गलातियो 4

1म बोलुँ हूँ, जद ताँई वारिस टाबर ह अर बो सगळी चिजा को मालिक बी ह, इकै वावजुद बी बिमै अर गुलाम म कोई फरक कोनी। 2बो आपका बाप का ते करेड़ा टेम ताँई घरका क अर भंडारी की निगरानी म रेह्‍वै ह। 3अर अंय्यां आपणै सागै बि हो। आपा जद टाबरा हा, जणा आपा जगत की आत्मिक सक्‍तिया का गुलाम हा। 4पण जद ते टेम आयो, जणा परमेसर आपका बेटानै भेज्यो बो लूगाईऊँ जलम्यो। अर बो नेम-कायदानै मान्यो, 5#रोम 8:15–17जिऊँ बो बा मिनखानै जखा नेम-कायदा क बस म ह बानै किमत चुकार छुटा ले, अर आपानै गोद लेयड़ा बेटा को हक मिलै। 6जदकी थे तो बिका बेटा हो, अर परमेसर आपका बेटा की पबितर आत्मानै जखी हे अब्बा, हे परम-पिता बोलर हेलो देवै ह, आपणा हिया म भेज्यो ह। 7जणा इब थे दास कोनी हो, पण बिका बेटा हो। जणा थे बि बापोत का करेड़ा वादा का पाँतीवाळ हो।

गलातिया की बिस्वासी मंडळी का मिनखा ताँई पोलुस को परेम

8पेल्या थे परमेसरनै कोनी जाणता हा, थे बाका दास हा जखा सच म परमेसर कोनी हा। 9पण इब थे परमेसरनै पिछाण लिआ हो अर परमेसर थानै पिछाणै ह। जणा इब थे जगत की बाता कानि जामै दमहाळी बात कोनी अर जखी बेफालतू की ह, ओज्यु बाका गुलाम क्यु होबा जार्या हो? 10थे खास दिनानै, म्हेनानै, रूतानै अर बरसानै मानो हो! 11म तो थारै बारां म आ सोचर डरूँ हूँ क, कदै अंय्यां नइ हो क जखी मेनत म थार ताँई करी ही बिपै पाणी फिर ज्यावै।

12ओ मेरा लाडला बिस्वास्यो, म थारूँ अरदास करूं हूँ क थे मेरै जंय्यां बणो, क्युं क म बी थारी जंय्यां बण्यो हो। थे मेरो क्युंई बुरो कोनी कर्या। 13थानै याद होगो क, जद म पेलीपोत मेरी बिमारी की दसा म थानैई चोखो समचार सुणायो। 14अर मेरी आ बिमारी थारी बिचासबा की घड़ी होई, जणा बी थे मनै छोटो कोनी जाण्या अर नइ मेरूँ नफरत करी, पण परमेसर का ईस्बर नगरी दुत अर मसी ईसु की जंय्यां जा'णर मेरी आवभगत करी। 15जणा फेर थारी बा धने भावना इब कठै गई? म इ बात को थारो गुवा हूँ, जि टेम का ज मोको पड़तो तो थे थारी आँख्या का'डर मनै दे देता। 16जणा के म सच बोलबा की बजेऊँई थारो बेरी होगो?

17बिधी-बिधान प चलाबाळा मिनख थार म मो तो राखै ह पण बाकी नीत सई कोनी। बे थानै मेरूँ न्यारो करबो चावीं हीं, जिऊँ थे बी बामै मो घालल्यो। 18अर ओ बी चोखो ह क भली बाता म मो राखबो चाए, आ चोखी बात ह, पण इको ओ मतबल कोनी क जद म थारै सागै हूँ जणाई राखो। 19ओ मेरा टाबरो, जद ताँई थार म मसी को सुभाव नइ आज्यावै, जद ताँई म जच्चा की सी पिड़ा भोगर्यो हूँ। 20मेरी तो आ इंछ्या होरी क इब थारै कनै आर ओरई ढंगऊँ बोलुँ, क्युं क थारै बारां म, म कोनी समज पार्यो क काँई कर्यो जावै!

सारा अर हाजिरा

21नेम-कायदानै मानबाळो, थे मनै बताओ, के थे नेम-कायदा की इ बातनै कोनी सुण्या? 22पबितर सास्तर म मंडेड़ो ह क, “अब्राहम क दो बेटा हा, एक तो बिकै परनायड़ी लूगाईऊँ जखी दासी कोनी ही अर दुसरो बिकी दासीऊँ। 23दासीऊँ जलमेड़ो काया को फळ हो, पण बिकी लूगाईऊँ जलमेड़ो परमेसर क करेड़ा करार को फळ हो।”

24आ बाता का होबा क पिछै निती-कथा ह, अ दोन्यु लूगाया दो करारानै दिखावै ह, एक तो सीनै डूँगर की जिऊँ दासई जलमै ह अर बा ह हाजिरा। 25हाजिरा मानो अरब देस को सीनै डूँगर ह, अर यरूसलेम की जंय्यां ह क्युं क बो आपका टाबर-टिकरा सेत्युं गुलामी म ह। 26पण दुसरी लूगाई बिस्वास करबाळा की माँ ह जखी परमेसर की खास नगरीनै दिखावै बो ईस्बर नगरी को यरूसलेम ह जखो गुलामी म कोनी। 27क्युं क पबितर सास्तर म मंडेड़ो ह क,

“हे बांझड़ी तू राजी हो,

क्युं क तू टाबर कोनी जणी।

अर तनै टाबर जलम्बा की पिड़ा कोनी होई,

तू जे-जैकार कर।

क्युं क सुहागण लूगायो बेत्ती,

टाबर-टिकर छोडेड़ी लूगाई क ह।”

28ओ मेरा लाडला बिस्वास्यो, आपा बी अब्राहम का बेटा इसाक की जंय्यां करेड़ा करार का टाबर हां। जखो परमेसर क करार गेल जलम्यो हो। 29पण जंय्यां बि टेम म काया म जलमेड़ो पबितर आत्मा गेल जलमेड़ानै सतातो हो बंय्‍यांई इब बी होवै ह। 30पण पबितर सास्तर म मंडर्यो ह, “दासी अर बिका बेटानै काड दे, क्युं क दासी को बेटो ब्याईड़ी लूगाई का बेटा क सागै बापोत को अधिकारी कोनी होवै।” 31इ ताँई ओ मेरा बिस्वासी भाईड़ो, आपा दासी का कोनी पण परनायड़ी लूगाई का टाबर हां जखी दासी कोनी ही।

Currently Selected:

गलातियो 4: एस डब्लु वी

Highlight

Copy