Kɨlag 24
24
Juipg lan ta dɔ Polt nõ Pelikst kɨ ngekõɓe
1Ndɔ mi got, bɨra ngejanyamosɨkadkari Ananias ɗe kam ɓebot kɨ Sejaret nat kɨ kɨbog lo Juipg, kɨ de mad nge koo goosɨ ɓalta kɨ kel ho, tur ho, tɔa i Tertulus. Ɗe sekɨn Pol ta Pelikst kɨ ngekõɓe. 2Ngekõɓe lago Polt ad ɗen sia. Kamla Tertulus mbagɨr tet ta kɨ dɔat an: Ĩ Peliks. Ngemaj kɨ tɔitɔi, kɨtakul hal koogo nya kɨ goa goa i ɗan go nyag tube ad son go nat ad lapia kɨ jeje to mbɨna girrdegt loj. 3Jĩ taa, kɨ log tube, kɨ dɔ kaglog tube tɔ kɨ taa nyag'n non kɨ mersi kɨ ɗa. 4Na kɨ ndig kun kaglo loi ngãi al, kɨta 'nten, m'kɔi kad i ndɨdɔt sem ngonsĩ, na kɨ oo dɔ ta loj. 5Kɨtɔ j'oo de'n ɗan i de kɨmajal ngãi, lo kɨɗen aw tit a ne a la dɔ Juipg nat, kamla i bɨradɔ ɓut deg'n a ndulon go nyandoo kɨ kij kɨ gootal lo Najareag. 6De'n ɗan, sah kɨ n'tel kuj ndub Luwah nya kɨyerrt, la kɨ hɔa ye. Kɨ ndig kad kɨgangta dɔat kɨgo mberkɨndat loj ho. 7Na Lisias kɨ bɨradɔ ngéɗɔɔg ɗe taa jijt kɨ lo ngetɔgt. 8Kamla Lisias ndamber kad ngélata dɔat ɗen nõit ne. Ye ĩla ĩ kɨɓe kɨ dɔi i ndɨjea ta oo a ne, a asɨ ger girr rota dɔ nyat'n ndɨ kɨ lan ta dɔat. 9Juipg ndan tad nat kɨɗabe son ne go tat lo Tertulus anan: Nyag'n non i titbe.
Pol elta ɔrrɨn ta dɔnt nõ Pelikst kɨ ngekõɓe
10Ngekõɓe mbɔj Pol kɨ jin kad elta. Pol elta an: Tit'n m'gerɨn ɓalg ngãibe ĩ ngegangta lo girrdeg'n ɗan ye, kɨ kam kɨsokɨber la m'a m'elɨn ta nõit kad m'ɔrrɨnta dɔmt. 11Kɨtɔ asɨ nder girr ta'n m'ɗa m'el ɓone. Asɨ ndɔ kɨlah gidaijoo al la m'aw kam ɓet kɨ Jerusalem kad m'ɔsɨ dɔm ber nõ Luwaht. 12De kɨ ngahm kam kuj ndub Luwaht, ke lo kawnat lo Juipg, ke kam ɓet ad m'majta kɨ de ho, m'ɗa m'la dɔ deg nat kad taan ɗɔɔ ngékõɓeg goto. 13Tag tube'n deg'n ɗan ɗa ɔin kɨ dɔmt tajigla ye, najkɨma kɨ rota goto kamt. 14Na nya'n m'asɨ tɔ tam dɔt nõit la ten: M'ndɨ m'ɗa kɨla mad Luwah lo bɔwɨmg kɨgo ɗob lo Bɨraɓe'n hã ɗa kunɨna nyandoo kɨ kij kɨ gootal. Na mĩ taa ne, m'ndig dɔ tagt tube'n ndangɨn kam maktubgt lo ngékelta kɨ ta Luwaht. 15M'aw kɨ kam kɨndahdɔt'n m'nda dɔ Luwaht, ngélata dɔmt kaa ne, awɨn kɨ kam kɨndahdɔt kɨ kɨɗa'n non: I ngoo ndɔ'n Luwah a ad ngékoig ɓain lo koit, deg kɨdenesew kɨ deg kɨmajal tu. 16Kɨtɔ 'nten la m'ɗa ndurɨn yom kad kam hɔm kɨ ta al, kɨ pa ndiam i kɨɗingg nõ Luwaht ho nõ degt ho ye. 17Ɓalg ngãibe m'goto Jerusalemt. Go ɓalgt'n non m'tel m'ɗe gog Jerusalemt kɨ mad girrdeg lom kadkari kɨ kad Luwah ho. 18M'ɗa nyag'n non kam kuj ndub Luwaht. Lon Juip madg ɓain dɔning Ajit ɗe ngahmɨn ye, m'ar rom kɨgo nyabelɓet loj. Koosɨdeg'n nat sem al ho, kɨse kaa ne goto ho. 19Ĩla deg'n non awɨn sem kɨ ta mad a ne, sumba kad ɗen nõit ne kad lan ta dɔmt. 20Ke ĩla i be al kaa ne, lon awɨn sem nõ ngégangtat lo Juipg ye, deg'n ɗan ɗan ye ngahn ta mad kad lan ne ta dɔmt e? 21Dumbit a ne, ko'n m'ko mborɨr kudt kɨ tɔgɨm m'an: Mĩ kɨ kam kɨ ger ɓet kad Luwah a ad ngékoig ɓain lo koit. Ye a i kɨta ta'n m'el nõ wan la ɗa gangɨn ne ta dɔmt nõsɨt ɓone ye. 22Na Peliks taa, ger ta kɨ dɔ ɗobt lo Bɨraɓe maj ngãi. Kɨtɔ 'nten la gangta tajigt al na el Juipg an: M'am gangta losɨ lon Lisias bɨradɔ ngéɗɔɔg a ɗe kamtã. 23Peliks ndamber asɨgar kɨbo kad ngom Pol, na kɨ nyàgoa nyanglé; kɨ ad ta ɗob madkɨlag kad ɗan sia tɔ.
Pol elta ɔrrɨn ta dɔnt nõ Pelikst kɨ nẽa Drusil
24Na gog go ndɔgt'n non ye, Peliks ɗen nat kɨ nẽn Drusil'n i Juip, ad lan go Polt kad ɗen sia, na nel mbin oon dɔ ta kɨ ɔj go kadkam Krist Jeju. 25Na lon Pol ndɨ ɔrr girr ta kɨ ɔj dɔ nyaɗa kɨdenesew, dɔ kɨre ro njirir dɔ majalt kɨ ɗa ho, dɔ tat kɨ gang lo Luwah'n a ɗe dɔ duniat ye, Peliks ɓool ad kama gang man ngalang. Taa ne, el Pol an: Asɨ titbe ta, aw tajigla, na ka lon m'ngaa dɔ kaglo a ne, m'a m'la m'kuni kad m'oo dɔ ta loi ɓaitɔ.
26Peliks ndah kamɨnt kad ɓet Pol a adɨn nar; kɨta 'nten la ndɨ kuna'n sẽ kad dan ta sia ye. 27Na lon ɓal joo asɨ woi ye, Porkus Pestus ɗe gagoot Peliks, na tit kan Peliks ndig kad'n nel Juipg ye, nya Pol kɨ kam dangait.
Currently Selected:
Kɨlag 24: MlL
Highlight
Copy
Compare
Share
Want to have your highlights saved across all your devices? Sign up or sign in
Mbai Bible Revision © Bible Society of Chad, 2015.
