Кердипэ 31

О Яков тай лэски хорандадэс нашэн катар Лаван

1О Яков шунляс, сар о чявэ э Лаванески пхэнэнас: «О Яков лиляс алаи, со сас амарэ дадэстэ. Ов кидиняс пэски барвалипэ булуб амарэ дадэски». 2О Яков дикхляс, кай о Лаван сас лэса на аякха, сар буруни.

3О Сагбус о Яхвэ пхэнляс э Яковески:

— Джя ки пху ки дадэнги, тэ тухумендэ, тай Мэ кан овав туса.

4О Яков бичялдяс тэ пхэнэн э Рахиляки тай э Лияки, тэ никлён он ки ливади, катэ сас лэски атарэс. 5Ов пхэнляс лэнги:

— Мэ дикхав, кай тумаро дад манца на аякха, сар буруни. Ай о Дэл мэ дадэско манца. 6Тумэ джянэн, кай мэ керавас бути тумарэ дадэски алаи мэ зораса, 7ай тумаро дад хохавэлас ман, дэшвар паровэлас мо покинипэ. Ай о Дэл на диняс ман лэстэ андэ хурлуки. 8Ов тэ пхэнэлас: «О покинипэ тинро кан овэл тапенги», алаи ко гайваня аракхлёнас тапенца, ай ов тэ пхэнэлас: «О покинипэ тинро кан овэн о чюбаря», алаи ко гайваня аракхлёнас чюбаря. 9Аякха о Дэл лиляс э гайванен тумарэ дадэстэ тай диняс мандэ.

10Екхвар, одова вахыти, кана лэнпэс о гайваня, мэ дикхлём суно: мэ ваздинём мэ якха тай дикхлём, кай о бузнэ, кай учярэнас э бузнян, сас полосатя тапенги тай чюбаря. 11О Миляики э Дэвлэско пхэнляс манги андэ суно: «Яков». Мэ пхэнлём: «Мэ атхэ». 12Ов пхэнляс: «Дикх, тай ту кан дикхес: алаи о бузня, кай учярэн э гайванен, — полосатя, чюбаря я тапенги. Мэ дикхлём, со кердяс туки о Лаван. 13Мэ — о Дэл э Вефилеско, катэ ту чёрдян э маслинаки олия опэр тэрдо бар тай халян совля Манги. Ачяв адая пху тай джя палэ ки пху, катэ ту аракхлилян».

14Э Рахиль тай э Лия пхэнлэ:

— Ва ай си амэндэ генэ паи андэ мангин амарэ дадэско? 15Та со, на дикхиндёл, кай ов гинэл амэн джятен? Ов бикиндяс амэн тай тхэдяс одова, со лиляс амэнги. 16Гэлбэтэм, алаи о барвалипэ, саво о Дэл лиляс амарэ дадэстар, амаро си тай амарэ пуенго. Самким кер, сар пхэнэл туки о Дэл.

17О Яков бэшавдяс э пуен тай э ромнен опэр камилэс, 18кувды алаи э гайванен ангал пэстэ, лиляс алаи о мангин, саво ов кидиняс андэ Паддан-Арам, тай гело ко дром пэ дадэстэ ко Исаак ки пху Ханаан.

19Кана о Лаван гело тэ моравэл э бакрэн, э Рахиль чёрдяс лэски дэвлэн. 20Ай о Яков хохавдяс э арамеес э Лаванес, на пхэнляс лэски, кай джялпэски. 21Ов нашло алаи пэ мангинэса, накхло э диряв тай гело ко горадэс Галаад.

О Лаван керэл э Яковеса завети

22Ко трито дес э Лаванески пхэнлэ, кай о Яков нашло. 23О Лаван лиляс пэса э тухумен, прастанило пал Яков тай эфта десендар аракхляс лэс андэ горадэс Галаад. 24Ай рати о Дэл сикавдяспэс э арамеески э Лаванески андэ суно тай пхэнляс лэски: «Сакёв, ма пхэн ништо э Яковески, нэ лачё, нэ джюнгало».

25О Лаван рэсло э Яковес. О Яков тхэдяс катуна андэ горадэс Галаад, ли о Лаван э тухуменца тхэдяс катуна отхэ. 26О Лаван пхэнляс э Яковески:

— Со ту кердян? Ту хохавдян ман тай гелдян мэ чяян, сар пханлимарен ко марипэ. 27Соски ту нашлян чёриндос? Соски ту на пхэнлян манги, тэ мукав тут лошаса тай гиленца, бубнэнца тай арфэнца? 28Ту на динян ман джи тэ чюмидав мэ турунен тай мэ чяян, кай джянпэски. Ту кердян битюшундимаски дила. 29Мандэ си зор тэ керав туки джюнгалипэ, ай окоя рат о Дэл тэ дадэско пхэнляс манги: «Сакёв, ма пхэн э Яковески ништо, нэ лачё, нэ джюнгало». 30Самким, ту гелян, вай ту манглян тэ джяс андэ кхер тэ дадэстэ, ами соски ту чёрдян мэ дэвлэн?

31О Яков пхэнляс э Лаванески:

— Мэ трашавас тай тюшундиявас, кай ту зораса кан лэс мандар тэ чяян. 32Ту тэ аракхеса атхэ кастэ-то тэ дэвлэн, одова на кан бэшэл. Ангал тэ тухумендэ дикх ту сам, си мандэ шо-то тинро. Тэ си, лэ палэ.

О Яков на джянэлас, кай э дэвлэн чёрдяс э Рахиль.

33О Лаван диняс андэ катуна ки Яковески, андэ катуна ки Лияки тай андэ катуна до иргатинкенги, тай ништо на аракхляс. Пал ки катуна ки Лияки ов диняс андэ катуна ки Рахиляки. 34Э Рахиль лиляс э кхерутнэ дэвлэн тай тхэдяс лэн андэ камилако сидлас тай бэшли опэр лэндэ. О Лаван родиняс алаи э катуна тай ништо на аракхляс.

35Э Рахиль пхэнляс пэ дадэски:

— Ма холязэ, мо сагбус, мэ нащи ущяв ангал тутэ, вай мандэ одова, со овэл ко джювля.

Сар ов на родэлас, ов нащи аракхляс э дэвлэн.

36О Яков сас бут холямэ тай лиляс тэ пхэнэл э Лаванески:

— Андэ состэ мо джюнгалипэ? — пхучляс ов. — Со бэзя мэ кердём, кай ту прастанилян пал мандэ тэ рэсэс? 37Ту родинян алаи мо мангин — со ту аракхлян андар тэ мангинэстэ? Тхэ, со аракхлян, ангал тэ тухумендэ тай минрэндэ, тай мэ керэн он амэнги цындос. 38Биш брэш мэ бэшлём тутэ: тэ бакрэн тай бузнян на чясас, э бакрэн андар тэ атарэс мэ на халём. 39Э мудардэ гайванен мэ на анавас тутэ, ами мэ сам покинавас андар лэндэ. Ту мангесас мандар тэ покинав андар алаестэ, со сас чёрдо, десе тэ сас адава я рати. 40Аки сар сас манги: о тхарипэ тхарэлас ман десе, о шудрипэ магроскерэлас ман рати, тай о соипэ нашэлас мэ якхендар. 41Асавке сас одола биш брэш, кай мэ бэшавас андэ тэ кхерэстэ. Мэ керавас бути опэр тутэ дэшуштар брэш андар тэ до чяяндэ тай шов брэш андар гайваня, ай ту дэшвар паровэсас одова, со покинэсас манги. 42Тэ на овэлас би манца о Дэл мэ дадэско, о Дэл э Авраамеско, Одова, Кастар трашалас о Исаак, ту бичялдянас би ман чюче вастэнца. Ай о Дэл дикхляс мо чёрипэ тай ми пхари бути тай кердяс цындос амэнги окоя рат.

43О Лаван пхэнляс э Яковески:

— Адала чяя — мэ чяя, пуя — мэ пуя, тай о атарэс — мэ атарэс. Алаи, со ту дикхес, — алаи минро. Ами со мэ акана тэ керав мэ чяянца я э пуенца, савэ лэндэ аракхлилэ? 44Эла керас завети, ту тай мэ, тай ов мэ овэл сикаипэ машкарэ амэндэ.

45О Яков лиляс бар тай тхэдяс лэс тэрдиндос. 46Ов пхэнляс пэ тухуменги:

— Кидэн бара.

Он кидинэ бара горас тай бэшлэ пашэ тэ хан. 47О Лаван тхэдяс лэс Иегар-Сагадута, ай о Яков — Гал-Эд#31.47 Авг. евр. збора «Егар-Сахадута» тай авг. евр. збора «Гал-Эд» си «горас сикаимаско».. 48О Лаван пхэнляс:

— Авдес адава горас — сикаипэ машкарэ тутэ тай мандэ.

Аки соски тхэдэ лэс Гал-Эд. 49Тай генэ Мицпа#31.49 Авг. евр. збора «Мицпа» си «дикхимаски башня»., вай о Лаван пхэнляс:

— Мэ дикхел о Сагбус о Яхвэ пал тутэ тай пал мандэ, кана кан овас дур екхаврэста. 50Тэ овэса хурлуки мэ чяянца я кан лэс туки аврэ ромнян, булуб мэ чяяндар, — джи кана амэнца никхон нанай, тюшундие, кай о Дэл — машкарэ амэндэ.

51Генэ о Лаван пхэнляс э Яковески:

— Аки барэндар горас тай тэрдо бар, саво мэ тхэдём машкарэ тутэ тай мандэ. 52Адала бара — сикаипэ, тай адава тэрдо бар — сикаипэ одолэски, кай мэ на кан накхав пал адава горас э барэнго тэ ригатэ, тэ керав туки джюнгалипэ, тай ту на кан накхес адава тэрдо бар тай адава горас э барэнго мэ ригатэ, тэ керэс манги хурлуки. 53О Дэл э Авраамеско тай о Дэл э Нахореско, о Дэл лэнги дадэско, мэ керэл цындос машкарэ амэндэ.

О Яков халяс совля Одолэнги, Савэстар трашалас лэско дад о Исаак. 54Ов кердяс курбани отхэ андэ горадэс тай диняс икос э тухумен тэ хан екхетханэ. Он халэ тай раткердэ отхэ. 55Ай эртэс сабахтан о Лаван чюмидиняс э турунен тай э чяян, алгышты лэн тай гело кхерэ.

Currently Selected:

Кердипэ 31: КРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия опэр крымски романи чиб