ರೋಮಾಯೆರೆಗ್ 13

ಅಧಿಕಾರಿಲೆಗ್ ವಶ ಆದುಪ್ಪೊಡು

1ತನ ಮಿತ್ತ್ ಉಪ್ಪುನ ದೇಶದ ಅಧಿಕಾರಿಲೆಗ್ ಪ್ರತಿ ಒರಿಲಾ ಅಧೀನ ಆವೊಡು. ದಾಯೆಗಂದ್ಂಡ ಮಾತ ಅಧಿಕಾರ ದೇವೆರೆಡ್ದೇ, ಬೊಕ್ಕ ಇತ್ತೆದ ಅಧಿಕಾರಿಲೆನ್ ದೇವೆರೇ ಅಕ್ಲೆನ ಸ್ಥಾನೊಡು ದೀತೆ. 2ಅಂಚಾಯಿನೆಡ್ದ್ ಅಧಿಕಾರಿಲೆಗ್ ಎದುರು ಉಂತುನಾಯೆ ದೇವೆರ್ ನೇಮಕ ಮಲ್ತ್‌ದಿನೆಕ್ಕ್ ಎದುರು ಉಂತಿಲೆಕ್ಕನೆ. ಬೊಕ್ಕ ಇಂಚ ಮಲ್ಪುನಾಯೆ ಆಯನ ಮಿತ್ತ್ ತೀರ್ಪುನು ಬರ್ಪಾವೊನುನಾಯೆ ಆದುಲ್ಲೆ. 3ಎಡ್ಡೆ ಮಲ್ಪುನಾಕುಲೆಗ್ ಅಧಿಕಾರಿಲೆ ಪೋಡಿಗೆ ಉಪ್ಪುಜಿ; ಹಾಳ್ ಮಲ್ಪುನಾಕುಲೆಗೇ ಮಾತ್ರ ಪೋಡಿಗೆ. ಅಧಿಕಾರೊಡುಪ್ಪುನಾಕುಲೆಗ್ ಪೋಡಿಯಂದಿಲೆಕ್ಕ ಈ ಉಪ್ಪೊಡಂದ್‌ದ್ ಬಯಕುವನಾ? ಅಂಚಾಂಡ ಎಡ್ಡೆಂತಿನೆನ್ ಮಲ್ಪುಲ, ಅಪಗ ಅಕುಲು ನಿನನ್ ಪುಗರುವೆರ್. 4ಅಕುಲು ನಿನ ಎಡ್ಡೆಗಾದ್ರ ಬೇಲೆ ಮಲ್ಪುನ ದೇವೆರೆ ಸೇವಕೆರಾದುಲ್ಲೆರ್. ಆಂಡ ಹಾಳ್ ಮಲ್ಪುನಾಯೆ ಆದಿತ್ತಡ ಅಕ್ಲೆಗ್ ಪೋಡಿಲ. ದಾಯೆಗಂದ್ಂಡ ಶಿಕ್ಷೆ ಕೊರ್ಪಿನ ಅಧಿಕಾರ ಅಕ್ಲೆಗ್ ಕಂಡಿತಾದ್‌ಲಾ ಉಂಡು. ಈ ಬೊಡ್ಚಾಂದಿನೆನ್ ಮಲ್ತಡ ಪೋಡಿಯೊಡು, ಆಯೆ ಪೊಕ್ಕಡೆ ಕೈತ ಕತ್ತಿನ್ ಪತ್ತ್‌ದಿಜೆ, ಆಯೆ ದೇವೆರೆ ಸೇವಕೆ ಆದಿತ್ತ್‌ದ್ ಬೊಡ್ಚಾಂದಿನೆನ್ ಮಲ್ಪುನಾಕುಲೆ ಮಿತ್ತ್ ದೇವೆರೆ ಶಿಕ್ಷೆನ್ ಜಾರಿ ಮಲ್ಪುವೆ. 5ಅಂಚಾಯಿನೆಡ್ದ್ ನಿಕುಲು ಅಧಿಕಾರಿಲೆಗ್ ತಗ್ಗ್‌ದಿನಾಕುಲಾದ್ ಉಪ್ಪುಲೆ ದೇವೆರೆ ಶಿಕ್ಷೆದ ಪೋಡಿಗೆಗಾದ್ ಮಾತ್ರ ಅತ್ತಂದೆ ನಿಕ್ಲೆ ಎಡ್ಡೆ ಮನಸಾಕ್ಷಿಗಾದ್‌ಲಾ ಅಂಚ ಮಲ್ಪುಲೆ.

6ಅಧಿಕಾರಿಲು ತನ್ಕುಲೆ ಕರ್ತವ್ಯೊಲೆನ್ ಮಲ್ಪುನಗ ದೇವೆರೆ ಸೇವಕೆ ಆದ್ ಬೇಲೆ ಮಲ್ಪುನೆಡ್ದ್, ನಿಕುಲು ಸಂದಾವೊಡಾಯಿನ ತೆರಿಗೆನ್ ಕ್ರಮ ಆದ್ ಕಟ್ಟೊಡು. 7ಅಂಚಾದ್ ಅಕ್ಲೆಗ್ ಸಂದಾವೊಡಾಯಿನೆನ್ ಸಂದಾಲೆ; ಏರೆಗ್ ತೆರಿಗೆನ ಅಕ್ಲೆಗ್ ತೆರಿಗೆ, ಏರೆಗ್ ಸುಂಕನ ಅಕ್ಲೆಗ್ ಸುಂಕೊನು; ಏರೆಗ್ ಪೋಡಿಯಾವೊಡು ಅಕ್ಲೆಗ್ ಪೋಡಿಗೆನ್, ಏರೆಗ್ ಮಾರ್ಯಾದಿಯಾ ಅಕ್ಲೆಗ್ ಮಾರ್ಯಾದಿನ್ ಸಂದಾಲೆ.

ಒಂಜೇ ಅಪ್ಪಣೆ

8ಒರಿಯನ್ ಒರಿ ಪ್ರೀತಿ ಮಲ್ಪೊಡು ಪನ್ಪಿನ ಒಂಜೇ ಋಣ ನಿಕ್ಲೆಗುಪ್ಪಡ್. ಉಂದೆನ್ ಕೈಕೊನುನಾಯೆ ನ್ಯಾಯಕಟ್ಟ್‌ಲೆನ್ ಕೈಕೊನುನಾಯೆ ಆದುಲ್ಲೆ. 9ಎಂಚಂದ್ಂಡ, “ವ್ಯಭಿಚಾರ ಮಲ್ಪೆರೆ ಬಲ್ಲಿ; ಮಾನ್ಯ ಕೆರಿಯೆರೆ ಬಲ್ಲಿ; ಕಂಡೊನಿಯೆರೆ ಬಲ್ಲಿ; ನನೊರಿಯನ ಸೊತ್ತುನು ಆಸೆ ಮಲ್ಪೆರೆ ಬಲ್ಲಿ,” ಪನ್ಪಿನ ಈ ಮಾತ ಅಪ್ಪಣೆಲು, “ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪುಲ” ಪನ್ಪಿ ಒಂಜೇ ಅಪ್ಪಣೆಡ್ ಸೇರ್ದುಂಡು. 10ನಿಕುಲು ಬೇತೆಕ್ಲೆನ್ ಪ್ರೀತಿ ಮಲ್ಪುನಾಂಡ ಅಕ್ಲೆಗ್ ಅಪಕಾರ ಮಲ್ಪಯರ್. ಅಂಚಾಂಡ ಪ್ರೀತಿ ಮಲ್ಪುನು ಅಂದ್ಂಡ ಇಡೀ ನ್ಯಾಯಕಟ್ಟ್‌ನೇ ಕೈಕೊನುನವು ಆದುಂಡು.

ಪಗೆಲ್‌ದ ಬೊಲ್ಪುಡು ನಡಪುಲೆ

11ಬೊಕ್ಕ ನಮ ನಿದ್ರೆಡ್ದ್ ಎಚ್ಚರಿಕೆ ಆವೊಡಾಯಿನ ಸಮಯ ಕೈತಲ್‌ ಬತ್ತ್ಂಡ್ ಅಂದ್‌ದ್ ತೆರಿನೆಡ್ದ್ ಉಂದೆನ್ ಮಾತ ಮಲ್ಪುಲೆ. ದಾಯೆಗಂದ್ಂಡ ನಂಕ್ ರಕ್ಷಣೆ ತಿಕ್ಕುನ ಸಮಯ ನಮ ಸುರುಟ್ಟು ನಂಬಿನ ಪೊರ್ತುಡ್ದುಲಾ ಇತ್ತೆ ಮಸ್ತ್ ಕೈತಲಾತ್ತ್ಂಡ್. 12ರಾತ್ರೆ ಹೆಚ್ಚ್ ಮಟ್ಟ್‌ಗ್ ಕರಿಂಡ್, ಪಗೆಲ್ ಕೈತಲಾತ್ತ್ಂಡ್. ಕತ್ತಲೆಗ್ ಸೇರ್ದಿನ ಕ್ರಿಯೊಲೆನ್ ಉಂತಾದ್ ಬೊಲ್ಪುಡು ಲಡಯಿ ಮಲ್ಪುನೆಕ್ಕಾದ್ರ ತಯಾರ್ ಆದ್ ಆಯುಧೊಲೆನ್ ಪತ್ತೊನುಗ. 13ಪಗೆಲ್‌ದ ಬೊಲ್ಪುಡು ಉಪ್ಪುನಾಕುಲೆ ಲೆಕ್ಕ ನಮ ಸರಿಯಾದ್ ನಡಪುಗ. ನಾಚಿಗೆದ ಕೆಲಸೊಲೆಡಾವಡ್, ಬೊಡ್ಚಾಂದಿ ತಮ್ಮಣ, ಪರ್ಪಾಟ, ಅನೀತಿದ ಕಾರ್ಯೊಡಾವಡ್, ಲಡಯಿ, ಕಿಚ್ಚಿಮಚ್ಚರೊಲೆಡಾವಡ್ ಪೊರ್ತು ಕಳೆವಂದೆ ಪಗೆಲ್‌ದಾಕುಲೆ ತಕ್ಕ ಮಾನಸ್ಥೆರಾದ್ ನಡಪುಗ. 14ಶರೀರದ ಆಸೆ ಪೂರ ಮಲ್ಪುನೆಕ್ಕಾದ್ ಚಿಂತೆ ಮಲ್ಪಂದೆ, ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ್ ಹೊಂದೊನ್ಲೆ.

Currently Selected:

ರೋಮಾಯೆರೆಗ್ 13: ತುಳು

Highlight

Copy