Markos 15
15
Psgao Berah Pilatos ka Yesu
(Mat 27:1-2, 11-14. Ruk 23:1-5. Yoh 18:28-38)
1Betaq mgrebu caman, mhedu mpprengo ka dparu msapuh, rdrudan, dmptpatis ma kana seediq prngagan de, bkean daha ka Yesu ma sbege daha Pilatos. 2Smiling heya ka Pilatos: “Qbsuran su paru seediq Yudaya ka isu?” Cmiyuk rmengo ka Yesu: “Isu nanak rmnengo.” 3Rmengo egu ba qquwan Yesu ka dpusu msapuh. 4Smiling heya dungal ka Pilatos: “Tai, nii kneegu ka qquwan kari rnengo daha sunan, uxe su mpciyuk ani maanu ho?” 5Ida ini ciyuk ka Yesu. Mskluwi nii ka Pilatos.
Psgeegan Mphuqil ka Yesu
(Mat 27:15-26. Ruk 23:13-25. Yoh 18:39-19:16)
6Knkingal smseman hrnasan ciida, Pilatos we spooda na pnesa seediq rraguh na ka 1 seediq ga shetur ma sbege na dheya. 7Ciida, niqan 1 ka seediq, Barabbas. Gaga shetur ckceka seediq tnbrinah qbsuran paru. Mrrudu ciida we wada phuqil seediq ka dheya. 8Meyah ka hbaro seediq, prading mesa Pilatos. So qneepah na klaali we kesi na mege dheya. 9Cmiyuk rmengo dheya ka Pilatos: “Kuxul namu ka sraguh mu mege yamu ka qbsuran paru seediq Yudaya nii?” 10Klaun na ka dpusu msapuh we mnoda qnriqu daha, kiya ka sbege daha heya ka Yesu. 11Ani so kiya, nii pprudu hbaro seediq ka dparu msapuh. Qlengun na ppraguh Barabbas ka Pilatos, sbege na dheya. 12Rmengo dungal dheya ka Pilatos: “So kiya de, huwa mu kesun ka seediq kesun namu qbsuran paru seediq Yudaya nii ho?” 13Mdiras mlawa ka dheya: “Ptaani jyujika!” 14Rmengo dheya ka Pilatos: “Maanu ba qneepah na naqah ho?” Krinah mdiras mlawa ka dheya: “Ptaani jyujika!” 15Mpsmalu kuxul hbaro ba seediq ka Pilatos, kiya de sraguh na dheya ka Barabbas. Wada na sbetun ka Yesu de, sbege na seediq ptteun daha jyujika ka Yesu.
Tsyaxan Supi Ka Yesu
(Mat 27:27-31. Yoh 19:2-3)
16Supi we desun daha nganguc sapah qbsuran mdudul ka Yesu. Pssliun daha mlawa ka kana 1 rahul supi. 17Plkusan daha lukus mtgdiyuc, pkbnuhan daha bunuh knadi daha pako ka Yesu. 18Kiya de thmuku heya ka dheya, rmengo: “Tai so mpkuudus ani betaq knuwan! Qbsuran paru seediq Yudaya!” 19Sbetun daha qreti brhengil ka tunux na. Ptruqan daha ma tmbqelic thmuku heya. 20Mhedu tsyaxan daha de lhelah daha ka lukus mtgdiyuc. Plkusan daha ida nlukus na, desun daha pteetu jyujika.
Spteetu Jyujika ka Yesu
(Mat 27:32-44. Ruk 23:26-43. Yoh 19:17-27)
21Niqan 1 seediq, Simon pneeyah Kurenaios, tama Aleksandria ma Rupos. Pneyah nklualang biciq moda hiya. Kiya de supi we pkyexan daha ppheal jyujika Yesu ka heya. 22Desun daha Golgota ka Yesu. (Hdilun kari nii we dxeral rngerang qrari tunux), 23sbege daha Yesu ka sino pnugmaxan geluq iyu. Ini angal ka heya. 24Spteetu daha bobo jyujika ka Yesu, blebil qreti pssugun daha ka lukus na, teta ima ka maangal maanu. 25Spteetu daha jyujika ka Yesu ciida we kika 9 toke mgrebu. 26Pnatis daha qnnaqah na ga meniq bobo tunux ge: “Qbsuran paru seediq Yudaya.” 27Spteetu daha jyujika msuupu Yesu ka 2 mpgeeluk gmeeguy, narac na ka 1. Iril na ka 1. 28Nii ge wada ma bale ba pnatis Patis Mrtaso: “Ga daha pspawan peeniq ckceka naqah seediq ka heya.” 29Moda tmsiiyax heya ka dseediq mkleelu, mlgelu ka tunux daha ma: “Ah, seediq isu nii ka mphurah smeeliq Sapah Thmkuwan ma mk3 de psmalu mpheyu dungal. 30Pkdusi sunan nanak, ptuting peeyah jyujika!” 31Tmsiiyax Yesu uri ka dparu msapuh ma dmptpatis. Mpprengo: “Dhekan na pkuudus ka seediq ma, ini na dheki pkuudus ka heya nanak! 32Kiristo, qbsuran paru Israel. Tuting peeyah jyujika saya! Pqtai miyan. Kiya de mpsnheyi nami da!” Tmsiiyax heya ka seediq mnsuupu pteetu jyujika hiya uri.
Mhuqil ka Yesu
(Mat 27:45-56. Ruk 23:44-49. Yoh 19:28-30)
33Kiya de ceka naali de mnkuung ka kana bobo dxeral betaq 3 toke. 343 toke de paru ba hrenang na mdiras ka Yesu: “Iruy, Iruy, rama sabakutani?” Hrigun ka kari de: “Utux Baro mu, Utux Baro mu. Hmuwa, ma saku laxan?” 35Mbahang so nii ka duma ga mheyu ssiyo hiya de rmengo: “Tai, ga mlawa Eliyah ka heya!” 36Tmalang mosa hiya ka 1 seediq. Pttkui na rmebu sino tgbasi ka mheuc wata srisuh. Psaun na ptuling brhengil, pmahun na Yesu ma rmengo: “Trai ta han, qtai ta teta so meeyah ptuting heya peeyah jyujika ka Eliyah ho?” 37Paru hrenang na mlawa ka Yesu de msetuq hengak na da. 38Mtg2 msgaliq peeyah baro betaq truma ka pala pntaayus ckceka Sapah Thmkuwan. 39Mheyu sipo na Yesu hiya ka qbsuran 1'00 supi, qmita so nii pnsteqan na hengak de rmengo: “Seediq nii we bale ba laqi Utux Baro!” 40Mita peeyah theya ka duma mqedil uri. Ckceka daha hiya we Maria seediq Magdalene, Maria bubu Yakobu biciq ma Yosi. Dungal we Calome. 41Meniq Galil ciida ka Yesu, dheya we smnegul ma snbleyaq heya. Niqan dungal ka hbaro ba mqedil mnsuupu theyaq Yesu mosa Yerusalem.
Smeku Heyi Yesu
(Mat 27:57-61. Ruk 23:50-56. Yoh 19:38-42)
42Gbiyan de ado ali psrmalan, kika ali berah sngayan, 43meyah ka Yosehu seediq Yalimatay. Heya we ini kiicu mosa mremux mita Pilatos ma mesa heyi Yesu. Seediq nii we prngagan pspruun qmita seediq ddheya ma psmeyah qnlhangan Utux Baro uri. 44Mbahang wada mhuqil ka Yesu de, mskluwi ka Pilatos. Splawa na ka qbsuran 1'00 supi, smiling yaa ga bsiyaq hnqilan na ka Yesu. 45Klaun na ka kari peeyah qbsuran 1'00 supi de sbege na Yosehu ka heyi Yesu. 46Kiya de maruy tninun malu ware keguy ka Yosehu ma mangal heyi Yesu. Sbleqan na lmabu galiq malu ware keguy ka heyi na. Skuwan na peeniq habung tnqeran tasil ckceka ma rduwan na meluk posa tasil ka rhengun habung. 47Qmnita kana skuwan Yesu ka Maria seediq Magdalene ma Maria bubu Yosi.
Currently Selected:
Markos 15: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
