2 Korinto 8
8
Gnhuwe Mege Dnayo
1Mtswai, rngagun maku hini ka bnege huwe Utux Baro kana pssliyan Makedon: 2Dheya we moda pnsengan paru pqraqil ciida, ida stngayan qaras. Ida krinah ptuura ghhuwe daha mege dnayo meniq ckceka qrinuc riyung daha. 3Tduwa ku pgkela, dheya we pnooda beyax daha ma, wada hmrinas beyax daha psseli ddayo. Ini pnkeeyux, 4meyah muri ba mrengo klaali yami. So srwaun ka dheya maha niqan qneepah daha malu noda dmayo dseediq mrtaso. 5Kiya de noda daha we, uxe wano muyu snluwan miyan, wada muyu bale lnglungan Utux Baro sbege daha ka dheya nanak ma, sbege na yami uri. 6Maanu so kiya de, dmudul ku rmengo Titos, gisu namu prading meepah malu qneepah ckceka namu de, asi namu ka qhdeun qmeepah. 7Yamu we mttilux riyung ka snhiyan, knkela rmengo ma, gnkela namu. Kiya uri we gnaalu namu yami we wada mgkala seediq. Maanu so kiya de, meniq malu qneepah nii de asi namu ka mgkala seediq qneepah namu uri.
8Kari rnengo mu nii we, uxe ku nii rmengo kari pnosa. Gisu mu spooda kndrumuc seediq smeung yaa bale ba pneyah lhebun ka gnaalu namu. 9Klaun namu ka gnhuwe Yesu Kiristo, mttuku riyung ka heya. Ririh yamu de wada qrinuc ka heya da. So maha ririh qrinuc na wada ta mttuku riyung ka yamu. 10Quri qpahun nii we wada mu srengo yamu ka lnglungan mu, kiya ka maha niqan ririh na yamu. Ado wada namu prdingan mooda ka nii, kiya uri we pnrdingan lnglungan namu we wada 1 knkawas da. 11Maanu so kiya de, asi ka qhdeun moda ka qpahun nii. Niqan lhebun namu mooda de, pdai dnoi namu qhedu qmeepah uri. 12Ado nasi niqan lhebun daha meepah ka seediq we, maha qrasun mangal ka dnoi na. Uxe spooda uxe daha dnoi. 13Uxe ku nii pqbqerus yamu ma pslokah seediq icil. Asi ka ptnaun kana: 14Kiya ka mnsngari knttuku namu we maha pttuku knuuka daha. So maha pttuku knuuka namu nexal uri ka knttuku daha. So kiya de maha pntena kana da. 15Mntena pnatis ga spatis Patis Mrtaso:
“Ini sngari ka egu nangal,
Ini kuuka ka biciq nangal uri.”
Titos ma Thiqan na Meepah
16Qrasun ka Utux Baro, wada na psaun ckceka lhebun Titos ka kndrumuc mu yamu. 17Ani wada mbahang dnudul mu ka heya we, wada krinah meepah ka heya dungal. Smruwa mquri yamu hiya. 18Yami we smnkagul namu 1 mtswai mptheyaq heya mosa. Seediq nii we wada mangal tndhuun kana pssliyan meniq noda na gmarang malu kari. 19Uxe wano kiya. Heya we gneegan kana pssliyan ppsuupu na qmeepah yami, dnurun namu pnsseli dnayo we wada nami sbege da. Nii we pkledax nami Bukung ma, ptuura nami malu lnglungan nami. 20Wada so nii ka noda nami we, so uxe mpgao yami wada nami mangal egu pila pssliyan nii ka duma seediq. 21Yami we qmlahang nami meepah malu ooda. Uxe wano meniq berah Bukung, meniq berah seediq we so kiya uri. 22Skgulan miyan msuupu dheya uri ka 1 mtswai. Kndrumuc seediq nii we, wada miyan pseengun da. Saya de, ririh snhii bale yamu de, mdrumuc riyung meepah ka heya da. 23Quri so Titos de, heya we bais mu, kiya ka tnheqan mu meepah dyamu. Quri so 2 mtswai kiya de, snkgulan kana pssliyan ka dheya ma, kiya ka knledax Kiristo. 24Maanu so kiya de, yamu we ida asi namu ka ptrwaun gnaalu namu ma, pgkela wada mu stndahu quri yamu meniq berah kana pssliyan.
Currently Selected:
2 Korinto 8: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
