Кердипэ 47

О фараони тай о хорандас э Иосифеско

1О Иосиф гело ко фараони тай пхэнляс лэски:

— Мо дад тай мэ пхрала пумарэ атарэнца, э барэ тай э тикнэ гайваненца тай алаи пумарэ мангинэса алэ катар пху Ханаан тай анкха си андэ Гошэн.

2Ов лиляс панджен андар пхрала тай тхэдяс лэн ангал фараони. 3О фараони пхучляс э пхралэн:

— Со тумэ галён тэ керэн?

Он пхэнлэ э фараонески:

— Тэ иргатя — чёбаня, сар амарэ дада. — 4Генэ он пхэнлэ: — Амэ алям атхэ тэ бэшас, вай ки пху Ханаан бари бокх тай тэ иргатенги нанай катэ чярярэн о атарэс. Оничин мук тэ иргатен тэ бэшэн андэ Гошэн.

5О фараони пхэнляс э Иосифески:

— То дад тай тэ пхрала алэ тутэ. 6Э пху Египти — ангал тутэ; дэ тэ дадэс тай тэ пхралэн о зиядэ котор адалэ пхуяко. Мэ бэшэн андэ Гошэн. Ай ту тэ джянэс, кон андар лэндэ лачес керэс бути, тхэ лэн тэ дикхен пал мэ гайванендэ.

7О Иосиф андяс пэ дадэс э Яковес тай сикавдяс лэс э фараонески, тай о Яков алгышты э фараонес. 8О фараони пхучляс лэс:

— Сокабор брэш туки?

9О Яков пхэнляс э фараонески:

— О деса мэ пхуримаски — шэлу триянда брэш. Мэ бэшлём на бут, тай алаи о брэша мэ пхеравас опэр пху тай дикхавас бут хурлуки. Мэ дада бэшлэ мандар бут тай зиядэ.

10О Яков алгышты э фараонес тай гело.

11Сар пхэнляс о фараони, о Иосиф андяс пэ дадэс тай пэ пхралэн андэ Египти тай диняс лэн зиядэ котор пху андэ пху Раамсес. 12О Иосиф диняс хапэ пэ дадэс, пэ пхралэн тай алаи пи порода, диняс кажне манушэс андэ хорандас.

О вахыти э бокхако

13Дэчи никатэ на сас хапэ, вай сас бари бокх; о Египти тай о Ханаан сас кхино катар бокх. 14О Иосиф кидиняс алаи э руп, савэ сас андэ Египти тай Ханаан, андар гив, саво лэстэ кинэнас. Ов гаравэлас ла андэ кхер ко фараони. 15Кана быты э руп андэ Египти ли андэ Ханаан, алаи о египтяня алэ ко Иосиф тай пхэнлэ:

— Дэ амэн манро. Соски амэнги тэ мэрас ангал тэ якхендэ? Амари руп быты.

16О Иосиф пхэнляс:

— Тэ быты тумари руп, анэн тумарэ гайванен, мэ кан паровав манрэски.

17Он андэ ко Иосиф э гайванен, тай ов диняс лэн манро паровдяс опэр грастэнги, бакрэнги тай бузнэнги, гурувэнги, гурувненги тай джёрэнги. Ов хавдярэлас лэн манрэса одова брэш, пароимаски алаи лэнги гайваненги.

18Кана о брэш накхло, он алэ лэстэ тай пхэнлэ:

— Амэ на кан гаравас амарэ сагбустар, кай амари руп быты, тай амарэ гайваня си тинрэ, тай амэндэ ништо на ачило тэ дас амарэ сагбус, булуб амарэ тэнендар тай амарэ пхуятар. 19Соски амэнги тэ мэрас ангал тэ якхендэ, ли амэнги, ли амарэ пхуяки? Кин амэн тай амари пху манрэски, тай амэ амарэ пхуяса кан овас иргатя ко фараони. Дэ амэн гугуся, амэ тэ бэшас тай тэ на мэрас, тай адая пху тэ на чючёл.

20Аякха о Иосиф киндяс алаи э пху андэ Египти э фараонески. О египтяня бикиндэ кажни пи ливади, вай э бокх тасавдяс лэн. Аякха э пху ули э фараонески, 21ай о дюняс э Иосиф кердяс иргатен, катар екх чети ки Египтеско джи аврэстэ. 22Ов на киндяс екх э пху э попазенги, вай он сальтя диндёнас паи катар фараони, тай адава паи, саво диняс лэн о фараони, лэнги рэсэлас хамаски. Аки соски он на бикиндэ пумари пху.

23О Иосиф пхэнляс э дюняски:

— Акана, кана мэ киндём тумэн тай тумари пху э фараонески, аки тумэнги гугуся, тэ чен андэ пху. 24Кана кан барел о гив, дэн о панджто паи лэстар э фараонес, ай окола штар пая кан овэн тумэнги гугуся э ливадянги тай хамаски тумэнги, э кхерутнэнги тай э пуенги.

25Он пхэнлэ:

— Ту кутардын амэнги о бэшыпэ. Тэ аракхас мила андэ якха амарэ сагбускерэ. Амэ кан овас о иргатя э фараонески.

26Аякха о Иосиф тхэдяс андэ Египти тхэдипэ катар пху, саво ли авдес зорало: панджто паи о гив си э фараонеско, булуб о гив катар пху ки попазенги, сави на ули э фараонески.

О совля Иосифески

27О израильтяня бэшэнас андэ Египти андэ область Гошэн. Лэндэ уло отхэ мангин тай сас лэндэ пуя, тай он бутилэ.

28О Яков бэшло андэ Египти дэшуэфта брэш, самким алаи ов бэшло шэлу саранда эфта брэш. 29Кана ало вахыти ов тэ мэрэл, ов диняс икос пэ чявэс э Иосифес тай пхэнляс лэски:

— Тэ аракхлём мэ мила андэ тэ якхендэ, тхэ то васт тал мэ шалостэ тай дэ збора, кай кан керэс манги мила тай чячипэ. Ма пароскер ман андэ Египти. 30Ай кана мэ кан мэрав, никал ман андар Египти тай пароскер отхэ, катэ пароскердэ мэ папудэс.

О Иосиф пхэнляс:

— Мэ кан керав аякха, сар ту пхэнлян.

31— Ха совля, — пхэнляс ов.

О Иосиф халяс совля лэски, тай о Израиль мангляс э Дэвлэс, астарэласпэс опэр пэ ровлятэ.

Currently Selected:

Кердипэ 47: КРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия опэр крымски романи чиб