MATAYO 27
27
1Kyasia komshika ngamenyi wakohanyi wanene wakadeda kyama wose na wandu wasongoru wa oruka kya Yesu chando wechimbutya opfu. 2Wakampfunga wakamduo wakamdambikya ipfo ko mchili ulya o oruka Pontio Pilato.
Opfu lo Yuda
(Mawu 1:18-19)
3 Na Yuda ulya amdambikye-ho ili ambona nyi ambutyo owingo, nalyo kawuya iwado nyi mchenyeṟe. Rupia tsilya makumi haṟaṟu awemnenge katsiwihiṟya wakohanyi walya wanene na wandu walya wasongoru. 4Kahamba, “Ngamnyamaṟa lyandi njiledambika-ho samu ilai na mti.” Nawo wakahamba, “Nyi kii-se kida naso? Ambuya iyo kumonyi.” 5Nao kakumba rupia tsilya kulya hekalunyi. Kasheṟuka-pfo. Kahenda ikuotsuo. 6Kyasia wakohanyi walya wanene wakaira rupia tsilya wakahamba, “Chi kisumuhanyi lutsiwike ipfo kisenyi keṟika shindo sheinenga Ruwapfo kyamba nyi wuhuru wo samu.” 7Wakadeda kyama wakahuṟa natso dema lilya liweho lya mndu mowumba nungu. Wakalihuṟa lyeṟika mnying'a ya wahenu. 8Nakyo kikainenga dema lilya likadeo rina nyi dema lya samu itane inu. 9 Nalyo kilya kii kidede nyi mwikimbi Yeremia kikahoya-ho kido kehamba, “Nyi waleduo rupia tsilya makumi haṟaṟu tsii wuhuru wohuṟa ichu amambie wuhuru woke chando wushikye ichu wana wa Israeli waleambuya wuhuru chando ashikye. 10Wakatsiwika tsehuṟa dema lya mndu mowumba nungu na chando Mndumii awenjiwawasye.”
Pilato awesa Yesu
(Mar 15:2-5; Luk 23:3-5; Yoh 18:33-38)
11Kyasia na Yesu awehoṟoki ipfo oshangunyi lo mchili moitoṟya oruka. Na mchili kambesa kahamba, “Iyo nyi mangi ya Wayuda?” Yesu kahamba, “Nakyo ohamba.” 12Na ili kekumbo nyi wakohanyi walya wanene na wandu wasongoru ma nalahaluo kindo. 13Nalyo Pilato kambia, “A nyi kulaichuo ishi waikukumba-ho nasho sa shifoi?” 14Nao ma nalamhaluo ma kidedo ma kimu. 15Itane mchili ulya moitoṟya oṟuka arihio mnu kyasia kya mchili ulya moitoṟia oruka ilyi kui mfiri mnene nyi echipfunguya wandu mndu ampfunge umu-ho ichu wechimkunda-ho. 16Na mandi halya kuwewode mndu mpfunge umu ahendye ṟamba, ewio rina lyake nyi Baraba. 17Kyasia wamidima isanza kundu kumu Pilato kawawia, “Nyi uhya mokunda njimfunguye, ngesa nyi Baraba a ngesa nyi Yesu chu ewio nyi Kristo?” 18Nyi kifa lyandi aichi ke kindo wacha mdambikya-ho na wunyenyi. 19Kyasia ili adamye alya loṟike-hu lodumbuya mondu, mka ulya oke kamdumya ndumi kahamba, “Ma kulawone kochilungyaho kyapfo na mndu chu o wusumuhanyi. Nyi kifa ngawona wukiwa wufoi inu kilodyonyi kipfa kyake.” 20Na wakohanyi walya wanene wasanganyi na wandu wasongoru wakahaaya wandu kundu wechi-terewya Baraba, na Yesu wamdetse. 21Kyasia mchili ulya moitoṟya oruka kahaluo kahamba, “A wandu-wa wawi nyi uhya-ho mokunda njimfunguye?” Nawo wakahamba, “Nyi Baraba!” 22Pilato kawawia, “A Yesu, ichu amhambe nyi Kristo kyake njimbike-ng'u njida?” Wakahamba handu hamu wose, “Nawambyo msalabehu!” 23Nao kahamba, “A nkiki kiwicho alewuta?” Wakaengeṟa ifahya wakahamba, “Nawambyo msalabehu!” 24 Kyasia ili Pilato alewona alaidima iwuta-ho kindo na kitohyo kya wandu nyi ihenda keng'ana mnu kii, nao kahamba, “Inyi njii mharami na samu ya mndu-chu o wusumuhanyi. Ambuyenyi kyanu nyo!” 25Naho wandu wakahaluo mhaluye fumu wose wakahamba, “Samu yake na ilusoke so na wana wadu.” 26Nalyo kawapfunguya Baraba. Na Yesu kasonguo imkapa na ngowa itso tsii njitochye msha. Kawuya kamdambika-ho nahende wambyo msalabe-hu.
Wasikari wataluo Yesu
27Nalyo wasikari wa mchili ulya moitoṟya oruka wakaduo Yesu mṟinyi kundo wasikari wekekaa. Na siṟi ya wasikari ikacha ikuwumbya nao yose. 28Wakambuta nguwo. Wakawuya wakamṟika nguwo ya mawoko ifanyi king'aring'ari. 29Wakaoka oṟo ya msha wakamṟika ipfo mdonyi koke. Wakamnengia na iṟeṟe ipfo owokonyi loke lo kulyo. 30Wakampfirya ndi wakamtaluo wehamba, “Lokuiṟikiṟi iyo mangi ya Wayuda.” 31Wakamiselya mnyeri. Wakawada iṟeṟe lilya wakamkapa nalyo ipfo mdonyi foke. Wakamduo nahende wambyo msalabehu.
Yesu awambyo msalabehu
(Mar 15:21-32; Luk 23:26-43; Yoh 19:17-27)
32Warie njia yehenda wakawona mndu awuka kulya Kirene ewio nyi Simon. Nawo wakamitikya nakudike msalaba fulya foke. 33Wamidima shika kulyando kui kulahe nyi Goligota nakyo nyi kimu na ihamba nyi mbuonyi. 34 Wakamnenga mwinyo fumsangane na mṟinga fo nduu nanyo. Amefusaha nalakunde inyo. 35 Wameidima imbambya msalabehu wakahawana nguwo tsilya tsake wewika kuṟu kuhya. 36Wakadamya-ho wemringa. 37Na oo huyaa mdo foke wakaṟehya-ho kya owingo loke. Ke ichu nyio Yesu ai mangi ya Wayuda. 38Nalyo kuiho weala njia wawi wakawawambya msalabehu handu hamu nao. Ulya umu kakaa oo ora lo kulyo na ungi kakaa oo ora lo kumoso. 39 Na walya waida-ho wakamruma wesingitsa-singitsa mdo yawo. 40 Wakahamba, “Kui mosanja hekalu koliwika lya kawi mfiri iṟaṟu likawa kekukiṟe-ng'u kumonyi; kokoya na uwekeri Mana o Ruwa kesoka-ng'u kunu msalabehu!” 41Na wakohanyi walya wanene warianyi na walosha wa mawawaso na wandu wasongoru na wudo wakawemtaluo wakahamba, “A lyandi alekiṟa wengi nalaidime ma ikukiṟa-ng'u amonyi. 42Chi ai mangi ya Israeli nakesokang'u kunu msalabehu naso lumidikye! 43 Nyi awekusirye na Ruwa nakemashuong'u-ho kokoya nyi amkundi. Nao nyi alehamba nyi ai Mana o Ruwa?” 44Na walya weala njia walya wai wawambye msalabenyi handu hamu nao wakawemruma wado.
Yesu apfa
(Mar 15:33-41; Luk 23:44-49; Yoh 19:28-30)
45Kyasia kuwokia saa ya kaṟandaṟu kukaho meema kulya orukenyi kose fukashika saa kenda. 46 Kukeri kufui na saa kenda Yesu kalaha na ṟu ling'anyi kehamba, “Eli Eli lama sabakitanyi?” Kii cha ili kehambo, “Ruwa oko, Ruwa oko, nkili onjidea?” 47Na wandu wahoṟokia-ho walya mata wameicho kechihamba ado wakahamba, “Nyi ailaha Elia.” 48 Naho kudi ulya umu-ho kahenda kedicha, kaende kindo keonga mṟinga. Kakiichuṟa mṟinga fotarang'aa. Kawika iwale-hu kamrutsa nalyo. 49Na walya wengi wakahamba, “Leka luambuye Elia kokoya na echicha nache imkira.” 50Kyasia Yesu amidima ilaha lya kawi na ṟu ling'anyi-se nalyo kalekya moo. 51 Nalyo ambuya, isulia lilya lyeshingya ipfo hekalunyi likaranduka ipfo makiidi hawi liwuka tsindenyi likapahukya mdonyi. Na wanda ikadedema na maho-ho manene hakapaṟika. 52Na ipfo mbangenyi kundu mnying'a imṟike kukaṟuhuka. Na mbihu ya wandu waele wafoi walemepfa kacha ikaṟuka. 53Wakakure kulya mbangenyi kundo wawei waṟike. Na ili numa amidima iṟuka wakacha na kulya mṟinyi mwele wakakuloṟa na wandu wafoi. 54Kyasia mchili ulya o siṟi ya ihana wakeri-pfo na walya weringa Yesu wamidima iwona kiding'ashi kilya kyaida-ho na shindo shilya shawutika wakaowuo mnu wakahamba, “Na lohi ichu nyi awekeri mana o Ruwa.” 55 Kyaindi nyi kukeri-ho na waka sa wafoi wechiambuya-ho wai kuleshe. Nyi walya wechioshana na Yesu wawuka kulya Galilaya kundu wempfuṟukanya. 56Na ipfo kiidi kyawo nyi kukeri-pfo Maria o kulya Magidala na Maria chu mae o Yakobo na Yosefu, na mae o wana wa Sebedayo.
Yesu aṟiko
(Mar 15:42-47; Luk 23:50-56; Yoh 19:38-42)
57Kyasia ili kushikye kyukanyi kukacha napfo mndu msuṟi awuka kulya Arimatia, ewio rina lyake nyi Yosefu. Nao nyi awekeri mndu o kiloshyonyi kya Yesu. 58Nyio alehenda kulya ko Pilato kamterewa mnying'a fulya fo Yesu. Nalyo Pilato kawawasa nahende fuinengyo. 59Na Yosefu kaduo mnying'a fulya. Kafuorowia nguwonyi tsa owiṟo tsikengemae. 60Kahenda fuṟika rungunyi lyake lihya lilya atorongochye kulya ihonyi. Amiidima ipiṟimitsya iho sa inene oo momu-hu fo rungu lilya kakuhendya. 61Indi alya kuweiho Maria o kulya Magidala warianyi na Maria ulya ungi wadamie oo sumuhana na rungu lilya.
Mringi o ṟungu
62Kyasia ili ngamenyi ya ili lya ngama lyeituma mfiri fulya foṟeheṟa kukasangana wakohanyi walya wanene na Wafarisayo ipfo ko Pilato. 63 Wakahamba, “Mndumii, lombuya ikumbuo mlembi ulya, lyandi i na moo, ke nyi alehamba, njetiṟa mfiri iṟaṟu njiwuye iṟuka. 64Kewawasa-ng'u-wo opanga lulya luhende iringo itane mfiri fo kaṟaṟu. Walya wa kiloshiyonyi walawone wechicha imiiwa-ho. Wawie na wandu, ke nyi amṟuka awuka ko wapfu. Na wulembi wo wofurumya wuwone wochiwichuo wuide na wulya wo kuwoka.” 65Pilato kawawia, “Kiringo kyeringa-ho na mochiwona. Kekuhendyenyi muteesye-ho chando mbeichi muwenyi.” 66Wakahenda wakateesya opanga lulya wakawika kiṟingishyo kiwode ofano lowo alya ihohu kukeri-pfo na kiringo kilya.
Iṟuka lya Yesu
(Mar 16:1-10; Luk 24:1-12; Yoh 20:1-10)
Currently Selected:
MATAYO 27: KIM2
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.
MATAYO 27
27
1Kyasia komshika ngamenyi wakohanyi wanene wakadeda kyama wose na wandu wasongoru wa oruka kya Yesu chando wechimbutya opfu. 2Wakampfunga wakamduo wakamdambikya ipfo ko mchili ulya o oruka Pontio Pilato.
Opfu lo Yuda
(Mawu 1:18-19)
3 Na Yuda ulya amdambikye-ho ili ambona nyi ambutyo owingo, nalyo kawuya iwado nyi mchenyeṟe. Rupia tsilya makumi haṟaṟu awemnenge katsiwihiṟya wakohanyi walya wanene na wandu walya wasongoru. 4Kahamba, “Ngamnyamaṟa lyandi njiledambika-ho samu ilai na mti.” Nawo wakahamba, “Nyi kii-se kida naso? Ambuya iyo kumonyi.” 5Nao kakumba rupia tsilya kulya hekalunyi. Kasheṟuka-pfo. Kahenda ikuotsuo. 6Kyasia wakohanyi walya wanene wakaira rupia tsilya wakahamba, “Chi kisumuhanyi lutsiwike ipfo kisenyi keṟika shindo sheinenga Ruwapfo kyamba nyi wuhuru wo samu.” 7Wakadeda kyama wakahuṟa natso dema lilya liweho lya mndu mowumba nungu. Wakalihuṟa lyeṟika mnying'a ya wahenu. 8Nakyo kikainenga dema lilya likadeo rina nyi dema lya samu itane inu. 9 Nalyo kilya kii kidede nyi mwikimbi Yeremia kikahoya-ho kido kehamba, “Nyi waleduo rupia tsilya makumi haṟaṟu tsii wuhuru wohuṟa ichu amambie wuhuru woke chando wushikye ichu wana wa Israeli waleambuya wuhuru chando ashikye. 10Wakatsiwika tsehuṟa dema lya mndu mowumba nungu na chando Mndumii awenjiwawasye.”
Pilato awesa Yesu
(Mar 15:2-5; Luk 23:3-5; Yoh 18:33-38)
11Kyasia na Yesu awehoṟoki ipfo oshangunyi lo mchili moitoṟya oruka. Na mchili kambesa kahamba, “Iyo nyi mangi ya Wayuda?” Yesu kahamba, “Nakyo ohamba.” 12Na ili kekumbo nyi wakohanyi walya wanene na wandu wasongoru ma nalahaluo kindo. 13Nalyo Pilato kambia, “A nyi kulaichuo ishi waikukumba-ho nasho sa shifoi?” 14Nao ma nalamhaluo ma kidedo ma kimu. 15Itane mchili ulya moitoṟya oṟuka arihio mnu kyasia kya mchili ulya moitoṟia oruka ilyi kui mfiri mnene nyi echipfunguya wandu mndu ampfunge umu-ho ichu wechimkunda-ho. 16Na mandi halya kuwewode mndu mpfunge umu ahendye ṟamba, ewio rina lyake nyi Baraba. 17Kyasia wamidima isanza kundu kumu Pilato kawawia, “Nyi uhya mokunda njimfunguye, ngesa nyi Baraba a ngesa nyi Yesu chu ewio nyi Kristo?” 18Nyi kifa lyandi aichi ke kindo wacha mdambikya-ho na wunyenyi. 19Kyasia ili adamye alya loṟike-hu lodumbuya mondu, mka ulya oke kamdumya ndumi kahamba, “Ma kulawone kochilungyaho kyapfo na mndu chu o wusumuhanyi. Nyi kifa ngawona wukiwa wufoi inu kilodyonyi kipfa kyake.” 20Na wakohanyi walya wanene wasanganyi na wandu wasongoru wakahaaya wandu kundu wechi-terewya Baraba, na Yesu wamdetse. 21Kyasia mchili ulya moitoṟya oruka kahaluo kahamba, “A wandu-wa wawi nyi uhya-ho mokunda njimfunguye?” Nawo wakahamba, “Nyi Baraba!” 22Pilato kawawia, “A Yesu, ichu amhambe nyi Kristo kyake njimbike-ng'u njida?” Wakahamba handu hamu wose, “Nawambyo msalabehu!” 23Nao kahamba, “A nkiki kiwicho alewuta?” Wakaengeṟa ifahya wakahamba, “Nawambyo msalabehu!” 24 Kyasia ili Pilato alewona alaidima iwuta-ho kindo na kitohyo kya wandu nyi ihenda keng'ana mnu kii, nao kahamba, “Inyi njii mharami na samu ya mndu-chu o wusumuhanyi. Ambuyenyi kyanu nyo!” 25Naho wandu wakahaluo mhaluye fumu wose wakahamba, “Samu yake na ilusoke so na wana wadu.” 26Nalyo kawapfunguya Baraba. Na Yesu kasonguo imkapa na ngowa itso tsii njitochye msha. Kawuya kamdambika-ho nahende wambyo msalabe-hu.
Wasikari wataluo Yesu
27Nalyo wasikari wa mchili ulya moitoṟya oruka wakaduo Yesu mṟinyi kundo wasikari wekekaa. Na siṟi ya wasikari ikacha ikuwumbya nao yose. 28Wakambuta nguwo. Wakawuya wakamṟika nguwo ya mawoko ifanyi king'aring'ari. 29Wakaoka oṟo ya msha wakamṟika ipfo mdonyi koke. Wakamnengia na iṟeṟe ipfo owokonyi loke lo kulyo. 30Wakampfirya ndi wakamtaluo wehamba, “Lokuiṟikiṟi iyo mangi ya Wayuda.” 31Wakamiselya mnyeri. Wakawada iṟeṟe lilya wakamkapa nalyo ipfo mdonyi foke. Wakamduo nahende wambyo msalabehu.
Yesu awambyo msalabehu
(Mar 15:21-32; Luk 23:26-43; Yoh 19:17-27)
32Warie njia yehenda wakawona mndu awuka kulya Kirene ewio nyi Simon. Nawo wakamitikya nakudike msalaba fulya foke. 33Wamidima shika kulyando kui kulahe nyi Goligota nakyo nyi kimu na ihamba nyi mbuonyi. 34 Wakamnenga mwinyo fumsangane na mṟinga fo nduu nanyo. Amefusaha nalakunde inyo. 35 Wameidima imbambya msalabehu wakahawana nguwo tsilya tsake wewika kuṟu kuhya. 36Wakadamya-ho wemringa. 37Na oo huyaa mdo foke wakaṟehya-ho kya owingo loke. Ke ichu nyio Yesu ai mangi ya Wayuda. 38Nalyo kuiho weala njia wawi wakawawambya msalabehu handu hamu nao. Ulya umu kakaa oo ora lo kulyo na ungi kakaa oo ora lo kumoso. 39 Na walya waida-ho wakamruma wesingitsa-singitsa mdo yawo. 40 Wakahamba, “Kui mosanja hekalu koliwika lya kawi mfiri iṟaṟu likawa kekukiṟe-ng'u kumonyi; kokoya na uwekeri Mana o Ruwa kesoka-ng'u kunu msalabehu!” 41Na wakohanyi walya wanene warianyi na walosha wa mawawaso na wandu wasongoru na wudo wakawemtaluo wakahamba, “A lyandi alekiṟa wengi nalaidime ma ikukiṟa-ng'u amonyi. 42Chi ai mangi ya Israeli nakesokang'u kunu msalabehu naso lumidikye! 43 Nyi awekusirye na Ruwa nakemashuong'u-ho kokoya nyi amkundi. Nao nyi alehamba nyi ai Mana o Ruwa?” 44Na walya weala njia walya wai wawambye msalabenyi handu hamu nao wakawemruma wado.
Yesu apfa
(Mar 15:33-41; Luk 23:44-49; Yoh 19:28-30)
45Kyasia kuwokia saa ya kaṟandaṟu kukaho meema kulya orukenyi kose fukashika saa kenda. 46 Kukeri kufui na saa kenda Yesu kalaha na ṟu ling'anyi kehamba, “Eli Eli lama sabakitanyi?” Kii cha ili kehambo, “Ruwa oko, Ruwa oko, nkili onjidea?” 47Na wandu wahoṟokia-ho walya mata wameicho kechihamba ado wakahamba, “Nyi ailaha Elia.” 48 Naho kudi ulya umu-ho kahenda kedicha, kaende kindo keonga mṟinga. Kakiichuṟa mṟinga fotarang'aa. Kawika iwale-hu kamrutsa nalyo. 49Na walya wengi wakahamba, “Leka luambuye Elia kokoya na echicha nache imkira.” 50Kyasia Yesu amidima ilaha lya kawi na ṟu ling'anyi-se nalyo kalekya moo. 51 Nalyo ambuya, isulia lilya lyeshingya ipfo hekalunyi likaranduka ipfo makiidi hawi liwuka tsindenyi likapahukya mdonyi. Na wanda ikadedema na maho-ho manene hakapaṟika. 52Na ipfo mbangenyi kundu mnying'a imṟike kukaṟuhuka. Na mbihu ya wandu waele wafoi walemepfa kacha ikaṟuka. 53Wakakure kulya mbangenyi kundo wawei waṟike. Na ili numa amidima iṟuka wakacha na kulya mṟinyi mwele wakakuloṟa na wandu wafoi. 54Kyasia mchili ulya o siṟi ya ihana wakeri-pfo na walya weringa Yesu wamidima iwona kiding'ashi kilya kyaida-ho na shindo shilya shawutika wakaowuo mnu wakahamba, “Na lohi ichu nyi awekeri mana o Ruwa.” 55 Kyaindi nyi kukeri-ho na waka sa wafoi wechiambuya-ho wai kuleshe. Nyi walya wechioshana na Yesu wawuka kulya Galilaya kundu wempfuṟukanya. 56Na ipfo kiidi kyawo nyi kukeri-pfo Maria o kulya Magidala na Maria chu mae o Yakobo na Yosefu, na mae o wana wa Sebedayo.
Yesu aṟiko
(Mar 15:42-47; Luk 23:50-56; Yoh 19:38-42)
57Kyasia ili kushikye kyukanyi kukacha napfo mndu msuṟi awuka kulya Arimatia, ewio rina lyake nyi Yosefu. Nao nyi awekeri mndu o kiloshyonyi kya Yesu. 58Nyio alehenda kulya ko Pilato kamterewa mnying'a fulya fo Yesu. Nalyo Pilato kawawasa nahende fuinengyo. 59Na Yosefu kaduo mnying'a fulya. Kafuorowia nguwonyi tsa owiṟo tsikengemae. 60Kahenda fuṟika rungunyi lyake lihya lilya atorongochye kulya ihonyi. Amiidima ipiṟimitsya iho sa inene oo momu-hu fo rungu lilya kakuhendya. 61Indi alya kuweiho Maria o kulya Magidala warianyi na Maria ulya ungi wadamie oo sumuhana na rungu lilya.
Mringi o ṟungu
62Kyasia ili ngamenyi ya ili lya ngama lyeituma mfiri fulya foṟeheṟa kukasangana wakohanyi walya wanene na Wafarisayo ipfo ko Pilato. 63 Wakahamba, “Mndumii, lombuya ikumbuo mlembi ulya, lyandi i na moo, ke nyi alehamba, njetiṟa mfiri iṟaṟu njiwuye iṟuka. 64Kewawasa-ng'u-wo opanga lulya luhende iringo itane mfiri fo kaṟaṟu. Walya wa kiloshiyonyi walawone wechicha imiiwa-ho. Wawie na wandu, ke nyi amṟuka awuka ko wapfu. Na wulembi wo wofurumya wuwone wochiwichuo wuide na wulya wo kuwoka.” 65Pilato kawawia, “Kiringo kyeringa-ho na mochiwona. Kekuhendyenyi muteesye-ho chando mbeichi muwenyi.” 66Wakahenda wakateesya opanga lulya wakawika kiṟingishyo kiwode ofano lowo alya ihohu kukeri-pfo na kiringo kilya.
Iṟuka lya Yesu
(Mar 16:1-10; Luk 24:1-12; Yoh 20:1-10)
Currently Selected:
:
Highlight
Share
Copy
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.