Mark 2
2
Jeju yoot ngerokoinjɔr
(Oo Mat 9:1-8; Luk 5:17-26)
1Ndɔg tɔin ngonsĩ kamla Jeju tel ɗe Kapernawmt gog; deg oon hoi ndia kuju. 2Taa ne, deg ngãibe kawɨn na kɨ nat, ad lo ndɨ goto kam kujt, ke tabit kud kuju kaa ne goto. Jeju eld ta lo Luwah. 3Deg ɗen roat kɨ de mad kɨ ngerokoinjɔr. Deg sɔɔ la tɔna ye. 4Na kɨta koosɨdeg ye, asɨn tɔi sia dɔdt teen ne ro Jejut al. Kɨtɔ 'nten, nduun dɔ kuj'n Jeju ndɨt nõ, lon mbutɨn dɔ kuj woi ye, tuin ngerokoinjɔr kam nyatoat kɨ ber nõ Jejut. 5Lon Jeju oo kadkam lo deg'n non kad i kadkam Luwah kɨ jeje ye, el ngerokoinjɔr an: Ngonɨm, majalg loi ĩn kɨ nyàgo kɔ. 6Na kɨmadg ku ngéndang maktubt ndɨn ku koosɨdegt nõ; ndɨ gaan ta kamdt anan: 7Kɨtɔɗi de'n ndɨn ndɨ elɨn ta titbe a? Ndɨ elta kɨmal dɔ Luwaht. Nõ asɨ nyàgo majal lo deg kɔ a? Luwah kɨɗabe tã la asɨ ye. 8Tajigt, Jeju ger kam ndilɨnt ɓet, nyan ndɨ gaan kamdt ad eld an: Kɨtɔɗi i ndɨ i gaan ne tag kɨ titbe ngarkamsɨt a?
9Kɨ ɗa õ al tɔi a? I soot kad de el ngerokoinjɔr an: Majalg loi ĩn kɨ nyàgo kɔ a ke kela kan: I ɓai dõ un nya toi, na i ɓaning a?
10Kɨtɔkad gerɨn Ngon de ndɨ kɨ tɔg dɔningt ne kad nyàgo majalg lo deg kɔ ye; Jeju el ngerokoinjɔr an: 11M'ndɨ m'eli m'an: I ɓai dõ, un nyatoi, na aw ɓe loi.
12Tajigt, ngerokoinjɔr ɓai takum degt, un nya ton, na tee aw, ad ta ya deg tube, ad ɔsɨngon Luwah anan: J'oo nya kɨ titbe nja kɨɗa al.
Jeju kun Lebi
(Oo Mat 9:1-17; Luk 5:27-39)
13Jeju tel aw ta bahbo kɨ Galilet gog. Deg tube awɨn kɨ roat ad ndood. 14Lon Jeju a tɔi ye, oo Lebi ngon Alpe ndɨ lo tirr dɔ nyat na ela an: I ndulo gom. Lebi ɓai dõ, na ndulo go Jeju. 15Goot a ne, Jeju ndɨ ta nyasat kam kujt lo Lebi. Deg ngãibe ndɨ san nya nat kɨ Jeju, ad i ngétirrdɔnyag kɨ ngéɗamajalg. Kɨtɔ deg'n non ngãibe ndulon goa. 16Na lon parisɨ madg, kɨ ngéndang maktubg oon Jeju ndɨ sanya sed ngéɗamajalg kɨ ngétirrdɔnya ye, elɨn ngéndoog loa anan: Kɨtɔɗi Ngesɨ ndɨ sanya ho, ndɨ ãi nya ho sed deg ngétirdɔnya kɨ ngéɗamajalg a? 17Jeju oo dɔ tag'n elɨn nõ ad eld an: Ngérongang hã a geen dɔktor al, na ngéyotog tã.
Jeju elta dɔ kɔgro nyasat
18Ndɔ madt, ngéndoog lo Jã kɨ ngeɗa deg baptem sed Parisɨg ɔgɨn rod nyasa. Deg ɗen elɨn Jeju anan: Ngéndoog lo Jã kɨ kɨ lo Parisɨg ndɨ ɔgɨn rod nyasa, na kɨtɔɗi ngéndoog loi, ndɨ ɔgɨn rod nyasa al a? 19Jeju turd an: Lon de kɨ ngetaa dekɨdẽ kij i nat kɨ namɨng ye, namag asɨn kɔg rod nyasa a? Kaglot tube'n i nat sed ye, a asɨn kɔg rod nyasa kɨ nyakãi al ho. 20Na kaglo a ɗe nõ lon a unɨn de kɨ ngetaa dekɨdẽ kij rodt kɔ, nõbe la a ɔgɨn rod nyasa ye.
21De kɨ ja ta halang kub kɨ kij lan lew kub kɨ kõn goto, kɨta ta kub kɨ kij'n lan ne lew ye, a ɓai kɨ kõn kub kɨ tant, ad kõn kub til tat tɔi kɨ kete ɓaitɔ. 22De kɨ asɨ kut kasɨnduu kɨ kij kam galgt kɨ kon goto ĩla i titbe a ne, kasɨnduu kɨ kij a ndu galg, ad kasɨnduu tuj kɔ, kari na sumba kad utɨn kasɨnduu kɨ kij kam galgt kɨ kij.
Ngon de i kɨ tɔg dɔ ndɔ taakòt
(Oo Mat 12:1-4; Luk 6:1-11)
23Ndɔ taakòt mad lo Juipg, Jeju a gang kam ndɔɔ nyakot, ngéndoog loa mbã girr tet dɔ nyako go tɔidt kɨ njad dõ. 24Parisɨg elɨn Jeju anan: Oo kɨtɔɗi ngéndoog loi ɗan nya kɨ sumba kad de ɗa kɨ ndɔ taakò al a? 25Jeju turd an: I dan ta 'nten nja kɨɗa kam maktubt ale? Ta dɔ nyat'n ɗa nya: Ndɔ mad ɓo õ ngar Dabid kɨ deg'n ĩn nat sia, na awɨn kɨ nyasa al. 26Dabid and kam kujt lo Luwah. I kaglot'n Abiatar i bɨra ngejanyamosɨkadkari kɨbo. Dabid sa bɨna kɨ la kadkarit kad Luwah, na telɨn ad deg'n ĩn nat sia. I goɗobatal kɨgo mberkɨndat lo Moij kad de kɨnõbe sa bɨna'n non, na de kɨ i ngejanyamosɨkadkari tã. 27Jeju eld an: Luwah ɗa ndɔ taakò kɨta deg, na deg hã ĩn kɨta ndɔ taakò al. 28Kɨtɔ 'nten Ngon de i kɨ tɔg dɔ ndɔ taakòt.
Currently Selected:
Mark 2: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
