Ester 2
2
Ma Mqedil Qbsuran Paru ka Ester
1Bobo noda nii, malix seang na ka Axasreros qbsuran paru de, lnglungun na ka Wastiy ma ndaan na ma, quri wada na sprengo posa kari heya. 2Kiya de, meyah rmengo qbsuran paru ka dmdayo heya: “Gime ta seediq ba mpweewa qbsuran paru ho? 3Braho su qbsuran paru we, skguli dqbsuran kana nyusan dxeral qlhangan ma psseli daha ka mbtunux ba ma bale ba weewa sapah mqedil alang Susan hiya. Bqani Hege gnbgaxan mpqlahang mqedil ma biqi ddooyun daha skenux pdeping ka dwewa. 4Kiya de geegi mbtunux ba weewa so maha pndungus lnglungan qbsuran paru mpririh Wastiy.” Malu ka so nii kari, mesa ka qbsuran paru ma asi ooda.
5Meniq alang Susan heya ka 1 seediq Yudaya. Mardakay ka ngayan na ma lqlaqi laqi Qis seediq Binyamin, laqi laqi Simiy ma, laqi Yair. 6Cuuxal Nebukadnecar qbsuran paru Babirun bkeun na madis peeyah Yerusalem ka Yekoniya qbsuran paru Yehudah ciida, mneeniq ckceka dseediq qneerac hiya ka Mardakay uri. 7Mardakay we dmanga Hadasah kiya ka Ester, heya we weewa mtswai rudan na. Ado uka tama ma bubu ka heya. Weewa nii we mbtunux bale. Wada mgedang ka tama ma bubu na de, ngalun Mardakay ka laqi mqedil nii ma ngalan na so weewa na. 8Bobo wada ka pnosa kari qbsuran paru de, psliun Alang Susan ka hbaro bale weewa ma, pqlhangun daha Hege mpqlahang weewa. Desun sapah qbsuran paru ka Ester uri ma pqlhangun Hege hiya. 9Kuxul bale Hege ka Ester de, sbleqan na bale. Kiya de mtgaaguh mege malu kenux pdpingun na ma ngngalun na. Dungal we ptheyaq na 7 mqedil mqita heya gneegan peeyah sapah qbsuran paru. Pniqun na tgmalu ba truma sapah weewa ka heya ma dmqedil mqita heya. 10Ester nii we ini na pgklai seediq ka klegan seediq na ma pntingan na. Ado mdakar rmengo, iya ba pgklai, mesa ka Mardakay han. 11Klaali, mkkesa tgberah sapah weewa ka Mardakay. Kmklaun na gaga mgmaanu ma hmuwa ka Ester.
12Muyu gaya mooda rmicuh heyi mk12 idas ka dweewa: 6 idas we mdoi abura mngihur ma, 6 idas we mdoi malu skenux rmicuh heyi daha. Dehuk ka ali de, txtaxa daha mmaha tqita Axasreros qbsuran paru. 13Dweewa nii we, so nii ka ssaun daha qmita qbsuran paru: Mplatac peeyah sapah mqedil maha sapah qbsuran paru ciida, ani maanu ka kmngalun daha we biqan daha. 14Kingal rabi ka niqun daha sapah qbsuran paru, mgrebu so kusun de mosa sapah mqedil icil ma qlhangan Saasgaj gmbgaxan mpqlahang dmqedil qbsuran paru. Nasi kuxul qbsuran paru splawa na dungal ka heya we, ini tduwa mosa qmita qbsuran paru ka dheya.
15Spooda bnkegan, dehuk ka ali ssaan tqita qbsuran paru Ester weewa Abihayil mtswai Mardakay, Ester we kiya ka gaga ngalan weewa Mardakay. Wano ba dmqedil bnege Hege gmbgaxan mpqlahang mqedil we, ini pesa ani maanu ka Ester. Kana qmnita Ester we kuxul daha bale. 16Tg7 knkawas 10 idas mqbsuran paru ka Axasreros, kiya ka idas Tibic, splawa sapah qbsuran paru mosa tqita qbsuran paru ka Ester. 17Qbsuran paru we spgkala na gmaalu ani ima mqedil ka Ester. Meniq berah qbsuran paru we, mgkala kana dweewa ka snbleqan na. Kiya de qbsuran paru we spkbunuh na tunux Ester ka bunuh mqedil qbsuran paru ma spririh na Wastiy ngalan na mqedil qbsuran paru ka heya. 18Kiya de qbsuran paru we pqdiyal uqan mqaras dqbsuran mpdudul ma dqbsuran mdayo. “Uqan mqaras nuEster” kesun na tmngayan ka uqun nii. Dungal we psngayun na mege bbege ka kana ddxeral nyusan qmlahang ma, spooda na huwe qbsranan paru mege qnaras.
Pkuudus Qbsuran Paru ka Mardakay
19Mn2 psseli dweewa ciida, gaga tleung rhengun qbsuran paru ka Mardakay. 20Muyu kari pndakar Mardakay ka Ester we, ini na tgsaani seediq ka pntingan na ma klegan seediq na. Ida muyu kari pndakar Mardakay ka Ester, mntena so dnanga na heya ciida. 21Pkelu tleung rhengun sapah qbsuran paru ka Mardakay ciida, qmlahang rhengun tqiyan qbsuran paru ka Bigtan ma Teres gmbgaxan we, sgcuqi seang daha ma migin phqilan Axasreros qbsuran paru ka dheya. 22Klaun Mardakay ka so nii de, rngagan na ka Ester mqedil qbsuran paru. Ester de Mardakay ka tnkari nii we srengo na qbsuran paru. 23Gimun ka pusu nii ma bale ba slayan daha de sddoyun daha qhuni phuqil ka 2 heyi nii. Quri so nii we gaga spatis patis ndaan qbsuran berah qbsuran paru hiya.
Currently Selected:
Ester 2: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020