Pa lo Salomõ 1
1
Ɔsɨn pa kam kujt lo ngar
1Pa kɨmaj tɔi pag tube,
pa lo Salomõ.
(Ngomand)
2I nju tam kɨ njuta loi
kɨta tar loi maj tɔi kasɨnduu.
3Sé yib loi ot mbĩ,
tɔi tit yib kɨkootmbĩ kɨtud,
kɨta 'nten ngan kɨ mandg tarɨn ne ye.
4Ɔrrɨm goit, ad j'ãi ngɔd nat.
Ngar aw sem kam kujt lon.
Jĩ j'a kɨ ɗa ronel kɨ kamnda kɨtakuli.
J'a kɨ ndub tɔ tar loi tɔi kasɨnduu.
I goɗobat kad tarɨn titbe.
5Mĩ ngon kɨdẽ kɨ m'ɓa m'kɨrre, na m'mand ngãi,
ngan kɨdẽ kɨ Jerusalem.
Mĩ tit kujkubg kɨ Kedar,
mĩ tit kubganglo lo Salomõ.
6Ot koom ndã kɨta ndarɨm kɨ ɓa m'kɨrre,
i kàd la ɔsɨm ye.
Ngankomg ɗan sem wong,
ndamɨn kad mĩ ngegom dɔ ndɔɔ nduu,
na ndɔɔ nduu lom la m'ngom al ye.
7Elɨm, in ngarkam tari.
Lokɨɗah i ndɨ ul batg loi,
ke lokɨɗah i ad'd taankòt
kɨ kad kɨ ɗa dan ɓe.
Kɨtɔɗi m'a mĩ'n tit ngedai dõ,
kɨlog papa go ɓut batg lo namig a?
Ngan kɨdẽg turɨn pa
(Ngéngombatg)
8Ĩla i ger al a ne,
in i mand tɔi dekɨdẽg tube,
i tee, un go bangnja nyakulg,
i ul ngan bĩãg loi
kad kujkubgt lo ngéngombatg.
Ngar elta kɨ ngetar lon
(Dekɨdɨngã)
9In ngetar lom.
M'ooi tit kõ sɨnda in dɔɔna ta
pusɨt lo ngar Paraõ.
10Kɔti maj ngãi mbɨna medkɔsɨ,
kɔi maj ngãi,
i kɨ pare kɨ med perlg.
11J'a kɨ ɗa nyapare kɨ nar ɔr jadi,
j'a kɨ ndah nar arjã dɔt.
Ngon kɨdẽ ndɨ gah dɔ ngetart lon
(Ngomand)
12Lon ngar ndɨ dɔ tɨrat lon ye,
sé yib nard lom oota mbĩ.
13Kokɨromt m'oo ngetar lom tit ɓɔl myrr'n
to mbɨna mbamt.
14Kokɨromt m'oo ngetar lom tit
bɨra kand hine be,
kam ndɔɔ nduut kɨ En Gedi.
(Dekɨdɨngã)
15I mand ngãi
I nam kɨ sɔl lom lom,
i mand tɔi dɔ.
Ad kumi maj ngãi tit kum derrngɔt be.
(Ngomand)
16Ĩ kaa ne, i basa ngãi
ngetar lom, i maj takum'mt.
Tɨra loj i mũ kɨmbool.
17Kag kuj loj i kag sedɨr,
kag kutdɔ kuj loj i kag sipres.
Currently Selected:
Pa lo Salomõ 1: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
