ರೋಮಾಯೆರೆಗ್ 10
10
1ಎನ ಸಹೋದ್ರಾ, ಎನ ಸ್ವಂತ ಜನೊಕುಲು ರಕ್ಷಣೆ ಪಡೆಯೊಡು ಅಂದ್‌ದ್ ಎನ ಉಡಲ್‌ದ ಆಸೆ ಆದುಂಡು. ಅಕ್ಲೆಗಾದ್ ಯಾನ್ ದೇವೆರೆಡ ಪ್ರಾರ್ಥನೆಡ್ ನಟ್ಟೊನ್ವೆ! 2ದಾಯೆಗಂದ್ಂಡ, ಅಕ್ಲೆಡ ದೇವೆರೆನ ಆಸಕ್ತಿ ಉಂಡು ಅಂದ್‌ದ್ ಯಾನ್ ಅಕ್ಲೆ ಬಗೆಟ್ ಸಾಕ್ಷಿ ಕೊರ್ಪೆ. ಆಂಡಲಾ ಅಕ್ಲೆ ಆಸಕ್ತಿ ಗೇನೊಗು ಸರಿಯಾದ್ ಇಜ್ಜಿ. 3ಅಕುಲು ದೇವೆರೆ ನೀತಿನ್ ತೆರಿಯಂದೆ ಸ್ವಂತ ನೀತಿನ್ ಸ್ಥಾಪನೆ ಮಲ್ಪೆರೆ ತೂದು ದೇವೆರೆ ನೀತಿಗ್ ಅಧೀನೆರ್ ಆಯಿಜೆರ್. 4ನಂಬುನಾಕುಲೆಗ್ ಮಾತೆರೆಗ್ಲಾ ನೀತಿ ತಿಕ್ಕುಲೆಕ್ಕ ಕ್ರಿಸ್ತೆ ನ್ಯಾಯಕಟ್ಟ್‌ನ್ ಅಂತ್ಯ ಮಲ್ತೆ.
ರಕ್ಷಣೆ ಮಾತೆರೆಗ್ಲಾ
5ಮೋಶೆಲಾ ನ್ಯಾಯಕಟ್ಟ್‌ಡ್ದ್ ಆಪಿ ನೀತಿದ ಬಗೆಟ್, “ಅವೆನ್ ಕೈಕೊನುನಾಯೆನೇ ಐಡ್ದ್ ಬದುಕುವೆ,” ಅಂದ್‌ದ್ ಬರೆಪೆ. 6ಆಂಡ ನಂಬಿಕೆಡ್ದ್ ಆಪಿ ನೀತಿ ಇಂಚೆನೆ ಪನ್ಪುಂಡು, “ಕ್ರಿಸ್ತನ್ ತಿರ್ತ್ ಲೆತ್ತೊಂದು ಬರಿಯೆರೆ, ಏರ್ ಪರಲೋಕೊಗು ಏರ್ದ್ ಪೋವೆರ್?” ಅಂದ್‌ದ್ ನಿನ ಉಡಲ್‌ಡ್ ಪನಡ, 7“ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾವೊಂದು ಬರಿಯೆರೆ ಏರ್ ಪಾತಾಳೊಗು ಜತ್ತ್‌ದ್ ಪೋವೆರ್?” ಪಂಡ್ದಾವಡ್ ನಿನ ಉಡಲ್‌ಡ್ ಪನಡ. 8ಆಂಡ ಅವು ಎಂಚಿನ ಪನ್ಪುಂಡು, “ದೇವೆರೆ ಪಾತೆರ ನಿನ ಕೈತಲೇ ಉಂಡು. ಅವು ನಿನ ಬಾಯಿಡ್ಲಾ ನಿನ ಉಡಲ್‌ಡ್ಲಾ ಉಂಡು. ಆ ಪಾತೆರ ಎಂಕುಲು ಸಾರುನ ನಂಬಿಕೆದ ಪಾತೆರನೇ.” 9ಅವು ದಾನೆ ಪಂಡ ಈ ಯೇಸುನು ಕರ್ತವೆ ಅಂದ್‌ದ್ ಬಾಯಿಡ್‌ ಅರಿಕೆ ಮಲ್ತ್‌ದ್ ದೇವೆರ್ ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯೆ ಅಂದ್‌ದ್ ನಿನ ಉಡಲ್‌ಡ್ದ್ ನಂಬಿಯಡ ನಿಕ್ಕ್ ರಕ್ಷಣೆ ಆಪುಂಡು. 10ಅಂದ್, ಈ ಉಡಲ್‌ಡ್ದ್ ನಂಬುಂಡ ನೀತಿವಂತೆ ಆಪ. ಬಾಯಿಡ್ದ್ ಅರಿಕೆ ಮಲ್ತ್ಂಡ ನಿಕ್ಕ್ ರಕ್ಷಣೆ ಆಪುಂಡು. 11“ಆಯ ಮಿತ್ತ್ ನಂಬಿಕೆ ದೀಪಿನಾಯೆ ಏರ್ಲಾ ನಾಚಿಗೆಡ್ ಬೂರಯೆ,” ಅಂದ್‌ದ್ ಶಾಸ್ತ್ರೊಡು ಪನ್ಪುಂಡು. 12ಉಂದು ಮಾತೆರೆಗ್ಲಾ ಸೇರುನ ಪಾತೆರ ದಾಯೆಗಂದ್ಂಡ ಯೆಹೂದ್ಯೆರೆಗ್ಲಾ ಗ್ರೀಕೆರೆಗ್ಲಾ ವಾ ಭೇದಲಾ ಇಜ್ಜಿ. ದೇವೆರ್ ಮಾತೆರೆಗ್ಲಾ ಕರ್ತವೆ ಆದುಲ್ಲೆ, ಬೊಕ್ಕ ಆಯಡ ನಟ್ಟೊನುನ ಪ್ರತಿ ಒರಿಯನ್ಲಾ ವಿಶೇಷ ಆದ್ ಆಶೀರ್ವದಿಪುವೆ. 13ಶಾಸ್ತ್ರೊಡು ಪಂಡಿಲೆಕ್ಕ, “ಕರ್ತವ ಪುದರ್‌ನ್ ಲೆತ್ತ್‌ದ್ ಏರ್ ಅರಿಕೆ ಮಲ್ಪುವೆರಾ, ಅಕ್ಲೆಗ್ ಮಾತೆರೆಗ್ ರಕ್ಷಣೆ ಆವು.”
14ಆಂಡ ಅಕುಲು ನಂಬಂದೆ ಇತ್ತೆರ್ಡ ಆಯಗ್ ನಟ್ಟೊನೊನು ಎಂಚ? ಬೊಕ್ಕ ಅಕುಲು ಸುವಾರ್ತೆ ಕೇಂಡಿಜೆರ್ಡ ನಂಬುನು ಎಂಚ? ಸಾರಿದ್ ಪನ್ಪಿನಾಯೆ ಇಜ್ಜಾಂಡ ಕೇನುನು ಎಂಚ? 15ಬೊಕ್ಕ ಸಾರಿಯುನಾಕುಲೆನ್ ಕಡಪುಡಂದೆ ಎಂಚ ಸಾರಿಯೊಲಿ? ಶಾಸ್ತ್ರೊಡು ಬರೆತ್ಂಡ್, “ಸುವಾರ್ತೆನ್ ಸಾರಿಯೊಂದು ಬರ್ಪಿನಾಕುಲೆನ ಪಾದ ಏತ್ ಪೊರ್ಲು.” 16ಆಂಡಲಾ ಮಾತೆರ್ಲಾ ಸುವಾರ್ತೆಗ್ ಕೆಬಿ ಕೊರ್ತುಜೆರ್. ಯೆಶಾಯೆ ಪನ್ಪೆ “ಕರ್ತವ ಎಂಕುಲು ಸಾರಿನ ಸುವಾರ್ತೆನ್ ಏರ್ ನಂಬಿಯೆರ್?” 17ಆಂಡ ಕ್ರಿಸ್ತನ ಪಾತೆರೊನು ಸಾರಿಯುನೆಡ್ದ್ ಸುವಾರ್ತೆನ್ ಕೇನ್ವರ್. ಅವೆನ್ ಕೇಂಡಿನೆಡ್ದ್ ನಂಬಿಕೆ ಪುಟ್ಟುಂಡು.
18ಆಂಡ ಯಾನ್ ಕೇನ್ವೆ: ಅಕುಲು ಸುವಾರ್ತೆನ್ ಕೇನುಜೆರ್ ಪನ್ಪಿನವು ಸತ್ಯನಾ? ಅಕುಲು ಕಂಡಿತಾದ್‌ಲಾ ಕೇಂಡ್ದೆರ್ ದಾಯೆಗಂದ್ಂಡ ಶಾಸ್ತ್ರೊಡು ಬರೆತ್ಂಡ್
“ಸಾರಿಯುನಾಕುಲೆ ಸ್ವರ ಇಡೀ ಲೋಕೊಗು ಪಸರ್ಂಡ್;
ಅಕ್ಲೆ ಪಾತೆರ ಭೂಮಿದ ಕಡೆ ಮುಟ್ಟ ಮುಟ್ಟುಂಡು.”
19ಕುಡಲಾ ಯಾನ್ ಕೇನ್ವೆ: ಇಸ್ರಾಯೇಲ್ಯೆರೆಗ್ ಅರ್ಥ ಆತಿಜ?
ಉಂದೆಕ್ಕ್ ಮೋಶೆ ಸುರುತ್ತಾಯೆ ಆದ್ ಉತ್ತರ ಕೊರ್ಪೆ
“ಜನಾಂಗ ಆದುಪ್ಪಂದಿನಾಕುಲೆಡ್ದ್ ಅಕ್ಲೆಡ್ ಮತ್ಸರ ಪುಟ್ಟಾವೆ.
ಬುದ್ಧಿದಾಂತಿ ಮೂರ್ಖೆರೆಡ್ದ್ ಎನ ಜನೊಟು ಕೋಪ ಲಕ್ಕಾವೆ.”
20ಯೆಶಾಯೆ ನನಲಾ ಧೈರ್ಯ ಆದ್ ಪನ್ಪೆ
“ಎನನ್ ನಾಡಂದಿನಾಕುಲೆಗ್ಲಾ ಯಾನ್ ತಿಕ್ಕಿಯೆ;
ಎನ ಬಗೆಟ್ ಕೇನಂದಿನಾಕುಲೆಗ್ಲಾ ಯಾನ್ ತೋಜಾವೊಂಡೆ.”
21ಆಂಡ ಇಸ್ರಾಯೇಲ್ಯೆರೆ ಬಗೆಟ್ ಆಯೆ ಪನ್ಪೆ, “ಎನ ಪಾತೆರೊಗು ಬಗ್ಗಂದಿ ಅಡ್ಡ ಪಾತೆರುನ ಈ ಜನಾಂಗೊನು ಯಾನ್ ದಿನ ಇಡೀ ಕೈ ನೀಡ್ದ್ ಲೆತ್ತೊಂದುಲ್ಲೆ,” ಪನ್ಪೆ.
Currently Selected:
ರೋಮಾಯೆರೆಗ್ 10: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
