Кердипэ 12
12
О Дэл пхэнэл э Аврамески
1О Сагбус о Яхвэ пхэнляс э Аврамески:
— Ачяв ти пху, то дюняс тай тэ дадэско кхер тай джя ки пху, сави Мэ туки кан сикавав.
2Мэ кан керав тутар баро дюняс,
кан алгыштияв тут
тай кан керав намлыс то нав.
Ту аврэнги кан овэс бахт!
3Мэ кан дав лачипэ одолэн,
кон мангел туки лачипэ,
тай кан дав арманя одолэс,
кон дэл арманя тут.
Булуб туки кан диндён бахт
алаи о дюнядэс опэр пху.
4Тай о Аврам гело ко дром, сар пхэнляс лэски о Сагбус о Яхвэ, тай о Лот гело екхетханэ лэса. Кана ов гело андар Харан, э Аврамески сас 75 брэш. 5Ов лиляс пэса пэ ромня э Сара, пэ пхралэски чявэс э Лотес, алаи о мангин, саво он кидинэ, тай э манушэн, савэ лэндэ сас андэ Харан. Он гелэ андэ Ханаан тай ало отхэ. 6О Аврам накхло опэр адалэ пхуятэ джи одолэ тханэстэ андэ Шэхем, катэ сас тэрдо о тэрэки тэрэбинт, саво бучёлас Морэ. Одова вахыти отхэ бэшэнас о ханаанея. 7О Сагбус о Яхвэ сикавдяспэс э Аврамески тай пхэнляс:
— Мэ кан дав адая пху тэ пуен.
О Аврам кердяс отхэ алтари э Сагбуски э Яхвэски, Саво сикавдяспэс лэски. 8Отхар ов гело андэ горадэнго тхан ко вастоки катар Вефиль. Тай тхэдяс пи катуна аякха, кай сас о Вефиль карин запад, ай о Гай — карин вастоки. Отхэ ов кердяс алтари э Сагбуски э Яхвэски тай мангляс Лэско нав. 9Дэчи о Аврам гело катар тхан тай гело дром ко юги, ко Негев.
О Аврам тай э Сара накхен андэ Египти
10Опэр пху сас бокх, бут бари, тай о Аврам накхло ко Египти. 11Кана он пашонас ко Египти, ов пхэнляс пэ ромняки э Сараки:
— Алаи кан дикхен, кай ту шукар джювли. 12Кана о египтяня кан дикхен тут, он кан тюшундиен: «Адая лэски ромни», — тай кан мударэн ман, ай тут кан ачявэн дживиндя. 13Пхэн, кай сан ми пхэн. Дэчи булуб туки манца кан овэн лаче, тай кан ачяв дживиндо.
14Кана о Аврам ало андэ Египти, о египтяня дикхлэ, кай э Сара бут шукар. 15Ай кана ла дикхлэ о князя э фараонески, он махтадылар ла э фараонески, тай э Сара лилэ лэстэ андэ патишайлытико кхер. 16Ов кердяс лачипэ э Аврамески булуб э Сараки. Ко Аврам сас бузнэ, бакрэ, гурува, джёрэ тай джёря, иргатя тай иргатинкес, тай камилэс.
17Ай о Сагбус о Яхвэ бичялдяс джюнгалэ насвалиматэс опэр фараони тай алаи опэр лэски кхерутнэндэ, андар одолэстэ кай ов лиляс э Сара, э Аврамески ромня, андэ пэ кхерэстэ. 18Дэчи о фараони диняс икос э Аврамес тай пхучляс:
— Со кердян манца? Соски ту на пхэнлян манги, кай ой — ти ромни? 19Соски ту пхэнлян, кай ой ти пхэн? Екх андар адалэстэ мэ манглём тэ лав ла. Аки ти ромни, лэла тай джя атхар!
20О фараони пхэнляс пэ манушэнги тэ кувдиен э Аврамес отхар екхетханэ э ромняса тай алаеса, со сас лэстэ.
Currently Selected:
Кердипэ 12: КРБ
Highlight
Share
Copy
Want to have your highlights saved across all your devices? Sign up or sign in
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/
