मत्ती 26
26
ईसुनै मारबा की जाळ-साजी
(मरकुस 14:1,2; लूका 22:1,2; यहून्ना 11:45–53)
1बे बाता खेबा क पाछै ईसु चेलाऊँ खयो, 2“थानै बेरो ह दो दिना क पाछै फसै को त्युंहार ह। अर मिनख को बेटो धोकाऊँ सुळी प चढाबा ताँई पकड़ायो जासी।” 3जणा परधान याजक अर यहूदि नेता केफा नाम का म्हायाजक क घर का आँगणा म भेळा होया। 4अर बे बठै जाळ-साजी करी क ईसुनै कंय्यांसिक छळऊँ पकड़र मारां। 5पण बे आपसरी म बतळाया, “आपा ईसुनै त्युंहार क दिन कोनी मारां। ज आपा त्युंहार क दिन इनै मारां जणा के बेरो जनता दंगो कर दे।”
ईसु क उपर ईतर गेर्यो
(मरकुस 14:3–9; यहून्ना 12:1–8)
6जद ईसु बेतनिया म समोन क घरा हो। ओ बोई समोन ह जिको कोढ ईसु धोयो हो। 7#लूक 7:37,38जद ईसु रोटी खार्यो हो जणा बठै एक लूगाई संगमरमर की बरनी म जटामासी को मेंगो ईतर लेर आई। अर बा लूगाई बि बरतननै खोलर बिकै मांयनै जत्तो बी ईतर हो बिनै ईसु क सीर प उंदका दिनी। 8चेला अंय्यां देखर चिड़गा अर खया, “आ लूगाई इ ईतरनै क्याले खराब करी ह? 9इनै चोखा दामा म बेचर इऊँ जखा रिपीआ मिलता बानै गरीबा म बाट्यो जा सको हो।” 10ईसु बाकी इ बातनै भापर बानै बोल्यो, “थे इ लूगाईनै क्युं तंग करो हो? आ तो मेरो मान करी ह। 11गरीब तो थारै सागै सदाई रेह्सी, पण म थारै सागै सदाई कोनी रेहस्युं। 12आ मनै गाडबाऊँ पेल्याई मेरी काया प ईतर उंदकाई ह। 13म थानै सची खेऊँ हूँ, सगळा जगत म जठै बी चोखो समचार को हेलो पाड़्यो ज्यासी, बठै इ लूगाईनै अर इका कामनै याद कर्यो ज्यासी।”
ईसुनै धोको देबा ताँई यहूदा को करार
(मरकुस 14:10,11; लूका 22:3–6)
14जणा यहूदा इस्करोती जखो बारा चेला मऊँ एक हो परधान याजका क कनै गयो अर बाऊँ बोल्यो, 15“ज म ईसुनै थारै हात पकड़ा द्युँ जणा थे मनै काँई देस्यो?” जणा बे बिनै चाँदी हाळा तीस सीक्का देबा की बात प राजी होगा अर बिनै तीस सीक्का गिणर दे दिआ। 16बि टेमऊँई यहूदा ईसुनै पकड़ाबा की ताक म मोको ढुंढबा लाग्यो।
चेला क सागै आखरी फसै
(मरकुस 14:12–21; लूका 22:7–13,21–23; यहून्ना 13:21–30)
17बिना खमिर की रोटी हाळै त्युंहार क पेला दिन चेला ईसु कनै आर बुज्या, “तू कठै चावै ह क म्हें तेरै ताँई फसै की रोटी खाबा की त्यारी करां?” 18ईसु बानै ओडायो, “नगरी क मांय फलाणीया मिनख क कनै जायो अर बिऊँ बोलज्यो, ‘गरूजी खयो ह, मेरो टेम सांकड़ै ह, म मेरा चेला क सागै तेरै घरा फसै को त्युंहार मनास्युं।’” 19अर बे चेला ईसु क खया गेल बि नगरी म फसै की रोटी त्यार करी। 20जद दिन आथगो ईसु बारा चेला क सागै रोटी खाबा बेठ्यो। 21जद बे सागै बेठर रोटी खार्या हा। जणा ईसु आपका चेलानै बोल्यो, “म थानै सची खेऊँ हूँ थारै मऊँ एक जणो जखो अठै मेरै सागै जिमर्यो ह बो मनै धोकाऊँ पकड़ासी।” 22बे ईसु की इ बातनै सुणर बोळा दुखी होया अर बे ईसुनै एक-एक कर बुजबा लाग्या, “परबु बो म तो कोनीनै?” 23पण ईसु बोल्यो, “जखो मेरै सागै इ कचोळा म टिमोवै ह बोई मनै धोकाऊँ पकड़ासी। 24मिनख का बेटानै तो मरनोई ह जंय्यां क पबितर सास्तर म मंडेड़ो ह। पण कत्ती बुरी दसा ह बि मिनख की जिकी बजेऊँ मिनख को बेटो पकड़ायो जासी। इऊँ चोखो तो ओ होतो क बो मिनख जलमतोई नइ।” 25जणा बिनै धोकाऊँ पकड़ाबाळो यहूदा बोल्यो, “हे गरूजी बो म हूँ के?” ईसु बोल्यो, “हाँ अंय्यांई जंय्यां तू बोल्यो ह।”
परबुभोज
(मरकुस 14:22–26; लूका 22:14–20; 1 कुरन्थीयो 11:23–25)
26बे जिमर्याई हा क ईसु रोटी लेर परमेसरनै धनेवाद देर रोटीनै तोड़्यो अर आपका चेलानै आ खेतो रोटी बाटी, “ल्यो आ मेरी काया ह।” 27इकै पाछै ईसु कचोळो लिओ अर परमेसरनै धनेवाद देर बो कचोळो आपका चेलानै दिओ अर खयो, “थे सगळा इमैऊँ पीओ। 28क्युं क इ कचोळा की अँगूरी मेरा लोय को नयो करार ह। ओ लोय बोळा मिनखानै पापऊँ माफ करबा ताँई बहायो ज्यासी। 29म थानै सची खेऊँ हूँ म इबऊँ आ अँगूरी जद ताँई कोनी पीस्युं जद ताँई मेरा परम-पिता का राज म थारै सागै नई नइ पीऊँ।” 30इकै पाछै बे एक गीत गार जेतून का डूँगर प चलेग्या।
पतरस ईसुनै पिछाण्बाऊँ मना करसी
(मरकुस 14:27–31; लूका 22:31–34; यहून्ना 13:36–38)
31जद बे गेला म हा जणा ईसु चेलाऊँ बोल्यो, “थे सगळा कानि-कानि होज्यास्यो। क्युं क पबितर सास्तर म मंडेड़ो ह:
“‘म गुवाळ्यानै मारस्युं अर लल्ड्या तीनतेरा होज्यासी।’
32“#मत्त 28:16पण म ओज्यु जिंदो होर थारूँ अगाऊ गलिल जास्युं।” 33जणा पतरस खयो, “चाए सगळा तनै छोडर भाग जावै पण म तनै कोनी छोडूँ।” 34ईसु बिऊँ खयो, “म तनै सची खेऊँ हूँ आज रात मुरगा क बांग देबाऊँ पेल्या तू तीन बार मेरै बारां म खेसी क, ‘म इनै कोनी जाणू।’” 35जणा पतरस खयो, “ज मनै थारै सागै ज्यान बी देणी पड़ी जणा बी म पिछै कोनी हटूँ।” अर बाकी का सगळा चेला बी अंय्यांई बोल्या।
गतसमनी का बाग म अरदास
(मरकुस 14:32–42; लूका 22:39–46)
36इकै पाछै चेला ईसु क सागै गतसमनी नाम की झघा गया अर बठै ईसु आपका चेलानै बोल्यो, “म बठै जार अरदास करूं थे अठैई बेठ्या रेहज्यो।” 37ईसु आपकै सागै पतरस अर जब्दि का दोन्यु छोरा याकूब अर यहून्नानै लेगो। ईसु बोळो दुख-दुबळो होर्यो हो। 38ईसु बाऊँ बोल्यो, “मेरो हियो बोळो उदास ह अठै ताँई की म मरबाळोसो होर्यो हूँ। थे अठैई मेरै सागै चेता म रेहज्यो।” 39इकै पाछै ईसु बठैऊँ चिनोसोक दूर जार धरती प मोदो पसर अरदास करबा लाग्यो, “मेरा परम-पिता ज आ हो सकै तो मनै इ पिड़ा म मना गेरो पण म चाऊँ जंय्यां नइ पण थे चाओ बंय्यांई होवै।” 40ईसु अरदास कर आपका चेला कनै गयो। अर बानै सुत्यो देखर पतरसनै बोल्यो, “थे बोळा कचा निकळ्या जखो थे मेरै सागै थोड़ी-घणी देरई कोनी जाग सक्या? 41थे जागता रेह्ओ अर अरदास करो जिऊँ थे बिचास्या नइ जाओ। आत्मा तो चावै ह पण आ काया माड़ी ह।” 42अर ईसु दुसरकै अरदास करबा ताँई चलेगो अर अरदास म खयो, “परम-पिता ज मेरो दुख भोगबो जरूरी ह जणा थे जखो चाओ हो बोई मेरै सागै होवै।” 43अर ओज्यु बो चेला कनै गयो अर बानै सुत्यो देख्यो बाकै आँख्या म निंद चढरी ही। 44बो बानै छोडर ओज्यु गयो। अर जंय्यां पेल्या अरदास करी बंय्यांई बोलर बो तीसरकै बी अरदास करी। 45ओज्यु ईसु चेला क कनै गयो अर बोल्यो, “हाल बी थे अरामऊँ सुत्या हो। देखो बा घड़ी आगी जद मिनख को बेटो पाप्या क हात म सूप्यो जार्यो ह। 46थे खड़्या होवो अर देखो मनै पकड़ाबाळो आबाळो ह।”
ईसुनै धोकाऊँ पकड़ायो
(मरकुस 14:43–50; लूका 22:47–53; यहून्ना 18:3–12)
47ईसु अंय्यां बोलर्योई हो, क यहूदा जखो बारा चेला मऊँ एक हो बो आपकै सागै परधान याजक, सास्तरीआ अर यहूदि नेता का हुकमऊँ घणीसारी भीड़ लेर बठै आयो। बाकन तलवार अर लाठ्या बी ही। 48धोकाऊँ पकड़ाबाळो पेल्याई भीड़नै बता दिओ हो क, “जिको म माखो ल्युं बोई ईसु ह थे बिनै पकड़ लिज्यो।” 49अर यहूदा तावळोसो ईसु कनै जार खयो, “गरूजी नमस्कार” अर बो बिको माखो लिओ। 50ईसु बिनै खयो, “जि काम ताँई तू आयो ह बो काम कर।” जणा बे बिनै पकड़ लिआ। 51ईसु क सागैहाळा मऊँ एक जणो तलवार का'डर म्हायाजक का एक दास को कान काट गेर्यो। 52जणा ईसु बिनै बोल्यो, “तेरी तलवार ओटी घाल ले जखा तलवारऊँ मारै ह बो तलवारऊँ मार्यो ज्यासी। 53के थे कोनी जाणो म मेरा परम-पितानै मदद करबा ताँई बुला सकूँ हूँ। अर बो ईस्बर नगरी दुता की बारा सेनाऊँ#26:53 बारा सेनाऊँ हर सेना म छ झार सिपाई होता हा। बी बेत्ती मेरै ताँई भेज देसी। 54ज म अंय्यां करस्युं जणा सास्तर म मंडेड़ो कंय्यां पूरो होसी क्युं क अंय्यां होणोई ह?” 55#लूक 19:47; 21:37बि टेमई ईसु भीड़नै खेबा लाग्यो, “म कोई डाकू हूँ के जखो थे मनै पकड़बा ताँई तलवार अर लाठ्या लेर आया हो? म रोजकी मनदर म रेह्तो अर सीख देतो हो जणा तो थे मनै कोनी पकड़्या। 56पण अ सगळी बाता जखी परमेसर की खेबाळा पबितर सास्तर म मांडी ह बानै पूरो होणोई ह।” अर ईसु का चेला बिनै छोडर भागगा।
यहूदि पंचायत म ईसु
(मरकुस 14:53–65; लूका 22:54,55,63–71; यहून्ना 18:13,14,19–24)
57बे ईसुनै केफा नाम का म्हायाजक क कनै लेग्या अर बठै बडा परधान याजक अर यहूदि नेता अर सास्तरी आर भेळा होगा। 58पतरस बाकै गेल-गेल आयो अर म्हायाजक क आँगणा म चोकीदारा क सागै आ देखबा ताँई क इब काँई होसी बठै बेठगो। 59परधान याजक अर सगळी पंचायत का मिनख ईसुनै मारबा ताँई बिकै खिलाप झूठी गुवाई देबाळानै ढुंढबा लाग्या। 60पण बानै अंय्यां की कोई गुवाई कोनी मिली जखी बाकै काम आ सकै। जदकी बोळा मिनख बाकै खिलाप झूठी गुवाई दि ही। आखीर म दो मिनख आगै आया 61#यह 2:19अर बे खया, “ओ खेवै ह म परमेसर का मनदरनै ढार बिनै तीन दिना क पाछै ओज्यु खड़्यो कर सकूँ हूँ।” 62जणा म्हायाजक खड़्यो होर ईसुनै बुजबा लाग्यो, “तू जुबाब क्युं कोनी देवै अ सगळा तेरै खिलाप गुवाई देर्या हीं।” 63पण ईसु चुपचालोई रिह्यो। जणा ओज्यु म्हायाजक बिऊँ बोल्यो, “म थानै जीवता परमेसर की सोगन देऊँ हूँ, म्हानै बता तू परमेसर को बेटो मसी ह के?” 64ईसु बोल्यो, “हाँ जंय्यां थे बोलो हो म बोई हूँ। अर थे मिनख का बेटानै सऊँ सक्तिसाली परमेसर क दाया हात बेठर राज करता देखस्यो। अर थे मनै ईस्बर नगरीऊँ बादळा मऊँ आतो बी देखस्यो।” 65म्हायाजक बिकी आ बात सुणर आपका गाबल्या पाड़र खयो, “इब ओर गुवा की जुर्त कोनी ह। ओ अंय्यां खेर परमेसर की बुराई करै ह अर थे सगळा इकी बाता सुण्या हो। 66इब थारो काँई फेसलो ह?” जणा बे खया, “ओ तो मोत को हकदार ह।” 67जणा पाछै बामैऊँ कई बिकै मुंडा प थूक्यो अर बिकै मुका मार्या अर बिकै थपड़ मार्या, 68अर खया, “तू मसी हनै इब भबिस्वाणी कर बता तनै कूण मार्यो?”
ईसुनै जाणबाऊँ पतरस को मुकरबो
(मरकुस 14:66–72; लूका 22:56–62; यहून्ना 18:15–18,25–27)
69हाल पतरस बारला आँगणा म बेठ्यो हो, जणा एक दासी बिकन आर बोली, “तू बी तो बि गलिली ईसु क सागै हो।” 70पण पतरस सगळा क सामै नटगो अर बोल्यो, “तू जखो बोलरी ह बा मेरै तो क्युंई पलै कोनी पड़ै।” 71अर बो बारली गुवाड़ी का बारना कनै चलेगो जणा एक ओर दासी बिनै देखर बठै खड़्या मिनखानै बोली, “ओ मिनख ईसु नासरी क सागै हो।” 72ओज्यु पतरस नटगो अर सोगन खार बोल्यो, “म बिनै कोनी जाणू।” 73क्युंक देर पाछै बठै खड़्या मिनख पतरस क कनै गया अर खया, “सचमई तू ईसु क सागैहाळा मऊँ एक ह क्युं क तेरी बोलीऊँ बेरो चालै ह क तू गलिल को ह।” 74जणा पतरस सोगन खार बोल्यो, “म बि मिनखनै कोनी जाणू ज म बिनै जाणू तो परमेसर मनै सजा देवै।” अत्ता मई मुरगो बांग दिनी। 75जणा पतरसनै ईसु की खेईड़ी बा बात याद आई क, “मुरगा क बांग देबाऊँ पेल्या तू तीन बार मेर ताँई खेसी म इनै कोनी जाणू।” अर बो बारनै चलेगो अर पछाड़ा घा'लर रोबा लाग्यो।
Currently Selected:
मत्ती 26: एस डब्लु वी
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved