Amos 4
4
Luwah elta ndoorɨn dekɨdẽ ngénya
1Oon dɔ ta 'nten ĩn dekɨdẽg kɨ dɔning Samarit,
ĩgɨn i boon mbulmbul tit kõ mangg kɨ dɔning Basant,
ĩn ngéɗa kumndo ngéndog
kɨ ngéɗa ta kõ kɨ de kɨdangtg.
I ndɨ elɨn ngawsɨg anan:
I ɗen kɨ nya kãi ad j'ãin
2Bɨraɓe Luwah nda yo an:
Tit'n mĩn kɨkunjɗang ye:
Oon ndɔg a ɗen dɔsɨt,
a hɔsɨn kɨ kongg awɨn sesɨ,
a gan ngankamsɨg kɨ kuig awɨn sed,
3Bɨraɓe el an: A i teen kɨ buro ndogbɔrrg kɨ tet
dekɨɗen a ãin kɨ nont kɨta kaj ron,
Madngétasɨg a tuɓasɨ mbã dɔ mbalt kɨ Hermõ.
Kel Bɨraɓe.
Luwah nda ɔj Israelag na telɨn kɨroat al
4Awɨn kuj ndub Luwaht kɨ Betelt, kad i ɗan nya kɨ majal.
Awɨn lo la kadkarit kɨ Gilgal, kad i ɗan majal kɨdɔtdɔt.
Ndɔ kɨɗen i teen kɨsĩ ritit, kad i lan kadkarig losɨ.
Ndɔ kɨkõmɨta kɨɗen, i ɗen kɨ gaj kɨɗa ku kɨ kɨlaht losɨ.
5Bɨraɓe el an:
I lan horr kadkarig kɨta ɗa mersi
nat kɨ nyasa kɨ ɗa kɨ berrkasɨ.
I lan mber kad deg tube gerɨn
kadkarig losɨ kɨ la kɨ kamndig.
Kɨta nyaɗa kɨ titbe nelsɨ ngãi, Ĩn Israelag
kel Bɨraɓe.
Bɨraɓe elta ngan Israelg set
6Ĩ mĩ la mad ɓoo so kam ɓebogt losɨ tube
Ĩ mĩ la mad i nalɨn nyasag londɨsɨgt tube.
Be kaa i telɨn kɨromt al.
7Mĩ, m'ɔgsɨ man ndii,
lon kaglo ja nyako nãi asɨ nah mɨta ɓaitɔ.
Mad ndii ed dɔ ɓet mad,
na ɓe mad mad ndii ed kamt al.
Ndɔɔ mad ngah man
na ndɔɔ mad'n ngah al ye, tut.
8Titbe ɓebog joo ke mɨta awɨn kam ɓebot mad
kɨta kãi man,
na asɨ tɔl kɨndad al.
Be kaa i telɨn kɨromt al,
kel Bɨraɓe.
9M'tuj dɔning losɨ kɨ mõi mad
kɨ a tɔl nyako kad kum nyako ɓa muro tɔ.
M'nuj ndɔɔg losɨ kɨ ndɔɔ nduug losɨ.
Kɨbetg san kag mbaiɓoodg kɨ kag olibg.
Be kaa i telɨn kɨromt al,
kel Bɨraɓe
10M'la yokoosɨ dãsɨt tit'n m'lan dɔning Ejipt't maɗi,
mad tɔlɨn basag losɨ kɨ kiyaɗɔɔ,
mad hɔn sɨndag losɨ awɨn ne,
mad londɨsɨ ot gã bulo kõnsɨt.
Be kaa i telɨn kɨromt al,
11M'nuj kɨmadg kusɨt
tit deg kɨ Sodom kɨ Gomor
ĩgɨn Luwah nujd, na i titɨn kɨ ta kir horr
kɨ de ɔrr kam horrt be.
Be kaa i telɨn kɨromt al,
kel Bɨraɓe
12Kɨtɔ 'nten, ĩn Israelag,
a oon nya'n m'a m'ɗa sesɨ nõ.
Tit kan m'a m'ɗan sesɨ nya 'nten,
i ɗan go rosɨ, ĩn Israelag,
kad i ndɔdɨn Luwah losɨ.
13Oon ngeɓah mbalbog kɨ ngendah nél
kɨ ngekad de ger tagah lon,
ngembel lo kɨ tĩ kad tel lo kɨ diw til,
ngenda dɔ logt kɨ dõ dɔ dɔningt,
tɔa i Bɨraɓe Luwah Ngekoosɨg.
Currently Selected:
Amos 4: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
