Vapositili 11

1Pwu navene avapositili navakilisiti avali mwoni mu-Jutai vakapulika ukuta navene navapanzi vatsyupilye inongwa tsa Nguluve. 2Pwu vwu atogile UPetele vwu abye mu-Jelulsalemu, pwu vakammiga avakilisiti avakegetwa 3vakata: O, uve vwingye nńumba jya vatsilakukegetwa ulye navo isinu. 4Pwu UPetele akavaliṅanya umwu tsakonganye akata: 5Uńe ndale mbutsenge mu-Jope vwu ndili pakwisaja pwu ndikasana lukambonekela uluvoneko, ndikavona akanu kikwika kukyańa, kikava ndikilundwa ikivaha, vibite pangutu tswu ini, vitumbula ukwitsa nakyo upwu ndale. 6Pwu ndikalola ndikasimańa isyale mumwa. Ndikasivona isigendela amalunde gani isya pakilunga apa nisikanu nimińandalwe gyoni igigenda pasi nisidege sya kukyańa. 7Pwu ndikavona ilimeńu likumbula lita: Imaga vi Petele, uhinzage ulitsage. 8Pwu une ndikabela ndikata: Bako nkuludeva, mańa isili mwiko nisikali syu nandisimańili lusiku mundomo. 9Pwu likavujila ilimeńu lya kukyańa likambula likata: Isyu avalitse Unguluve kwu bako ukuta silimwiko uve. 10Tsitsitsi tsikavuja kadatu ukuvoneka, pwu syoni vakakwegela kukyańa. 11Pwu ndikakeńemuka baho avanu vadatu visika kuńumba ijyu ndalemwo, vahumile mu-Kesalija vavasuṅile kwane. 12Pwu UMepo akambula akata: Bihaga navo ulalwitsaga numwuja. Pwu tukabiha twivoni navakilisiti avajitu ntanato ava. Tukatsisika pańumba jya munu ulya tukingila. 13Umwene akatuvula tsoni akata: Ndivwene unsuṅwa imile nńumba jyango umu ikumbula ita: Suṅaga avanu mu-Jope, vakantole USimoni, uvi vita vi Petele ilitavwa ilinge. 14Vi alavavula inongwa itsa kuvapoka ńivoni nuve nava ńumba jyako voni. 15Vwu nditengula ukuvavula pwu UMepo umbalatse akavikila nduvwu nuvwe atwikye pavutengulilo palya. 16Pwu ndikakumbuhitsa ilimeńu ilyu atsovile unkuludeva ilyu atye: Umwene UJohani otsaga ga magasi, uńe ndotsivwagwa nu-Mepo Umbelatse. 17Apene vwu Unguluve avagavye isigavilwa isyu atugavye uvwe upwu twamwidikaga unkuludeva UJesu Kilisiti, pwu nene viki ndi nditetsage ndinkilivule Unguluve? 18Vwu vapulike tsitsitsi pwu vakanunala vakamwimika Unguluve vakata: Humbe navapanzi Unguluve avapye ulukilivuko lwa kukilivukila kuvwumi.

19Avene valya kwavahambilanye ukubańilitsivwa kulya kwatupukye pa-Sitesani, avange vapongolinye kyoni vatsisika namu-Penike, namu-Kipeli namu-Antyokija navambule nujyunge inongwa, vakavavula ava-Juta vene. 20Lola avange avajavo avahumile mu-Kipeli namu-Kilene pakivumbuku vwu vakavavula nava-Giliki inongwa innonu tsa Jesu unkuludeva vwu vatsisike mu-Antyokija. 21Nakyene ikivoko kya nkuludeva kikavatanga. Pwu vakidika vavongosu vakakilivuka kunkuludeva. 22Inongwa tsitsitsi tsikapulikika tsikatsisika nakumbulukutu tsa va mumpelela gwa mu-Jelusalemu. Vwu vakansuṅa UBalinaba vakata: Bihaga mu-Antyokija ukavalole. 23Umwene vwu atsisike vwu atsivwene itsu Unguluve avombile nuluhungu lwamwene, pwu akahekela akavadulusa voni akata mwidulusage munumbula tsińo ntetsage tukumbadamaga unkuludeva jilweli. 24Mańa UBalinaba ale nnonu adigile UMepo Umbalatse, ale nulwidiko. Pwu vakongeletsa ukumbona unkuludeva avanu ikipuga ikyongosu. 25Pwu UBalinaba akabiha mu-Talisi akatsikundonda USauli. Vwu ambwene pwu akabiha nave mu-Antyokija. 26Pwu vakagona umwaka gwoni mumpelela umu, vakavavula inongwa avanu ikipuga ikivaha. Nalwene ulwakuta vwu “Vakilisiti” ilitavwa lukahuma mu-Antyokija umu.

27Mmwaka gugwa pwu avańamalago avange vakahuma mu-Jelusalemu vakika ukubiha mu-Antyokija. 28Pwu akima, ujyunge unjyavo uvi ale vi Agabu ilitavwa, akavavulila ṅani itsu ambonitse UMepo akata, lwiva pakugwa uluteka uluvaha pakilunga ikitsengivwa kyoni. Lwu luteka lulya lugwitsage jilweli upwu ale Kesali UKilauti. 29Pwu avakongi voni vakasimilitsanihitsa ṅani uju mwene uju mwene vakata: Tukuvavikilaga akange aka kuvatanga avakilisiti avajitu va mu-Jutai upwu kivelye ikyuma kitu uju ikya mwene uju ikya mwene. 30Pwu vakasivika mmavoko ga va-Balinaba nu-Sauli vakata syu nkavike kuvavaha avenempelela.

Currently Selected:

Vapositili 11: Kinga

Highlight

Copy