Yexejqel 35
35
Pkdira Edom ka Utux Baro
1Meeyah kenan ka kari Utux Tmninun, rmnengo, 2“Laqi seediq! Psquri dgiyaq Seir rmengo kari pgeela. 3Rngagi ka heya, rmnengo so nii ka Utux Tmninun Bukung: Dgiyaq Seir! Qtai! Mpknpais ku sunan ka yaku, mposa ku baga mccebu sunan ma, ngalun misu qnada nlixan ka isu. 4Ngalun mu qnada ka lualang su, maha so nlixan ka isu. Kiya ka mpkeela su, yaku ka Utux Tmninun. 5Ado ida su peeniq kncyukan su ka isu. Sbege su hlmadac smterung mqraqil ma pkdraun pooda qnquwan noda su ka seediq Israel. 6Maanu so kiya de, rmengo ka Utux Tmninun Bukung: Mpsdehu ku knuudus mu ani betaq knuwan, mpsterung su cniyuk dara ma, mpsdurak sunan ka dara. Ado ini su qnqihi ka dara, kiya ka smdurak sunan ka dara. 7Laxun ma qdanun mu ka dgiyaq Seir. Mpkuuka ka seediq mnoda hiya. 8Pqhdeun mu poosa seediq pnhuqil ka dgiyaq Seir. Pnhuqil we mptakur dgiyaq biciq, kana dyayung ma rkelu. 9Ngalun misu dxeral qnada ani betaq knuwan ka isu. Mpkuuka ka seediq meeniq lualang su. Kiya ka mpkeela su, yaku ka Utux Tmninun.
10Ado rmnengo su: ‘2 klegan seediq, 2 qlhangan nii we nnaku. Ngalo ta ka nii.’ Bale ba we ida gaga meeniq hiya niya ka Utux Tmninun. 11Maanu so kiya de, rmengo ka Utux Tmninun Bukung: Psdehu ku knuudus mu ani betaq knuwan, puyu misu qmnriqu su dheya ma seang su dheya ka pkdira mu sunan. Psgao ku sunan ciida, mpqita ku dheya ka yaku. 12Maha su mkela, wada mbahang kana kari tnsyaxan su quri ddgiyaq Israel, kiya ka rmengo su: ‘Laxun ka ddgiyaq nii, puqun ta ka nii’ ka yaku, Utux Tmninun. 13Mquri namu kenan psparu namu rmengo ma, prana namu kari mpkpais kenan we, wada mu bhangun kana di. 14Rmengo so nii ka Utux Tmninun Bukung: Mqaras kana ka dxeral ciida, laxun misu qmada ka isu. 15So wada su qrasun ka dxeral sapah Israel laxan we pntnaun misu so nii ka isu uri. Dgiyaq Seir! Laxun qmada ka isu ma kana dxeral Edom. Kiya de mpkeela ka seediq, yaku we Utux Tmninun.”
Currently Selected:
Yexejqel 35: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
