Ejai 9
9
1Deg kɨ ngéndia kam tilt ye,
oon kunj mad kɨbobe;
dɔ ngéndɨ dɔning ndilt,
kunj unj.
2Ad deg ɗan ronel kɨbobe.
Ɗan ronel nõit
tit'n a ɗan ne ronel
kaglo teet nyakot,
tit'n deg a ɗan ne ronel,
lon a kegɨn na
nyatetɗɔɔ be.
3Kɨtɔ jug ɔi dɔdt,
kag i dɔ bɔgat,
i tetd tit'n i tetɨn ɗɔɔ Madiãg be.
4Sanja lo ngeɗɔɔ kɨɗen'n ad dɔning ye,
kubji kɨɗen kɨ ndusɨ kam mosɨt,
horr a õ mugɨj.
5Kɨtɔ ooj ngon adj,
adj ngon kɨdɨngã,
Kõɓe a i dɔ bɔgat,
a ndan tɔa:
Kɨmaj ngãi,
Ngekogota kɨmaj,
Luwah Ngetɔg,
Bɔw kɨ mbãkɨnõt,
Ngar kɨ sɔl lom.
6Kõɓe loa a aw kɨ ketekete,
a ad lapia kɨ dɔboa goto,
a ndɨ dɔ pong kõɓet lo Dabid,
na kɨta kõɓe loa kɨ a nda
a ada ɗa bijir,
na ɔsɨ goa kɨ dõ
dɔ rotat kɨ denesew,
tajigla kɨ mbãkɨnõt.
Tĩrokat lo Bɨraɓe Ngetɔg
a tɔlkon nya 'nten.
Wong lo Bɨraɓe kɨdɔ Israelagt
7Bɨraɓe la kɨ ta lon ro Jakobt,
ad so dɔ Israelt.
8Deg tube kɨ Epraim,
kɨ ngéndɨ Samari a gerɨn ɓet.
Elɨn ta kɨgo dɔngangt,
kɨ burokɨga kamdt, anan:
9Ndogbɔrrg tuson,
j'a kɨ ɗa kɨ mbalg kɨ tɔsɨ;
kag ɓɔlg in kɨ gang kɔ,
j'a kɨ mbeld kɨ kag sedɨrg.
10Na Bɨraɓe a sɔkɨ
madngétasɨg kɨtakul Resin,
a sɔkɨ ngéndoorsɨ kɨ dɔsɨt.
11Madngétag'n non in Siriag
kɨ loɓakàdt,
kɨ Pilistiag ko ndidt.
Na kam nyagt'n non,
wong lo Bɨraɓe a dɨba al,
na jia ɗa kɨ dõ kɨta nda ɔjɨnd ɓaitɔ.
12Be kaa deg telɨn kɨ ro ngendadt al,
sahn Bɨraɓe Ngetɔg tube al tɔ.
13Titbe Bɨraɓe a gang dɔ Israel kɨ ɓonga kɔ,
a gang dɔj tumbur kɨ kadnya kam ndɔt kɨ kɨɗabe.
14Kɨbo kɨ de'n deg
ɔsɨn gona la i dɔ,
ngekelta kɨ ta Luwaht kɨ ngomɨn an:
ndɨ nelta kɨ ta Luwaht
kɨ ndood takɨbalt la i ɓonga.
15Ngékɔrrta ɗob deg'n non
ũnd mut,
deg'n ɔrrɨnd ta ɗob tɔ nujɨn.
16Kɨtɔ 'nten la Bɨraɓe a
ɗa ronel dɔ basagt lod al.
A oo kumtondo lo ngan halg
kɨ ngéngawkoig lod al tɔ.
Kɨtɔ in tube
in ngéɗa nya kɨgo
lo Luwaht al,
kɨ ngéɗamajal.
Takeld tube i kɨɓod
na be kaa wong lo Bɨraɓe duba al,
jia ɗa kɨ dõ ɓaitɔ.
17Kɨtɔ kamkil õ tit horr be,
õ kõng kɨ ngarg,
na õ mũ kɨnder kɨ kùt.
Sahorra su luilui kɨ dõ tit pilie be.
18Horr õ dɔning 'nten
kɨta wong kɨtɨngabil
lo Bɨraɓe Ngetɔg tube.
Na deg in tit nya sa lo horr be.
De kɨ oo kumtondo lo ngonkõn goto.
19A sahn kokõt, na ɓoo a ɗad ɓaitɔ;
a sahn kogel,
na a ndanɨn al.
Dekɨɗen sa dã jin.
20Manaseag ndoorɨn Epraimag,
Epraimag ndoorɨn Manaseag;
in tujoo son kɔ Judat,
be kaa wong lo Bɨraɓe duba al,
jia ɗa kɨ dõ ɓaitɔ.
Currently Selected:
Ejai 9: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
