1 तिमूतियूस 3
3
बिस्वासी मंडळी का परधान
1आ बिस्वास जोगी बात ह, ज कोई बिस्वासी मंडळी का परधान को ओदो चावै जणा बिकी आ इंछ्या सीर-माथै ह। 2#तितू 1:6–9एक बिस्वासी मंडळी का रूखाळा परधान म आँगळी टेकबा की झघा नइ हो, बिकै एकई लूगाई हो, खुदनै बस म राखबाळो, थ्यावस राखबाळो अर मरियादा म रेह्बाळो, बो आपकै घर म अणजाण की बी आवभगत करै, बो सीखाबा म निधान हो। 3बो दारूड़ो नइ हो, मारपीट करबाळो नइ हो, पण दयाऊँ भरेड़ो अर स्यांतीऊँ रेह्बाळो होवै, बिको मो रिपीआ म नइ होवै। 4बो आपका परवार की समाळ करबाळो होवै, अर बिका टाबर बिकी पूरी ईज्जत करै अर बिका कह्या म चालै। 5ज कोई आदमी ओई कोनी जाणै क खुदका परवार की समाळ कंय्यां होवै, जणा बो परमेसर की बिस्वासी मंडळी की समाळ कंय्यां कर सकै ह? 6बो बिस्वास म पक्को होणो चाए, क्युं क कदै अंय्यां नइ होवै क, बो सेतान की जंय्यां गुमान कर सजा पावै। 7बो अंय्यां को मिनख होणो चाए जिकी बिस्वासी मंडळी क अलावा बारका मिनखा म बी ईज्जत हो, अंय्यां नइ हो क बो काळो मुंडो करवार सेतान का जाळ म फस जावै।
बिस्वासी मंडळी का सेवक
8बिस्वासी मंडळी का सेवक बी सचा अर ईज्जत हाळा होणा चाए; बे पिसा का भूखा अर घणी अँगूरी पीबाळा नइ हो; 9बे बिस्वास का सचनै साप अन्तर-आत्माऊँ दिखाबाळा होणा चाए। 10अ पेल्या बिचास्या जावीं अर ज आमै कोई एब नइ होवै जणाई आनै बिस्वासी मंडळी का सेवक की जंय्यां काम करबा द्यो।
11अंय्यांई बाकी लूगायाबी#3:11 लूगायाबी मंडळी का काम म हात बटाबाळी। ईज्जत हाळी हो अर बे चुगलीचाळा करबाळी नइ हो; बे चोकस अर सगळी बाता म बिस्वास जोगी हो।
12बिस्वासी मंडळी का सेवक क एकई लूगाई हो, अर बो खुदका टाबरा अर खुदका परवारनै सूल चलाबाळो हो। 13बे सेवक जखा खुदको काम सूल करीं हीं बे खुद ताँई चोखी झघा अर बी बिस्वास म जखो मसी ईसु प ह, हिमत का धणी होसी।
भगती को भेद
14म तावळोई तेरै कनै आर मिलबा की आस राखूँ हूँ, पण हाल म तनै आ चिठी बी मांडूँ हूँ। 15पण ज मेरै आबा म मोड़ो होवै जणा इ चिठीऊँ जाण ज्याए क, आपणा परमेसर को कूणबो जखो जीवता परमेसर की बिस्वासी मंडळी आ सचाई की निम अर खम्बो ह, बिकै सागै आपानै कंय्यां को बरताव करबो चाए। 16कोई कोनी नट सकै क, भगती को भेद कंय्यां को म्हान ह,
बो जखो मिनख जूण म परगट होयो,
पबितर आत्मा जिनै धरमी बतायो,
अर ईस्बर नगरी दुत जिनै देख्या,
देस-देस म बिको परचार कर्यो गयो,
जगत म बिपै बिस्वास कर्यो गयो,
अर ईस्बर नगरी म उठा लिओ गयो।
Currently Selected:
1 तिमूतियूस 3: एस डब्लु वी
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
