1 ಕೊರಿಂಥ್ಯೆರೆಗ್ 11

1ಯಾನ್ ಕ್ರಿಸ್ತನ್ ತೂದು ನಡಪುಲೆಕ್ಕನೇ ನಿಕುಲು ಎನನ್ ತೂದು ನಡಪುಲೆ.

ತರೆಕ್ ಮುಸುಕು ಪಾಡುನ ಸಂಗತಿಡ್

2ನಿಕುಲು ಮಾತೆಟ್ಲಾ ಎನನ್ ಎನ್ನೊಂದು ಯಾನ್ ನಿಕ್ಲೆಗ್ ತೆರಿಪಾಯಿನ ನಿಯಮೊಲೆನ್ ಕೈಕೊನುನೆಡ್ದ್ ನಿಕ್ಲೆನ್ ಪುಗುರುವೆ. 3ಆಂಡಲಾ ಒಂಜಿ ಸಂಗತಿನ್ ನಿಕುಲು ತೆರಿಯೊನೊಡು ಅಂದ್‌ದ್ ಎನ ಆಸೆ; ಅವು ದಾನೆ ಪಂಡ ಪ್ರತಿ ನರಮಾನಿಗ್ ಕ್ರಿಸ್ತೆ ತರೆ, ಪೊಂಜೊವುಗು ಅಂಜೊವೇ ತರೆ, ಕ್ರಿಸ್ತಗ್ ದೇವೆರೇ ತರೆ ಆದುಲ್ಲೆ. 4ತರೆ ಮುಚ್ಚೊಂದು ಪ್ರಾರ್ಥನೆ ಇಜ್ಜಿಡ ಪ್ರವಾದನೆ ಮಲ್ಪುನ ಅಂಜೊವು ತನ ತರೆ ಆದುಪ್ಪು ಕ್ರಿಸ್ತಗ್ ಅವಮಾನ ಮಲ್ಪುನಾಯೆ ಆದುಲ್ಲೆ. 5ತರೆ ಮುಚ್ಚೊನಂದೆ ಪ್ರಾರ್ಥನೆ ಇಜ್ಜಿಡ ಪ್ರವಾದನೆ ಮಲ್ಪುನ ಪೊಂಜೊವು ತನ ತರೆ ಆದುಪ್ಪು ಅಂಜೊವುಗು ಅವಮಾನ ಮಲ್ಪುವಲ್. ಪೊಂಜೊವು ತರೆ ಮುಚ್ಚೊನಂದೆ ಉಪ್ಪುನವು ತರೆ ಬೋರು ಮಲ್ತೊನವುಲಾ ಒಂಜೇ ಆದುಂಡು. 6ಆಲೆಗ್ ತರೆ ಮುಚ್ಚೊನಿಯೆರೆ ಆಪುಜಿಡ ಕುಜಲ್ ಕತ್ತೆರಡ್. ಆಂಡ ಕುಜಲ್ ಕತ್ತೆರುನವು ಇಜ್ಜಿಡ ಬೋರು ಮಲ್ತೊನವು ಆಲೆಗ್ ನಾಚಿಗೆದ ವಿಚಾರ ಆದುಪ್ಪುನಾಂಡ ತರೆ ಮುಚ್ಚೊನಡ್. 7ಅಂಜೊವು ದೇವೆರೆ ಪ್ರತಿರೂಪಲಾ ಮೈಮೆಲಾ ಆದುಪ್ಪುನೆಡ್ದ್ ತನ ತರೆನ್ ಮುಚ್ಚೊನಿಯೆರೆ ಬಲ್ಲಿ; ಆಂಡ ಪೊಂಜೊವು ಅಂಜೊವುನ ಮೈಮೆ ಆದುಲ್ಲಲ್. 8ಸುರುತ್ತ ಅಂಜೊವು ಪೊಂಜೊವುಡ್ದು ಉಂಡಾಯಿನಿ ಅತ್ತ್; ಪೊಂಜೊವು ಅಂಜೊವುಡ್ದು ಉಂಡಾಯಿನಿ#ಆದಿ 2:21,23 . 9ಬೊಕ್ಕ ಅಂಜೊವು ಪೊಂಜೊವುಗಾದ್ ಉಂಡಾಯಿನಿ ಅತ್ತ್; ಪೊಂಜೊವುನು ಅಂಜೊವುಗಾದ್ ಉಂಡು ಮಲ್ತ್‌ದಿನಿ. 10ಅಂಚಾಯಿನೆಡ್ದ್ ದೂತೆರೆಗಾದ್ ಪೊಂಜೊವು ಅಂಜೊವುನ ಅಧಿಕಾರೊಗು ಒಳಗಾದುಪ್ಪು ಗುರ್ತಗಾದ್ ತನ ತರೆ ಮುಚ್ಚೊನಡ್. 11ಆಂಡಲಾ ಕರ್ತವಡ್ ಅಂಜೊವು ಪೊಂಜೊವುದಾಂತೆ ಇಜ್ಜಿಡ ಪೊಂಜೊವು ಅಂಜೊವುದಾಂತೆ ಪರಿಪೂರ್ಣ ಆಪುಜೆರ್. 12ಪೊಂಜೊವು ಅಂಜೊವುಡ್ದ್ ಉಂಡಾಯಲ್; ಅಂಚೆನೇ ಅಂಜೊವು ಪೊಂಜೊವುಡ್ದಾದ್ ಪುಟ್ಟುವೆ; ಮಾತೆಕ್ಕ್‌ಲಾ ದೇವೆರೇ ಮೂಲ ಆದುಲ್ಲೆ. 13ನಿಕ್ಲೆ ಉಲಯಿ ನಿಕುಲೇ ನಿರ್ಧಾರ ಮಲ್ತೊನ್ಲೆ, ಪೊಂಜೊವು ತರೆ ಮುಚ್ಚೊನಂದೆ ದೇವೆರೆಗ್ ಪ್ರಾರ್ಥನೆ ಮಲ್ಪುನವು ಸರಿಯಾ? 14ಅಂಜೊವು ಉದ್ಧ ಕುಜಲ್ ಬುಡಿಯೆಡ ಅವು ಆಯಗ್ ಅವಮಾನ ಆದುಂಡು; 15ಆಂಡ ಪೊಂಜೊವುಗು ಉದ್ಧ ಕುಜಲ್ ಇತ್ತ್ಂಡ ಅವು ಆಲೆಗ್ ಮಾನದ ಸಂಗತಿ; ಕುಜಲ್ ಆಲೆಗ್ ಕೊಟ್ಟುದ ಬದಲಾದ್ ಕೊರ್ತಿನವು. 16ಒರಿ ಈ ಸಂಗತಿಡ್ ತರ್ಕ ಮಲ್ಪುವೆಡ ಇಂಚಿತ್ತಿ ಕ್ರಮೊಕುಲು ಎಂಕ್ಲೆಡ್ ಇಜ್ಜಿ, ಬೊಕ್ಕ ದೇವೆರೆ ಸಭೆಕ್ಲೆಡ್ಲಾ ಇಜ್ಜಿ ಅಂದ್‌ದ್ ತೆರಿಯೊನಡ್.

ಕರ್ತವ ಬೋಜನದ ಸಂಗತಿಡ್

17ಯಾನ್ ಇಂಚ ನಿಕ್ಲೆಗ್ ಅಪ್ಪಣೆ ಮಲ್ಪುನೆಟ್ಟ್ ನಿಕ್ಲೆನ್ ಪುಗರುಜಿ; ದಾಯೆಗಂದ್ಂಡ ನಿಕುಲು ಸೇರ್ದ್ ಬರ್ಪಿನೆಟ್ಟ್ ಹಾಳ್ ಆಪಿನತ್ತಂದೆ ಎಡ್ಡೆ ಆಪುಜಿ. 18ಸುರುತ್ತವು ದಾನೆ ಪಂಡ ಸಭೆ ಆದ್ ಸೇರ್ದ್ ಬನ್ನಗ ನಿಕ್ಲೆಡ್ ಪಂಗಡೊಲು ಉಂಡಾಪುಂಡು ಅಂದ್‌ದ್ ಕೇಂಡ್ದೆ; ಬೊಕ್ಕ ಉಂದು ಒಂತೆ ಮಟ್ಟ್‌ಗ್ ಅಂದ್, ಅಂದ್‌ದ್ ನಂಬುವೆ. 19ನಿಕ್ಲೆಡ್ ಯೋಗ್ಯೆರ್ ಏರ್ ಅಂದ್‌ದ್ ತೆರಿದ್ ಬರ್ಪಿನೆಕ್ಕಾದ್ ನಿಕ್ಲೆ ಉಲಯಿ ಪಂಗಡೊಲು ಉಪ್ಪುನವು ಅವಶ್ಯನೇ. 20ಆಂಡ ನಿಕುಲು ಮಾತ ಸೇರ್ದ್ ಬನ್ನಗ, ನಿಕುಲು ಉನ್ಪಿನ ಕರ್ತವ ಭೋಜನ ಅತ್ತ್. 21ವಣಸ್ ಮಲ್ಪುನಗ ಪ್ರತಿಯೊರಿಲಾ ತಾನ್ ಕನಯಿದಿನೆನ್ ನನೊರಿಯಡ್ದ್ ದುಂಬೇ ತಿನ್ಪೆ. ಇಂಚ ಒರಿ ಬಡವುಡುಪ್ಪುವೆ; ಒರಿ ಪರ್ದ್ ಅಮಲ್‌ಡುಪ್ಪುವೆ. 22ದಾನೆ, ತಿನಿಯೆರೆಗ್ಲಾ ಪರಿಯೆರೆಗ್ಲಾ ನಿಕ್ಲೆಗ್ ಇಲ್ಲ್ ಇಜ್ಜಂದೆ ಉಲ್ಲರಾ? ಇಜ್ಜಿಡ ದೇವೆರೆ ಸಭೆನ್ ತಾತ್ಸಾರ ಮಲ್ತ್‌ದ್ ದಾಲಾದಾಂತಿನಾಕುಲೆಗ್ ಅವಮಾನ ಮಲ್ಪುವರಾ? ಯಾನ್ ನಿಕ್ಲೆಗ್ ದಾನೆ ಪನೊಡು? ನಿಕ್ಲೆನ್ ಪುಗರೊಡಾ? ಈ ವಿಚಾರೊಡು ಯಾನ್ ಪುಗರುಜಿ.

23ಯಾನ್ ನಿಕ್ಲೆಗ್ ತೆರಿಪಾಯಿನ ಈ ಬೋಧನೆನ್ ಕರ್ತವಡ್ದ್ ಹೊಂದಿಯೆ. ಆವು ದಾನೆಂದ್ಂಡ, ಕರ್ತವೆ ಆದುಪ್ಪು ಯೇಸು ತನನ್ ಒಚ್ಚಿದ್ ಕೊರಿನ ರಾತ್ರೆಡ್ ರೊಟ್ಟಿನ್ ದೆತ್ತೊಂದು, 24ದೇವೆರೆನ್ ಸುಗಿತ್‌ದ್, ಪೊಲ್ತುದು ಅಕ್ಲೆಗ್ ಕೊರ್ದು, “ಉಂದು ನಿಕ್ಲೆಗಾದ್ ಕೊರ್ತಿನ ಎನ ಶರೀರ. ಎನನ್ ನೆನೆಪು ಮಲ್ಪೆರೆಗಾದ್ ಇಂಚ ಮಲ್ಪುಲೆ.” 25ಅಂಚೆನೆ ವಣಸ್ ಆಯಿ ಬೊಕ್ಕ ಆಯೆ ಅವ್ವೇ ರೀತಿಡ್ ಪಾತ್ರೆನ್ ದೆತ್ತೊಂದು, “ಈ ಪಾತ್ರೆ ಎನ ನೆತ್ತೆರೆಡ್ದ್ ಉಂಡಾತಿನ ಪೊಸ ಒಡಂಬಡಿಕೆನ್ ತೋಜಾವುಂಡು. ನಿಕುಲು ಉಂದೆಟ್ಟ್ ಪರ್ಪಿನಾತ್ ಸರ್ತಿ ಎನನ್ ನೆನೆಪು ಮಲ್ಪೆರೆಗಾದ್ರ ದೆತ್ತೊನ್ಲೆ,” 26ನಿಕುಲು ಈ ರೊಟ್ಟಿನ್ ತಿಂದ್‌ದ್ ಈ ಪಾತ್ರೆಡ್ ಪರ್ಪಿನಾತ್ ಸರ್ತಿ ಕರ್ತವ ಮರಣೊನು ಆಯೆ ಬನ್ನೆಂಗೆ ಸಾರಿಯೊನ್ವರ್.

27ಅಂಚಾಯಿನೆಡ್ದ್ ಏರಾಂಡಲಾ ಯೋಗ್ಯದಾಂತೆ ಈ ರೊಟ್ಟಿನ್ ತಿಂದೆಡ ಇಜ್ಜಿಡ ಕರ್ತವ ಪಾತ್ರೆಡ್ ಪರಿಯೆಡ, ಕರ್ತವ ಶರೀರೊಗ್ಲಾ ನೆತ್ತೆರ್‌‌ಗ್ಲಾ ಅಪರಾಧಿ ಆದುಪ್ಪೆ. 28ಅಂಚಾಂಡ ಪ್ರತಿ ನರಮಾನಿ ತನನ್ ಪರೀಕ್ಷೆ ಮಲ್ತೊಂದಿನಾಯೆ ಆದ್ ಈ ರೊಟ್ಟಿನ್ ದೆತ್ತೊಂದು ತಿನಡ್, ಈ ಪಾತ್ರೆಡ್ ಪರಡ್. 29ದಾಯೆಗಂದ್ಂಡ ಕರ್ತವ ಶರೀರೊಗು ಪಂಡ್ಂಡ ಸಭೆಟ್ ಯೋಗ್ಯೆದಾಂತೆ ತಿಂದ್‌ದ್ ಪರ್ಪಿನಾಯೆ ನ್ಯಾಯತೀರ್ಪುನು ಬರ್ಪಾವುನಾಯೆ ಆದುಪ್ಪುವೆ. 30ಈ ಕಾರಣೊಡ್ದಾದ್ ನಿಕ್ಲೆಡ್ ಮಸ್ತ್ ಜನ ಬಲದಾಂತಿನಾಕುಲುಲಾ ಸೀಕ್‌ದಾಕುಲುಲಾ ಆದುಲ್ಲೆರ್, ಮಸ್ತ್ ಜನ ಸೈತೆರ್. 31ನಿಜಾದ್ ನಂಕ್ ನಮನೇ ವಿಚಾರಣೆ ಮಲ್ತೊಂಡಡ ನಮ ನ್ಯಾಯತೀರ್ಪುಗು ಗುರಿ ಆಪುಜ. 32ಆಂಡ ನಮ ಕರ್ತವ ನ್ಯಾಯತೀರ್ಪುಗು ಒಳಗಾನಗ ಆಯೆ, ಲೋಕದಾಕುಲೆಡೊಪ್ಪ ಅಪರಾಧಿಲು ಪನ್ಪಿ ತೀರ್ಪು ಆಯೆರೆ ಬಲ್ಲಿ ಪಂಡ್ದ್ ನಂಕ್ ಶಿಕ್ಷೆನ್ ಕೊರ್ಪೆ.

33ಅಂಚಾದ್ ಎನ ಸಹೋದ್ರೆರೇ, ಮೇಜಿಗ್ ಸೇರ್ದ್ ಬನ್ನಗ ಒರಿ ಒರಿಯಗ್ ಕಾತೊನ್ಲೆ. 34ನಿಕುಲು ಸೇರ್ದ್ ಬನ್ನಗ ದೇವೆರೆ ನ್ಯಾಯತೀರ್ಪುಗು ಕಾರಣ ಆವಂದಿಲೆಕ್ಕ ಒರಿಯಗ್ ಬಡವು ಇತ್ತ್ಂಡ ಇಲ್ಲಡೇ ವಣಸ್ ಮಲ್ಪಡ್. ಒರಿದಿನ ಸಂಗತಿಲೆನ್ ಯಾನ್ ಬತ್ತಿನಪಗ ನೇಮಕ ಮಲ್ಪುವೆ.

Currently Selected:

1 ಕೊರಿಂಥ್ಯೆರೆಗ್ 11: ತುಳು

Highlight

Copy