Кердипэ 37
37
О сунэ э Иосифески
1О Яков бэшэлас андэ одолэ пхуятэ, катэ бэшэлас лэско дад, ки пху Ханаан.
2Аки о пхукаипэ катар Яков тай лэски пуендар.
О Иосиф, савэски сас дэшуэфта брэш, чярярэлас о атарэс э бакрэнца екхетханэ пэ пхралэнца — э Билхаки тай э Зилпаки чявэнца, э ромненги э Иосифески дадэски. О Иосиф пхукавэлас пэ дадэски налачё пэ пхралэндар.
3О Израиль дэхэлас э Иосифес бут алаи аврэ чявэндар, вай ов аракхлило лэски опэр пхуримастэ. О Израиль кердяс лэски бут шукара савутя. 4Кана о пхрала дикхлэ, кай о дад дэхэл лэс бут, ниш лэн алаен, он на дэхлэ лэс тай нащи лачимаса зборизэнас лэса.
5Екхвар о Иосиф дикхляс суно. Ов пхукавдяс лэстар пэ пхралэнги, тай он на дэхлэ лэс май бут. 6Аки со ов пхэнляс лэнги:
— Шунэн, со суно мэ дикхлём. 7Амэ пхандасас о снопя гив ки ливади, тай бирдэн мо снопи ваздиняспэс тай гортярдяспэс, ай тумаро снопя тэрдило агорял лэстэ тай бангилэ.
8О пхрала пхэнлэ лэски:
— Та со, ту кан овэс патишаи опэр амэндэ? Та со, амэ кан овас тутэ иргатя?
Тай он май бут холясаилэ опэр лэстэ андар лэско суно тай андар адава пхукаипэ.
9О Иосиф дикхляс генэ екх суно тай генэ пхукавдяс лэстар пэ пхралэнги:
— Шунэн, мэ дикхлём генэ екх суно: кай манги бангило о кхам, о чюнут тай о дэшуекх чергэня.
10Ов пхукавдяс о суно на екх пэ пхралэнги, ами ли пэ дадэски, тай о дад холясаило лэски:
— Со суно адава ту дикхлян? Та со, мэ, ти дай тай тэ пхрала чячес кан авас тай кан бангяс туки джи ки пху?
11О пхрала кизгандиенас лэс, ай о дад тюшундиелас адалэстар.
О пхрала бикнэн э Иосифес
12О пхрала гелэ тэ чярярэн атарэс пэ дадэски ко тхана андэ Шэхем, 13тай о Израиль пхэнляс э Иосифески:
— Ту джянэс, кай тэ пхрала чярярэн о атарэс паш ко Шэхем. Мэ мангав тэ бичялав тут лэндэ.
— Мэ газыри, — пхэнляс о Иосиф.
14О дад пхэнляс лэски:
— Джя дикх, алаи лачё тэ пхралэнца тай э атарэнца, тай эла пхэн манги.
Ов пхэнляс лэски адава ки ливади Хеврон, тай о Иосиф гело андэ Шэхем. 15Отхэ ов родэлас ко ливадя, бискай на дикхляс лэс мануш тай пхучляс лэс:
— Со ту родэс?
16Ов пхэнляс:
— Мэ родав мэ пхралэн. Мангав тут, пхэн манги, катэ он чярярэн пумарэ атарэс?
17— Он гелэ атхар, — пхэнляс о мануш. — Мэ шунлём, сар он зборизэнас: «Гадэн андэ Дотан».
О Иосиф гело пал пэ пхралэндэ тай аракхляс лэн ко Дотан. 18Он дикхлэ лэс дурал, тай ангал отхэ, сар ов пашыло лэндэ, зборисаилэ тэ мударэн лэс.
19— Аки авэл одова, саво дикхел сунэ! — пхэнлэ он екхаврэски. 20— Элан мударас лэс тай тэ чяс андэ шуки ханинг, ай амарэ дадэски пхэнаса, кай лэс халяс вэшэско гайвани. Дэчи кан дикхас, со кан никлёл андар лэски сунэндэ.
21Ай о Рувим шунляс тай кутарды лэс лэндар, пхэнляс:
— На, на кан мударас лэс. 22Ма чёрэн рат. Чен лэс андэ акая ханинг атхэ, андэ ливади, ай ма ваздэн опэр лэстэ тумаро васт.
О Рувим мангляс тэ кутардиел лэс лэндар тай тэ анэл ко дад.
23Кана о Иосиф пашыло пэ пхралэндэ, он пхаравдэ опрал лэстэ о савутя — одола, савэ сас багалыс сивдэ, — 24тай читэ лэс андэ ханинг. Э ханинг сас чючи, би панески.
25Дэчи он бэшлэ тэ хан, тай дикхлэ каравани э измаильтяненго, кай авэл андар Галаад. Лэнги камилэс сас пхэрдэ чяренца, бальзамеса тай мирраса#37.25 Мирра (ладан) — лачё смолас, саво аракхенас андэ кущёки ки Аравия. , савэ он гелэнас андэ Египти.
26О Иуда пхэнляс пэ пхралэнги:
— Со файдас амэнги, амэ тэ мударас амарэ пхралэс тай кан гаравас адава? 27Зиядэ тэ бикнас лэс э измаильтяненги тай тэ на ваздас опэр лэстэ амарэ васта; вай ов амаро пхрал, амаро тэни тай рат.
О пхрала пхэнлэ лачё. 28Кана о мадианскя бикинимаря накхенас пашал, о пхрала никалдэ э Иосифес андар ханинг тай бикиндэ э измаильтяненги бишэ рупунэ которэнги. О измаильтяня лилэ лэс тай гелдэ андэ Египти.
29Кана о Рувим ало ки ханинг, ов дикхляс, кай о Иосиф отхэ нанай, тай пхаравдяс опэр пэстэ о савутя. 30Ов ало пэ пхралэндэ тай пхэнляс:
— О чяворо отхэ нанай! Кай манги акана тэ гарававман?
31Дэчи он лилэ о савутя э Иосифески, чиндэ бузнэс тай макхлэ о савутя рат. 32Он гелдэ о багалыдэс сивдэ савутя пумарэ дадэски тай пхэнлэ:
— Аки со амэ аракхлям. Дикх, на о савутя адава тэ чявэски?
33Ов пэнджярдяс лэн тай диняс бэбэря:
— Адава о савутя мэ чявэски! Лэс халяс вэшэско гайвани! Эйами, о Иосиф сас джирдимэ котора!
34О Яков пхаравдяс опэр пэстэ о савутя, урявдяс гонэски савутя тай бут дес ровэлас пэ чявэски. 35Алаи лэски чявэ тай чяя алэ тэ аядиен лэс, ай ов на мангелас тэ аядиен лэс, пхэнэлас:
— На, мэ аякха андэ касывэтестэ, тай кан джяв андэ дюняс ки мулэнго, мэ чявэстэ.
Аякха о дад ровэлас пэ чявэски.
36Ай о мадианитяня одова вахыти бикиндэ э Иосифес андэ Египти э Потифарески, э фараонески ярдымарески, саво сас лэстэ баро опэр барэ.
Currently Selected:
Кердипэ 37: КРБ
Highlight
Share
Copy
Want to have your highlights saved across all your devices? Sign up or sign in
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/
