2 ಕೊರಿಂಥ್ಯೆರೆಗ್ 13
13
ಪೌಲುನ ಕಡೇತ ಎಚ್ಚರಿಕೆಲಾ ವಂದನೆಲಾ
1ಯಾನ್ ನಿಕ್ಲೆನಡೆಗ್ ಬರ್ಪಿನಿ ಉಂದು ಮೂಜನೇ ಸರ್ತಿ. ಪ್ರತಿಯೊಂಜಿ ಸಂಗತಿಡ್ಲಾ ರಡ್ಡ್ ಮೂಜಿ ಜನ ಸಾಕ್ಷಿದಾಕುಲೆ ಬಾಯಿಡ್ದ್ ಸ್ಥಿರ ಆವೊಡು. 2ಯಾನ್ ನಿಕ್ಲೆ ನಡುಟು ರಡ್ಡನೆ ಸರ್ತಿ ಬತ್ತ್ದುಪ್ಪುನಗ ನಿಕ್ಲೆಗ್ ಶಿಕ್ಷೆ ಕೊರಂದೆ ಕುಲ್ಲಯೆ ಪಂಡ್ದ್ ಪನ್ತೆನಾ ಅಂಚೆನೇ ಇತ್ತೆ ದೂರ ಇತ್ತ್ಂಡಲಾ ಪಾಪ ಮಲ್ತಿನಾಕುಲೆನ್ ಮಾತೆರೆನ್ಲಾ ಎಚ್ಚರಿಕೆ ಮಲ್ತೊಂದುಲ್ಲೆ. ಯಾನ್ ಕುಡ ಬನ್ನಗ ಏರೆನ್ಲಾ ಬುಡ್ಪುಜಿ. 3ಕ್ರಿಸ್ತೆ ಎನಡ ಪಾತೆರ್ವೆ ಪನ್ಪಿನೆಕ್ಕ್ ನಿಕುಲು ಪುರಾವೆ ಕೇನಿನೆಡ್ದ್ ಯಾನ್ ಇಂಚ ಪನ್ಪೆ. ಆಯೆ ನಿಕ್ಲೆ ಸಂಗತಿಡ್ ಬಲಹೀನೆ ಆದುಪ್ಪಂದೆ; ನಿಕ್ಲೆ ನಡುಟು ಬಲವಂತೆ ಆದುಲ್ಲೆ. 4ಆಯನ್ ಕ್ರುಸ್ಸುಗು ಪಾಡ್ನಗ ಬಲದಾಂತಿನಾಯೆ ಆದಿತ್ತೆ. ಆಂಡಲಾ ದೇವೆರೆ ಬಲೊಟು ಬದುಕುನಾಯೆ ಆದುಲ್ಲೆ. ಎಂಕುಲುಲಾ ಆಯನ ಬಲದಾಂತಿನೆಟ್ಟ್ ಪಾಲ್ದಾರೆರಾದುಲ್ಲ. ಆಂಡಲಾ ಆಯಡೊಪ್ಪ ದೇವೆರೆ ಬಲೊಡ್ದು ನಿಕ್ಲೆಗಾದ್ ಎಂಕುಲು ಬದುಕೊಂದುಲ್ಲ.
5ನಿಕುಲು ನಂಬುನಾಕುಲು ಆದಿತ್ತ್ಂಡ ನಿಕ್ಲೆನ್ ನಿಕುಲೇ ಶೋಧಿಯೊನ್ಲೆ, ನಿಕ್ಲೆನ್ ನಿಕುಲೇ ಪರೀಕ್ಷೆ ಮಲ್ತೊನ್ಲೆ. ಯೇಸು ಕ್ರಿಸ್ತೆ ನಿಕ್ಲೆಡ್ ಉಲ್ಲೆ ಅಂದ್ದ್ ನಿಕ್ಲೆಗ್ ತೆರಿಯುಜಾ? ಆಯೆ ನಿಕ್ಲೆಡ್ ಇಜ್ಜೆಡ ನಿಕುಲು ಯೋಗ್ಯೆರ್ ಅತ್ತ್. 6ಎಂಕುಲು ಪರೀಕ್ಷೆಡ್ ಸೋತು ಪೋತಿಜ ಪನ್ಪಿನೆನ್ ನಿಕುಲು ತೆರಿಯೊನ್ವರ್ ಅಂದ್ದ್ ಎಂಕ್ ನಿರೀಕ್ಷೆ ಉಂಡು. 7ನಿಕುಲು ದಾಲಾ ಪಡಿಕೆಂತಿನೆನ್ ಮಲ್ಪೆರೆ ಬಲ್ಲಿ ಅಂದ್ದ್ ಎಂಕುಲು ದೇವೆರಡ ನಟ್ಟೊನ್ವ. ಉಂದೆಟ್ಟ್ ಎಂಕುಲೇ ಪರೀಕ್ಷೆಡ್ ಗೆಂದ್ದ ಅಂದ್ದ್ ತೋಜಿದ್ ಬರೊಡು ಅಂದ್ದ್ ಎಂಕ್ಲೆನ ಉದ್ದೇಶ ಅತ್ತ್. ಆಂಡ ಎಂಕುಲು ಆ ಪರೀಕ್ಷೆಡ್ ಸೋತುದಿತ್ತ್ಂಡಲಾ ನಿಕುಲು ಎಡ್ಡೆಂತಿನೆನ್ ಮಲ್ಪುನಾಕುಲು ಆವೊಡು ಅಂದ್ದೇ ಎಂಕ್ಲೆನ ಉದ್ದೇಶ. 8ದಾಯೆಗಂದ್ಂಡ ಎಂಕುಲು ಸತ್ಯೊಗು ವಿರೋಧಾದ್ ದಾಲಾ ಮಲ್ಪೆರೆ ಆಪುಜಿ, ಸತ್ಯೊಗು ಬೋಡಾದೇ ಮಲ್ಪುವ. 9ಎಂಕುಲು ಬಲದಾಂತಿನಾಕುಲು ಆದಿತ್ತ್ಂಡಲಾ ನಿಕುಲು ಬಲತ್ತಾಕುಲು ಆದುಪ್ಪುನೆಟ್ಟ್ ಎಂಕುಲು ಸಂತೋಷ ಮಲ್ಪುವ. ನಿಕುಲು ಕ್ರೈಸ್ತ ಜೀವನೊಡು ಸಮರ್ಥೆರ್ ಆವೊಡು ಪಂಡ್ದ್ ದೇವೆರೆಡ ಎಂಕುಲು ನಟ್ಟೊನ್ವ. 10ಐಕಾದೇ ಯಾನ್ ನಿಕ್ಲೆಡ್ದ್ ದೂರ ಇತ್ತೊಂದು ಈ ವಿಷಯೊಲೆನ್ ಬರೆತೆ. ದಾಯೆಗ್ ಪಂಡ ಯಾನ್ ಬನ್ನಗ ದೇವೆರ್ ಎಂಕ್ ಕೊರ್ತಿ ಅಧಿಕಾರೊಡು ಯಾನ್ ಕಠಿಣ ಆದ್ ತೋಜಿದ್ ಬರಂದಿಲೆಕ್ಕ ಆಸೆ ಮಲ್ತೊಂದುಲ್ಲೆ. ದೇವೆರ್ ಈ ಅಧಿಕಾರೊನು ನಿಕ್ಲೆನ್ ಮರಪುನೆಕ್ಕಾದ್ ಕೊರಂದೆ ಕಟ್ಟುನೆಕ್ಕಾದ್ ಕೊರ್ತೆ.
11ಕಡೆಕ್ಕ್ ಸಹೋದ್ರೆರೇ, ಸಂತೋಷೊಡುಪ್ಪುಲೆ, ಪೂರ್ತಿ ಸರಿ ಆವೊನ್ಲೆ. ಎನ ಬುದ್ಧಿ ಪಾತೆರೊಗು ಕೆಬಿ ಕೊರ್ಲೆ. ಒಂಜೆ ಮನಸ್ದಾಕುಲು ಆದುಪ್ಪುಲೆ, ಸಮಾಧಾನೊಡುಪ್ಪುಲೆ. ಅಪಗ ಪ್ರೀತಿನ್ಲಾ ಶಾಂತಿನ್ಲಾ ಕೊರ್ಪಿನ ದೇವೆರ್ ನಿಕ್ಲೆಡೊಪ್ಪ ಉಪ್ಪುವೆ.
12ಒರಿಯಗ್ ಒರಿ ಪರಿಶುದ್ಧದ ಮುದ್ದು ಕೊರ್ದು ವಂದಿತೊನ್ಲೆ. 13-14ಮಾತ ದೇವಜನೊಕುಲು ನಿಕ್ಲೆಗ್ ವಂದಿಪುವೆರ್. ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ, ದೇವೆರೆ ಪ್ರೀತಿ, ಪರಿಶುದ್ಧಾತ್ಮನ ಅನ್ಯಮನ್ಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್. ಆಮೆನ್.
Currently Selected:
2 ಕೊರಿಂಥ್ಯೆರೆಗ್ 13: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
