रोम 13

अधिकार्या का कायदा कानून मानो

1सगळा मिनखानै अधिकार्या का कायदा कानून मानबो चाए। क्युं क परमेसर की मरजी क बिना कोई राज कोनी कर सकै, अर परमेसरई अधिकारी बणावै ह। 2जणा जखो बी अधिकारी को बिरोद करै ह, बो परमेसर का हुकमा को बिरोद करै ह। अर जखा परमेसर की व्यवस्था को बिरोद करीं हीं बानै सजा मिलसी। 3क्युं क अधिकारी चोखा काम करबाळानै डराबा ताँई नइ पण बुरा काम करबाळानै डराबानै ह। अर ज थे परधानऊँ नइ डरबो चाओ जणा चोखा काम करो जिऊँ अधिकार्याऊँ थारी बडाई होसी। 4क्युं क अधिकारी थारी भलाई ताँई परमेसर को सेवक ह। पण ज तू बुरो करै ह जणा बिऊँ डर क्युं क बो अंय्यांई तलवार कोनी ले मेली। बो परमेसर को सेवक ह जखो बुराई करबाळा प बिका न्यायनै ल्यावै ह। 5इ बजेऊँ थानै अधिकारी को कह्‍यो मानबो जरूरी ह। सजा का डरऊँई नइ पण थारी अन्तर-आत्मा की बजेऊँ बी ओ जरूरी ह।

6 # मत्त 22:21; मर 12:17; लूक 20:25 जणाई थे लगान बी चुकाओ हो, क्युं क अधिकारी परमेसर का सेवक होवीं हीं जखा आपको काम पूरो करबा म लाग्या रेह्‍वै। 7कोईकी उधारी ह जणा बिनै चुकतो कर दे, अर जखो कर जिनै देणो ह बिनै दे। अर चुंगी लेबाळानै चुंगी दे। जिऊँ डरबो चाए बिऊँ डर अर जिको मान करबो चाए बिको मान कर।

परेम बिधाननै पूरो करै ह

8आपसी प्यार-परेम क अलावा कोईको करजो खुद प मना राख। क्युं क एक दुसराऊँ परेम करबाळो नेम-कायदानै पूरो करै ह। 9जंय्यां क, “तू कुकरम मना करै, हत्या मना करै, चोरी मना करै, दुसरा की चिजा को लालच मना करै,” अ सगळा अर बचेड़ा सगळा हुकम बी इ हुकम क मांयनै ह क, “तू दुसराऊँ बी तेरी जंय्यां परेम कर।” 10ज थे कोईऊँ परेम करो हो जणा थे बाको बुरो कोनी चाओ। परेम करबो सगळा नेम-कायदानै पूरो करबो ह।

11आज का टेमनै देखता अंय्यां कर, थे जाणो हो क निंदऊँ जागबा की घड़ी आगी ह। क्युं क इब आपणो छुटकारो बि टेमऊँ सांकड़ैई ह जद आपा बिस्वास कर्यो हो। 12रात ढळबाळी ह, अर दिन उगबाळो ह। अँधेरा का काम करबो छोडो अर उजाळा का हतियार उठाल्यो। 13जणा क्युंना आपा सूल रेह्‍वां जंय्यां मिनख दिन का उजाळा म रेह्‍वै। खा पीर धुत रेह्बाळासा नइ, नइ कुकरम अर रांडबाज की जंय्यां, नइ लड़बाळा की जंय्यां अर नइ बळोकड़ा की जंय्यां। 14पण परबु ईसु मसी का सुभावनै लेर आपणा पापी सुभावनै अर मन की इंछ्यानै मारो।

Currently Selected:

रोम 13: एस डब्लु वी

Highlight

Copy