف وَار ذَايْوم يتِيڒِي بُو ڒْعِيب ذِي نْهَار نِّي ن سِيذِيثْنغ عِيْسَى لْمَسِيح. 9أَربِّـي ذَايس تِّقث، زَّايس إِي ذَانغ د يُوْسَا ؤُڒَاغِي أَ نْعَاشَر ممِّيس يعْنِي سِيذِيثْنغ عِيْسَى لْمسِيح.
ڒْمُوْمِنِين ذِي كُوْرِينْث غَارْسن لْخِلَاف جَارَاسن
10فَا تتَّارغ زَّايْوم آي اَيثْمَا س يِيسم ن سِيذِيثْنغ عِيْسَى لْمَسِيح، مْسفْهَامث اَك وَايَاوْيَا حمَا وَار يتِيڒِي بُو لْخِلَاف جَارَاوم. ئِتْخصَّا كنِّيو اَذ تِيڒِيم كِيف-كِيف ذِي ڒَعْقُوْڒَاث نْوم ذ اَرَّاي نْوم. 11آي اَيثْمَا، أَرِّيغ-د ڒخْبَار زِي ثدَّارْث ن كْلُوِي تْمنْغَام جَارَاوم. 12يعْنِي، ئِجّن يقَّار نش ذفَّارغ بُوْلُس. ئِجّن يقَّار نش ذفَّارغ أَپُّــوْلُّوْس. ئِجّن يقَّار نش ذفَّارغ بُطْرُس. ئِجّن يقَّار نش ذفَّارغ لْمَسِيح.
13لْمَسِيح مَا ذَايس لْفِرْقَاث؟ لَّا! مَا ذ بُوْلُس يتْوَاصلّْبن خ صَّلِيب عْلَاحْسَاب كنِّيو؟ لَّا! مَا ثتْوَاطهَّارم كنِّيو س وَامَان س يِيسم ينُو بُوْلُس؟ لَّا! 14-15تْشكَّارغ أَربِّـي وَار طهِّيرغ ؤُڒَا ذ يجّن زَّايْوم س وَامَان إِلَّا كْرِيْسْبُوْس ذ غَايُوْس حمَا وَار يقَّار حَدّ قَا يتْوَاطهَّار س وَامَان عْلَاحْسَاب يسم ينُو. 16(وَاه، نش طهَّارغ س وَامَان إِ ڒحْبَاب ن سْتِيفَانُوْس. وَار عْقِيڒغ شَا مَا طهَّارغ إِ حَدّ نّغْنِي س وَامَان كْتَار زݣ يِيْنَا.) 17لِأَنَّا لْمَسِيح وَار ذَايِي د يسّكّ شَا حمَا اَذ طهَّارغ إِ يِوْذَان س وَامَان؛ لَّا، نش يسّكّ-اَيِي-د اَذ بشَّرغ س لْإِنْجِيل وَلَكِن مَاشِي س ڒفْهَامث نِّي ن وَاوَاڒن يزوّْقن. مَايمِّي؟ بَاش جّْهذ إِي يدْجَان ذِي صَّلِيب ن لْمَسِيح وَار يتْبطِّيڒ شَا.
لْمَسِيح نتَّا ذ ڒفْهَامث ذ جّْهذ ن أَربِّـي
18شُوْف، أَوَاڒ ن صَّلِيب نتَّا ذ ثُوْبُّوْهْڒِيَا وَاهَا غَار يِنِّي وَار ينجّْمن شَا، وَلَكِن غَار نشِّين ينجّْمن اَوَاڒ-أَ نتَّا ذ جّْهذ ن أَربِّـي. 19لِأَنَّا يقَّار لْكِتَاب:
<ڒفْهَامث ن يِنِّي يتفْهَامن اَت هذْمغ.
ڒفْطَانث ن يِنِّي يفطّْنن اَت سْفشْڒغ.>
20ونِّي يتفْهَامن زَعْمَا، ڒخُّو مَانِي يدْجَا؟ أَمْسڒْمَاذ ن شَّرِيعَا زَعْمَا، ڒخُّو مَانِي يدْجَا؟ لْفِيْلَسُوْف ن ڒْوقْث-أَ زَعْمَا، ڒخُّو مَانِي يدْجَا؟ يَاك أَربِّـي يسْبُوْهڒِي ڒفْهَامث ن يِوْذَان ن دُّنشْت-أَ ثَانِيتَا؟ 21ئِسْبُوْهڒِي-ت س ڒفْهَامث ن مِين نتْبشَّار نشِّين. مَامّش؟ س ڒفْهَامث-أَ ن أَربِّـي يعْجب-اَس اَذ يسنْجم يِنِّي يتَامْنن، وَلَكِن يوْذَان ن دُّنشْت-أَ وَار زمَّرن اَث سّْنن س ڒفْهَامث نْسن. 22نِثْنِي يسْرَائِلِيْين تتَّارن لْمُعْجِيزَاث، ذ يِنِّي وَار يدْجِين زِي أَيث-ئِسْرَائِل رزُّوْن ڒفْهَامث، 23وَلَكِن نشِّين نتْبشَّار س لْمَسِيح يتْوَاصلّْبن. ئِسْرَائِيلِيْين تْنقْڒَاضن ذِي مَانَايَا، ذ يِنِّي وَار يدْجِين شَا زِي أَيث-إِسْرَائِيل قَّارن قَا مَانَايَا ذ ثُوْبُّوْهْڒِيَا وَاهَا. 24وَلَكِن إِ يِنِّي ؤُمِي د يڒَاغَا أَربِّـي، يعْنِي يسْرَائِلِيْين ذ يِنِّي وَار يدْجِين شَا زِي أَيث-إِسْرَائِيل، لْمَسِيح نتَّا ذ جّْهذ ن أَربِّـي ذ ڒفْهَامث نّس. 25مَايمِّي؟ لِأَنَّا زَعْمَا ثُوْبُّوْهْڒِيَا ن أَربِّـي نتَّاث ثْسفْهَام كْتَار زِي ڒفْهَامث ن بْنَاذم، زَعْمَا ضُّوْعف ن أَربِّـي نتَّا يجْهذ كْتَار زِي جّْهذ ن بْنَاذم.
26آي اَيثْمَا، فكَّارث ذِي مِين تُوْغَا ثدْجَام قْبڒ وَامِي ذَاوم د يڒَاغَا إِ كنِّيو أَربِّـي. مَاشِي اَطَّاس إِذْوم إِي ذِي تُوْغَا ثدْجَا ڒفْهَامث عْلَاحْسَاب مِين قَّارن يِوْذَان. مَاشِي اَطَّاس إِذْوم كنِّيو غَار تُوْغَا ثدْجَا لْمَرْتَبَا. مَاشِي اَطَّاس إِذْوم كنِّيو لْأَصل نْوم تُوْغَاث زݣ يمقّْرَانن. 27وَلَكِن أَربِّـي يخْضَر مِين يدْجَان ذ ثُوْبُّوهْڒِيَا غَار يِوْذَان ن دُّنشْت-أَ حمَا اَذ يفْضح يِنِّي يتفْهَامن زَعْمَا. ئِخْضَر أَربِّـي مِين يضعْفن ذِي دُّنشْت-أَ حمَا اَذ يفْضح يِنِّي يجهْذن. 28ئِخْضَر أَربِّـي ونِّي غَار يدْجَا لْأَصل نّس ذ اَمزْيَان ذ مِين يتْوَاعِيفَّان، ئِخْضَر حتَّا ذ ثِمسْڒَايِين وَار يدْجِين شَا بَاش اَذ يسْبطّڒ ثِمسْڒَايِين نِّي إِي يدْجَان. 29مَايمِّي؟ حمَا ؤُڒَا ذ يج ن بْنَاذم وَار يتفْتَاخَر شَا زَّاث إِ أَربِّـي. 30أُو نتَّا ذ سَّبَاب إِي زِي ثدْجَام كنِّيو ذِي عِيْسَى لْمَسِيح. ئِݣِّي-ث أَربِّـي نتَّا ذ ڒفْهَامث نّغ، يعْنِي نتَّا ذَايس صُّلْح نّغ ذ وصفِّي نّغ ذ وفكِّي نّغ. 31فَلِهَاذَا، مَامش يقَّار لْكِتَاب: <ونِّي يرزُّوْن اَذ يفْتَاخَر، أَذ يفْتَاخَر نتَّا زِي سِيذِي أَربِّـي.>
Currently Selected:
1 أيث-كورينث 1: ريف
Highlight
Share
Copy
Want to have your highlights saved across all your devices? Sign up or sign in
