1 Korinto 16
16
Pnsumu Ddayo Dsnheyi
1Quri ka psseli pila bbege malu mrtaso tnugsaan, wada ku hmuwa mesa rmengo pssliyan ga Garatia we so kiya moda ka yamu uri. 2Prading ali knkingal cenga sngayan, txtaxa namu we pygaani so nangal namu we ngali duma ma seku nanak. So uxe namu hani psbarah psseli meyah ku ciida. 3Dehuk ku de so ima ka skgulun namu pnatis namu ciida we kiya ka skgulun mu. Dheya ka maadis pnseeli namu mosa Yerusalem. 4Nasi ku ida asi ka mosa we mpsuupu yaku mosa ka dheya.
Lmngelung Ddaun
5Mkmooda ku Makedon. Bobo mnoda ku Makedon de maha ku yamu hiya da. 6Yaa ku mtheyaq tikuh yamu hiya, uxe uri we betaq ta msuupu hmrinas misan. So kiya ge, ani ku mosa ani inu we tduwa namu smkawe kenan. 7Ado ini ku sruwa mosa mita yamu ka mkleelu ku han. Nasi mnoda lnglungan Bukung we kmptheyaq ku meniq yamu bsiyaq hari. 8Kiya de ida ku meeniq Epesos betaq smseman 50 ali. 9Ado wada mtraguh kenan ka rhengun paru tteme mu qmeepah ma ida hbaro ka hmetur uri.
10Nasi meyah ka Timoteos we ndwai ba mita, uxe na kkiicu meniq ckceka yamu. Ado heya we mntena kenan qmeepah qpahun Bukung. 11Maanu so kiya de ani ima we iya sbiciq qmita heya. Psbleyaq lnglungan na smraki eeyah na kenan. Gisu mu psmyahun msuupu mtswai meyah ka heya.
12Quri Apollos mtswai ta we pllayun mu dmudul ppsuupu na mtswai mosa yamu. Kiya de ida uxe lnglungan na ka oosa na saya han. Niqan oosa na de ida mosa da.
Kari Tnhiti
13Kiiyo, pgdehu mheyu ckceka snhiyan, kremun, kbeyax. 14Ooda gnaalu qmeepah ani maanu qpahun namu.
15Mtswai, sapah Stepanas ge, plaale snhii Kiristo Aqaia hiya ma wada daha sqeepah quri malu tnugsaan ka heyi daha we ida namu klaun. 16Mdudul ku yamu. Bhangi ka so nii seediq ma kana msuupu dheya qmeepah ma msuupu dheya mpbqerus. 17Akaikos Qrasun mu bale ka nyahan Stepanas ma Portunatos ma Akaikos. Ado uka namu hini ciida, meyah pttuku qnaras mu ka dheya. 18Ado wada daha kbyaxun ka lnglungan mu ma lnglungan namu uri. So nii seediq we sprui ba mita.
19Kana pssliyan Asia we gaga rmengo malu namu ka dheya. Akulas ma Priska msuupu pssliyan sapah daha we, gaga rmengo malu namu mesa bale yamu meeniq Thlangan uri. 20Kana mtswai we gaga rmengo malu namu ka dheya. Oda mrtaso ba pnttnguhan mpprengo malu namu ka ddyamu.
21Yaku Poro we baga mu nanak ka matis “Malu namu ho” mesa ku yamu. 22Nasi ini gaalu Bukung ka ani ima we maangal snyusan ka seediq nii. Ah! Bukung! Aguh! 23Tai so mpsuupu meniq yamu ka huwe Yesu Bukung! 24Tai so mpsuupu meniq yamu ka gnaalu mu ckceka Kiristo Yesu!
Currently Selected:
1 Korinto 16: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
