Mege Gaya 2
2
Tnooda Meniq Dxeral Nrao
1“Bobo na, mnspgeriq ta peeyah rcilung Mtanah mquri ta tadus brenux. Kiya ka pnuyu ta rnengo Utux Tmninun. Egu hari ali mtqiri ta dgiyaq Seir hiya. 2Rmengo kenan ka Utux Tmninun: 3‘Wada mttuku ka ali pqriun namu dgiyaq hini. Psquri daya moda ka yamu da. 4Tgsai isu ka seediq, mtswai namu lqlaqi laqi Esaw we gaga meniq Seir. Yamu we asi namu ka moda ayu dxeral daha. Mpkiicu dyamu ka dheya. Kiya de asi ka qmlahang bale ka yamu. 5Iya rdingi tmraki ka dheya. Ani dhekan qmleqah qapal papak namu ka dxeral daha we, uxe mu bege yamu. Ado wada mu sbege Esaw ka dxeral dgiyaq Seir. 6Brigi pila peeyah dheya ka uuqun namu. Qsiya uri we brigi pila peeyah dheya uri. 7Ado Utux Tmninun, Utux Baro namu we wada smbleyaq kana ndaan noda baga namu ka heya. Mnkkesa namu tadus brenux paru nii we, mkela kana ka heya. Mntheyaq yamu meniq 40 knkawas nii ka Utux Tmninun, Utux Baro su. Kiya ka uka ka ini namu pttuku.’”
8“Kiya de mooda miyan nniqan Seir lqlaqi laqi Esaw ka yami, peeyah miyan elu Arabah, moda miyan Eylat ma Ecyon Geber, mquri miyan elu tadus brenux Moab. 9Rmengo kenan ka Utux Tmninun: ‘Iya kmpais seediq Moab ma, iya oda tmraki mccebu dheya uri. Dxeral daha we uxe mu sbege yamu kiya. Ado wada mu sbege lqlaqi laqi Lot ka Ar.’ 10Cuuxal we, mneniq hini ka seediq Eymim, mbeyax bale ma hbaro riyung ka dheya. Mntena seediq Anaq ka knhbragan daha. 11Mntena seediq Anaq ka dheya, seediq Ripayim ka dheya uri. Kiya de seediq Moab we Eymim kesun daha tmngayan ka dheya. 12Cuuxal we, mneniq Seir ka seediq Xori uri. Kiya de wada phqilun lqlaqi laqi Esaw ka dheya. Kiya de meniq dxeral daha ka dheya ma, lmutuc dheya meniq hiya. Mntena so seediq Israel meniq dxeral bnege Utux Tmninun. 13‘Saya, tutuy ma osa mtaril Yayung Jered!’ Kiya de mntaril ta Yayung Jered da. 14Wada betaq 38 knkawas peyah mnlatac Qades Barnea mtaril Yayung Jered, betaq wada mhuqil kana ka dseediq mnccebu knxalan ciida. Mntena so sndehu rnengo Utux Tmninun. 15Cmebu dheya uri ka baga Utux Tmninun, betaq wada na psnakun phuqil peyah ckceka kobu daha.”
16“Bobo wada mhuqil kana ka dseediq mpccebu na de, 17rmengo kenan ka Utux Tmninun: 18‘Ali saya, yamu we mooda namu ayus alang Ar dxeral Moab ma, 19mpkkesa namu dxeral seediq Amon. Iya kmpais dheya ma, iya oda tmraki mccebu dheya uri. Dxeral Amon we uxe mu sbege yamu kiya. Ado wada mu sbege lqlaqi laqi Lot ka dxeral kiya.’ 20Dxeral kiya we dxeral nseediq Ripayim uri. Ado tgberah na we mneniq hiya ka seediq Ripayim. Seediq Amon we Jammumim kesun daha tmngayan ka dheya. 21Dseediq hiya we mbeyax ma hbaro riyung. Mntena so seediq Anaq ka knparu na. Kiya de Utux Tmninun we wada na phqilun peeyah berah seediq Amon ka dheya. Seediq Amon we kiya ka wada mangal dxeral daha ma, rmirih meniq hiya ka dheya. 22Nii ge mntena ba noda Utux Tmninun kmpeeniq na dxeral Seir ka lqlaqi laqi Esaw we, wada na phqilun pneeyah berah daha ka seediq Xori. Kiya de rmirih dheya meniq hiya betaq saya. 23Plaale ba meniq lualang betaq Ajah ka seediq Awim. Seediq pneeyah dxeral Kaptor ka wada phuqil dseediq Awim ma, rmirih meniq hiya ka dheya. 24Tutuy, psquri berah mosa ka yamu ma, oda hmrinas ayu Arnon. Tai! Wada mu sbege yamu ka dxeral Sixon seediq Amori qbsuran paru Xesbon ma qlhangan na. Maha namu prading mangal dxeral daha ka yamu ma, maha namu mccebu dheya. 25Peeyah ali saya, pkcugun mu yamu ka dseediq qqlhangan bobo dxeral. Mbahang ngayan su de, maha mpprkerang ado isu ka dheya.”
Wada Ini Baka ka Sixon Qbsuran Paru Xesbon
(Spe 21:21-30)
26“Smnkagul ku seediq peeyah tadus brenux Qedemot betaq Sixon qbsuran paru seediq Xesbon, dmoi psbale kari rmengo: 27‘Braho misu pooda miyan rmaro dxeral namu ho? Mkkesa miyan ciida, wano elu paru ka daun miyan ma, uxe miyan pkciicil. 28Pbrigi miyan ka uqun ma qsiya mahun. Wano nanak mkkesa moda dxeral namu. 29So mntena lqlaqi laqi Esaw meniq Seir ma dseediq Moab meniq Ar pooda menan. Mntaril miyan rcilung Yarden de, maha miyan dxeral bnege Utux Tmninun, Utux Baro miyan.’ 30Kiya de ini sruwa pooda ita dxeral na ka Sixon qbsuran paru Xesbon. Ado pskere lnglungan ma lhebun na ka Utux Tmninun. So na sbege baga namu ka heya, mntena saya. 31Rmnengo kenan ka Utux Tmninun: ‘Tai! Wada ku prading mege yamu ka Sixon ma dxeral na. Yamu we maha namu prading mangal dxeral daha.’”
32“Meyah mccebu ita ka Sixon ma dseediq daha. Mccebu ita meniq Yahac hiya. 33Utux Tmninun, Utux Baro ta we, wada na sbege ita ka dheya. Kiya de wada ta phqilun ka heya ma lqlaqi na ma, kana seediq na. 34Ciida, wada ta glekun kana ka lualang daha ma, wada ta phqilun kana ka rseno, mqedil, lqlaqi ma, uka ani maanu ka mtnngari na. 35Wano tnbugan ma qyqeya pneeyah lualang ka wada miyan ngalun nanak. 36Peeyah Aroer ssiyo ayu Arnon betaq Gilad ka lualang we, uka ka mbeyax na ma wada ngalun kana. Ado Utux Tmninun, Utux Baro ta we wada na sbege ita kana ka dheya da. 37Wano dxeral Amon, ssiyo yayung Yaboq ma, lualang mneniq dgiyaq na we ini namu dai smdaling. Kana nii we tnugesa Utux Tmninun, Utux Baro ta.”
Currently Selected:
Mege Gaya 2: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
