YouVersion Logo
Search Icon

1 कुरन्थीयो 1

1
नमस्कार
1परमेसर की इंछ्या गेल मसी ईसु म भेजेड़ो चेलो होबा ताँई टाळ्यो गयो, म पोलुस जखो बिस्वासी भाईड़ा सोस्थिनेस की मददऊँ आ चिठी#1:1 लिखबाळो तो पोलुसई ह पण नमस्कार मांडती टेम सोस्थिनेस बिकै कनै हो।, 2#काम 18:1कुरन्थी नगरी म परमेसर की बिस्वासी मंडळी का मिनखा अर बा सगळा क नाम मांडूँ हूँ, जखा परमेसर का मिनख होबा ताँई बुलाया गया हीं, जखा मसी ईसु क जरिए परमेसरऊँ जुड़ेड़ा हीं। अर बे सगळा जखा हर कठै रेह्‍र म्हारा अर आपणा सगळा का परबु ईसु मसी, को गुणगान करीं हीं। 3आपणो परम-पिता परमेसर अर परबु ईसु मसी, थारै सगळा प दया अर सुक-स्यांती बणाई राखै।
मसी म बरकत
4थार प मसी ईसु क जरिए जखी दया करी गई ह, बि ताँई म मेरा परमेसरनै सदाई धनेवाद देऊँ हूँ। 5क्युं क मसी म थानै बोलबा, सगळा ज्ञान अर सगळी बाता म सागेड़ो बणायो गयो ह। 6क्युं क मसी क बारां म थारै मांयनै, म्हारो संदेस पक्‍को साबित होयो ह। 7जणाई थे आपणा परबु ईसु मसी क परगट होबानै उडिकर्या हो अर इ ताँई थानै ख्याई आत्मिक बाता की कमी कोनी। 8परबु ईसु मसी थानै आखीर ताँई मजबूत बणायो राखसी, जिऊँ थे आपणा परबु ईसु मसी क ओज्यु आबा का दिन म न्यायऊँ बच ज्याओ। 9परमेसर बिस्वास जोगो ह। बो थानै आपका बेटा ईसु मसी क सागै संगती करबानै टाळ्यो ह जखो आपणो परबु ह।
बिस्वासी मंडळी म फूट
10जणा इब मेरा लाडला बिस्वास्यो, म आपणा परबु ईसु मसी क नाम म था सगळाऊँ अरदास करूं हूँ। जोक्यु थे बोलो बिपै सगळा एक मत होवो, जिऊँ थारै मांयनै फूट ना होवै। अर थारा बिचार अर इंछ्या एकई होवै। 11क्युं क, मेरा लाडला बिस्वास्यो, खलोए क कूणबा का क्युंक मिनख मनै बताया हीं क थारै मांयनै राड़ होवै ह। 12#काम 18:24थारै म आ राड़ ह क थारै मऊँ क्युंक बोलै ह, “म्हें तो पोलुस का चेला हां” क्युंक बोलै ह, “म्हें अपुलोस का” क्युंक बोलै ह, “म्हें केफा का” अर क्युंक खुदनै, “मसी का चेला” बतावीं हीं। 13के मसी बटगो? के थारै ताँई पोलुस सुळी चढयो? के थानै पोलुस का चेला होबा ताँई बतिस्मो दिओ गयो हो? नइ अंय्यां कोनी ह। 14#काम 18:8; काम 19:29; रोम 16:23परमेसर को धनेवाद हो क किरसपुस अर गयुसनै छोडर म थारै माला खिनई बतिस्मो कोनी दिओ। 15जिऊँ कोईबी आ कोनी खे सकै क थे मेरा चेला होबा ताँई बतिस्मो दिआ गया हो। 16#1 कुरन्थी 16:15अर हाँ म स्तिफनस अर बिका घरकानै बी बतिस्मो दिओ हो। पण इकै अलावा मनै तो याद कोनी क म कोई ओरनै बी बतिस्मो दिओ हो। 17क्युं क मसी मनै बतिस्मो देबा ताँई नइ, पण बिना मिनख बुदी की मिलावट क चोखा समचार सुणाबा ताँई भेज्यो ह। जिऊँ मसी को सुळी भोगबो बेकार नइ जावै।
मसी परमेसर की बुदी अर सक्‍ति ह
18मसी क सुळी भोगबा को समचार नास होबाळा मिनखा ताँई बकवास ह। पण आपणा ताँई जखा बचाया जार्या हां परमेसर की सक्‍ति ह। 19क्युं क पबितर सास्तर म मंडेड़ो ह क,
“म ज्ञान्या का ज्ञाननै नास कर देस्युँ,
अर चतरा की चतराईनै बेकार कर देस्युँ।”
20कठै ह ज्ञानी? अर कठै ह सीखाबाळा? अर कठै हीं इ दुनिया का जिरैबाज? के परमेसर इ दुनिया का ज्ञाननै बेबुदी को कोनी बतायो? 21इ दुनिया का मिनख बुदीऊँ परमेसरनै कोनी जाण्या। क्युं क आ परमेसर सोच समजर ध्यार राखी ही। इ ताँई परमेसरनै ओ चोखो लाग्यो क इ परचार क जरिए जखो आपा करां हां जिनै इ दुनिया का मिनख बकवास जाणी हीं बिस्वास करबाळानै बचावै। 22यहूदि मिनख ह जखा सबूत ताँई चमत्कारा की माँग करीं हीं, अर यूनानी मिनख ज्ञान ढुंढीं हीं। 23पण म्हें तो सुळी प चढाईड़ा ईसु मसी को हेलो पाड़ां हां, जखो यहूदि मिनखा ताँई आखळी अर गैर-यहूदि मिनखा ताँई बकवास ह। 24पण जानै परमेसर बुलायो ह चाए बे यहूदि हो चाए यूनानी, बा ताँई मसी परमेसर की सक्‍ति अर बिकी बुदी ह। 25क्युं क परमेसर की बकवास बी मिनखा की बुदीऊँ बेत्ती ह, अर परमेसर की कमजोरी मिनखा की ताकतऊँ बेत्ती ह।
26मेरा लाडला बिस्वास्यो, याद करो जद परमेसर थानै बुलायो जणा थे के हा। इ दुनिया की नजर्या म थारै मऊँ घणकराक नइ तो ज्ञानवान हा अर नइ ताकतबर हा अर नइ समाज म चोखी पेठहाळा। 27पण परमेसर इ दुनिया का ज्ञानवानानै सरमा मारबा ताँई दुनिया की नजर्या म बेबुदी समज्या जाबाळा अर ताकतबरानै सरमा मारबा ताँई इ दुनिया म कमजोर समज्या जाबाळानै टाळ्यो। 28अर इ दुनिया की सोचनै मिटाबा ताँई परमेसर इ दुनिया म छोटा अर निचा देख्या जाबाळानै जानै क्युंई कोनी समज्यो जावै टाळ्यो। 29जिऊँ कोईबी मिनख परमेसर क सामै गुमान कोनी कर सकै। 30पण परमेसर थानै मसी ईसु म जोड़्यो अर मसीनै थारी बुदी बणायो। अर बिकै जरिएई आपा परमेसर की नजर्या म धरमी हां अर आपा परमेसर का पबितर मिनख बण्या अर अजाद कर्या गया। 31जंय्यां की पबितर सास्तर म मंडेड़ो ह:
“ज कोई मिनख गुमान करबो चावै बो परबु क बारां म गुमान करै।”

Highlight

Share

Copy

None

Want to have your highlights saved across all your devices? Sign up or sign in