ESTA 4
4
Mordekai aterewa ngaya ko Esta
1Mordekai kekimanya shose shiwutikie, karanduo maṟao hake, kaṟaa ikunyia kakushia ifu. Kiidima kaida makidi hawi ha mṟi kechikapa kilio ko pfinya na fowa. 2Kahenda mṟasa kichuminyi kya mba ya mangi, kyaindi aleidima iida napfopfo nyi kipfa kilasumhanyi mndu iida na mba ya mangi aṟee ikunyia. 3Kiidima ko orio isanga iwawaso lya mangi lyamewuto, Wayuda wose wawei cha wandu wawapfiie. Walekuotoya, wakafihiṟa na ikuinadia, wafoi wakalaa ifunyi waṟee makunyia.
4Mkamangi Esta kekiwio mbonyi tsi na wanzenge na shisinga shake kya Mordekai katsileha pichu. 5Naaho kalaha Hataki, umu o wanzenge wa mangi alesambuṟo nahidie Esta, kamduma ko Mordekai nammbese kikeri kida na kitewe nawute ado nki? 6Hataki kahendia Mordekai patehu, osehu lo kichumi kya mba ya mangi. 7Mordekai kaongoya Hataki shose shiwemkoye na kiheo kya fesa yose Hamani awewikie kyasa ketaa kiidi kya kisa kya mangi kokoya Wayuda wose werumatso. 8Kawemnenga na ohawi lo paruo ya mbonyi yo iwei injiwute mṟinyi fo Susa yehamba kya orumatso lo Wayuda, kamterewa nadaye Esta nambie chandu mbonyi tsi na imbia nahende iterewa mangi namterewe nasaṟie Wayuda, wandu wa Esta. 9Hataki kahenda kawia Esta shose Mordekai amwongoya. 10Esta kawia Hataki nawuye nawie Mordekai. 11“Waṟundi wose wa mangi na wandu wake wa orio isanga waichi ke kuwode momu fohenda ko mangi shile akulahapfo, na mndu kahenda alalaho ipfo nyi echipfa. Msa echikia nyi ulya mangi echimhoṟoya ndichi yake ya sahabu kundu nakie. Ate inyi njimlahepfo na wulalu nyi meri fumu tapa foida!”
12Mordekai kechiicho ndumi ya Esta, 13Adi faṟa kamtukia kechimbia “Ulakusaṟe ke kyapfo ikaa mbenyi ya mangi nyi ui mcha wyoo kota Wayuda wengi wose. 14Kotsia sau kiheri cha iki, ndarama yechichea Wayuda ko njia ingi, nawo wechikiṟo, kyaindi iyo nochipfa na mba ya ndeo yechiarisika. Nyiu aichi ke nolewa mkamangi kya kiheri cha iki!”
15Esta kadikia Mordekai kechihaluo kudi, 16“Henda usanyie Wayuda wose wai kunu mṟinyi fo Susa handu hamu. Kuotoenyi, mulalye ma inyo komfiri iṟaṟu, kio na mfiri, kipfa kyako. Inyi na shisinga shako nlochiwuta cha nyo. Kiidima njihende ko mangi ma chandu kulawode momu, kokoya nyi iwoho njiwoho.” 17Kyasia Mordekai kahenda kawuta chandu Esta alembia.
Currently Selected:
ESTA 4: KIM2
Highlight
Copy
Compare
Share
Want to have your highlights saved across all your devices? Sign up or sign in
Kimochi Bible © Bible Society of Tanzania, 2016.