Amos Takɨdɔt
Takɨdɔt
Ɓal 760 kete nõ Jeju Krist't, Amos i ngekul nyag kam dɔning Judat, Luwah kuna ad aw dɔning Israelt kad elta kɨ tant. I kaglot lo ngar Jeroboam II Israelt ɓalg ngãi kaglo kõɓe loa deg ndɨn kɨ kam kɨsokɨber. Kõɓe kɨ Asiri ɗe laa ɗɔɔ al. Ngar Jeroboam mbagɨr ɗagat sed girrdeg kɨ dang dang ho mbahg ho, ad kõɓe loa ngah nya ngãi.
I kaglo kam kɨ sokɨber mbɨna degt kɨ nyangah la ngekelta kɨ ta Luwaht lan mber dɔboi kõɓe lo Israel kɨ ndɨ ɗe ye.
Ta'n Amos el i ta kɨngang la el ndoorɨn Israel ye eld ta kɨgang lo Luwah kɨta kad ngan Israel telɨn rod go mberkɨndat'n Luwah ad'd kad ngomɨn. Kidɨn ndikung lo Luwah. Deg'n tɔgd i tit ɓan dɔ ĩgɨn in tõ. Adɨn nyaɗa kɨ denesew tel nya kɨ kari. Ɗa nya kɨgo lo Luwaht tel nya kɨ pãbe ta kumd (Amo 4:4-5; 5:21-27). Majalg lo ngan Israelg aw sed kɨ koit. Amos elta dan dɔ ɓebo Samari, lon ngekõɓe ndɨt ho. Nyangahg i tit ho. Ndɔ ndil dan dɔ lo kɨ Betel in i lo kɨjaɓat kɨta la kadkari kam dɔning Israelt. Lot'n non la ngejanyamosɨkadkari Amasia ndoora tit (Amo 7:1-17). Go nyagt'n non tuɓan Amos kɔ dɔning Israelt.
Maktub lo Amos kad kɨ da maj ye kɨ gang asɨ lo mɨta: Ɓai dɔ ɗob ninat 1-2 elta dɔ tat kɨ gang dɔ Israelt kɨ girrdeg kɨdangdang'n in madɓeg lo Juda kɨ Israel. Girrdeg'n non takɨgang so dɔdt kɨta nyag kɨ majal'n n'ɗan. Gangɨn ta dɔ Judat kɨta tɔi dɔ ndɨ Luwah. Majal lo Israel, i nyaɗa kɨ goot al n'ɗa ad deg in kam ndo kɨ mbɨrã deg mbet Luwah ho. Ɓai dɔ Amo 3:1—6:15, Luwah ndáng Israel kɨta kasɨ kɨ asɨ al. Na i Luwah la kɔta ho ɔrra kam ɓert ye (Amo 2:10-11; 3:1-2). Na Israel tel girrdeg kɨ ndɨ ɗa kum deg kɨdangt kɨ ngendog. Kɨgo pa ndiat, ndɨ taj Luwah tã, na ɔsɨgona al. Kɨtɔ 'nten la Luwah gangɨn ta dɔat ye.
Ɓai dɔ Amo 7:1—9:15 elta dɔ nyagkookamndilt lo ngekelta kɨ ta Luwaht. Nyag kɨjoo kɨdasa (Amo 7:1-3; 4:6) ad kɨ ger tit bãi Luwah ndɨn dɔt sej. Nyag kɨjoo kɨ got (Amo 7:7-9; 8:1-3) elta ɔjɨn dɔ ta kɨgang lo Luwah dɔ girrdegt lon. Na nya kɨ dɔboit a ne, ɔj go tit bãi Luwah a gangɨn ta dɔ degt kɨ nyakulg. Dɔboi Amo 9:11-15 elta dɔkaglot lo Luwah. Luwah tel kɨ kumkajir ad deg lon. Kam maktub lo Amos kɨ taagbe lon ndɨ kɨ da ye j'a kɨ j'oo tit bãi Amos ndɨ ɔjɨn kadkam lon Luwah kɨ tɨga wakɨsɨ. Ger kad Bɨraɓe la ndah nyag ye, ndɨ oo go nya ndahg lon, ĩ tɔ la ɓet a gangta dɔdt ye.
Amos i ngekelta kɨ ta Luwaht'n elta dɔ Luwaht kad i Luwah kɨ denesew. El kɨ tɨga wakɨsɨ ad Israel oo nya'n Luwah ɔsa ta ho, ndig al ho.
I titbe la tag lo ngekelta Amos ton lo todt kɨ kaglo tube ho, to kɨtaj ɓone ho.
Currently Selected:
Amos Takɨdɔt: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.