Ezodu 12
12
Roma wa Pwando ya Mavirelo
1Yehova ohowonga na Mozeji vamohi na Arawu mwilamboni mwa Ijipitu. 2Liye kwi: <<Mwedi wenna unokala mwedi wenyu oroma muwari mwa medi datene. Va kada yaka, mwedi wenna gu mwedi oroma.#12:2 mwedi oroma: Medi da aIzarayeli wanle kadalingana na medi dehu da tchineneva. Mwedi wewa oroma, aroma magomelo wa Marsu eto yaka dimohi diwa akala maromelo wa Abirili. 3Mwaawandele mulogo watene wa aIzarayeli mangano anafuna miyo avaha ala. Kakwakwanaga malambo kumi a mwedi wenna, kada mundimuwa wa vande asakulrege mwana nibila owu mwana mbuzi. Va kada vande, kasakulrege mwanainyama imohi. 4Mwinnya wa vande aona ira: <Vande vihu va, nihiyevavo, mwana nibila siku nimohive kannamala dja>, adowe, avwanane na vande visimbwile wandamana, mavande menli ale kakayena nibila nimohive nenne ira kawande dja mwana nibila natene siku nimohive. 5Kasakulre nibila nari mbuzi, malringana ikale ya mulombwana, yapama, yohorangala, ya yaka imohi. 6Kamala sakulra mwanainyamiwa, kakoye fiyeda siku nanekumi na nnayi na mwedi wenna. Siku neno, yafiya igudugudu, aIzarayeli atene kasige mabilale. 7Kamala pa anavinyama ale, anerege tukula sangiri na vang'ono, kazolihege kaxilu ya musuwo wa nyumba yenno anafuna atu djelaga mwana nibila nne, kazolihe wu na wu na vazulu. 8Mahiyu anne anerege tukula mwana nibila nne, kawotchege veko, amala kadjege nyamiwa na pawu dohosakanyiwana leverina vamohi na matakuru owawa.#12:8 matakuru owawa anawongiwa veva hiyo kannawanda aiziwa. Matakuru owawa ale kadjaga, yatapulela ira aIzarayeli kafwanyeya muwari mwa makatamiho ohokala a masika eto kohokana kumbanya. 9Nyamiwa kamudje ititene eto kamupiye na mahindje. So mbwenye muirege wotcha veko nyama yompumbulene roma muru, manyalo vamohi na ja mbani. 10Kamuhiye yengo ili yatene ihale fiyeda mmetcheloni muwa. Mbwenye johala jili jatene muirege tumeya. 11Mwadjaga nyamele, mudjege mwagawarile jowara ja ulrendo, xineli domangiha dene eto mwaganna ikumbuzo mmandani mwinyu. Mudjege mobaranya. Tchi Pwando ya Mavirelo ya Yehova. 12Tchoira umahiyu wenne, miyo nnafuna divire muIjipitu mwatene mwene ira daapemo arandji baliwa, masiki jifuwo nari atu. Muwari moirana eno, miyo nnoatonga amilugu atene a Ijipitu.#12:12 miyo nnoatonga amilugu atene a Ijipitu. Ku wonga Mulugu afuna aonihe ira amilugu atene a Ijipitu kinna mabasa. Miyo dili Yehova! 13Sangiri nnafuna nyo zoliha kaxilu nnoza nikale ionihedo vili nyo na nyumba munakala nyo. Daonave sangiri, nnerege uvirani eto ntembelrelro nnafuna miyo airela aIjipitu kannaufwanyani.
14<<Va kada yaka, siku neno nnerege kala siku noumbuwela eto munerege dja pwando siku neno yaka datene muwari moditamalela miyo Yehova. Nyo na atu atene anabaliwelegemo musogolro, musakanyege pwando yenno. Neni ti nlamulo nohomala para nyo. 15Muwari mwa malambo matanu na menli mudjege pawu dohosakanyiwana leverina. Siku noroma mukumihegemo leverina mmavande mwenyu, mwasiwa mutu wenne unadje yengo ili yatene yoheliwa leverina muwari mwa malambo matanu na menli ale, mutu wenno agwadiwemo muwari mwa mulogo wa Izarayeli.#12:15 mutu wenno agwadiwemo muwari mwa mulogo wa Izarayeli. Ku wonga mutule kaoneyave nnga muIzarayeli eto kakana pandi no mutamalela Mulugu nne velela mikuto ira aleveleliwe jotega jaye. 16Siku noroma#12:16 Tempu yenno para aliwa, siku naroma nzuwa nagavirile. Siku noroma ku wonga kagapile mabila, nzuwa nagavirile, dowa mmetcheloni muwa. vamohi na siku nanetanu na mbinli inafwanela nyo mwatene mukayena gumana wotchena woditamalela. Muwari mwa malambo menli anno kamusakanyege mabasa amohiwa ali matene. So mabasa anafuna nyo hindaga kakale osakanya jodja bahi. 17Muwari mwa eno, inafwanela musakanyege Pwando ya Pawu Dohosakanyiwana Leverina moumbuwela ira ti siku daukumihileni miyo malogo matene a Ana Izarayeli nnga mukalele atu mwilamboni mwa Ijipitu. Nona inafwanela nyo na ahiminyu atene anabaliwelegemo musogolro, musakanyege pwando siku neni. Neni ti nlamulo nohomala para nyo. 18Roma ora ya tchiguwo ya diya 14 wa mwedi oroma fiyeda ora ya tchiguwo ya diya 21, pawu munadjege nyo dikalege pawu dohosakanyiwana leverina. 19Muwari mwa malambo matanu na menli anna munadjege nyo pwando yenno, mmba mwinyu kamufwanyeyege leverina. Mutu wenne unadje yengo yoheliwa leverina, masiki akale mutu oza masiki akale namurala wa evo, mutu wenno agwadiwemo muwari mwa mulogo wa aIzarayeli. 20Mwa malambo anno kamudjege yengo yoheliwa leverina. Mmavande mwenyu mwatene mudjege pawu dohosakanyiwana leverina.>>
Mozeji ohawandela aIzarayeli zela Pwando ya Mavirelo
21Evale Mozeji ohaitanaga andimuwa a aIzarayeli, liye awandela ira: <<Va kada nivande, musakulre mwana nibila nimohi. Mwamala, mupe mwana nibila nne ira musakanye Pwando ya Mavirelo. 22Mukase nikupu na isopo, mubwinihe mbasiyani muli sangiri, muzolihena kaxilu ya musuwo, wu na wu na vazulu. Eto mwavolowa mmba, kakalevo mutu unafuna kumela unde fiyeda mmetcheloni muwa.
23<<Tchoira Yehova unafuna avire ira aape aIjipitu. Mwa eno, liye aviraga, aona sangiri munafuna nyo zoliha kaxilu ya musuwo, wu na wu na vazulu, Yehova unovira eto kanamuhiya namatolotcha waye ira avolowe mmba mwenyu ira aape ahiminyu arandji baliwa.
24<<Inafwanela musakanyege pwando yenna roma nyo vamohi na ahiminyu a musogolro ira nikale nlamulo nenyu nohomala. 25Nyo mwafiya ilambo yenno Yehova inafuna liye uvahani nnga mwapanganne liye, inafwanela musakanyege pwando yenna. 26Eto ahiminyu kaufukani kaira: <Jeji jinera nyo jinatapulela nni?>, 27nyo munerege wonga ira: <Gu mukuto oumbuwela mavirelo a Yehova. Tchoira nagali muIjipitu Yehova ovira, liye apaga aIjipitu. Mbwenye mavande a Ana Izarayeli liye ovira vazulu.> Evale atwale kagavwile mazu anne, kohooramiha kove diwa, aliwa mutamalela Mulugu.>>
28Evale Ana Izarayeli kohokwakwaneliheda jatene jene. Nnga Yehova mwamurumele liye Mozeji na Arawu, na ibaribari kohoirana.
Ntembelrelro nanekumi: Kwa wa arandji baliwa a Ijipitu
29Vari va mahiyu, Yehova ohozaga, liye roma apa arandji baliwa atene kafwanyeya muIjipitu. Roma mwana murandji wa Farawu wenno agarati vampandoni vaye va umwene, nari mwana murandji wa ule afwanyeya mukadeya nari anavinyama atene arandji baliwa. 30Farawu na anamalabaye na aIjipitu atene kagavennye na mahiyu, kagaafwannye arandji baliwa kohomala kwa, dohoromaga vweya kuto dilukulu. Tchoira kavali nyumba yahafwanyeyagana mutu okwa.
31Mahiyu amohive anne mwene Farawu ohomuitanihaga Mozeji na Arawu, liye ira: <<Venyani, mukumemo mwilamboni muno, roma nyo vamohi na Ana Izarayeli atene, mudowege mwamutamalele Yehova nnga mwemo mwawongele nyo. 32Eto mutukule mabila enyu na ng'ombe dinyu nnga mwemo mwawongele nyo, mudowege. Eto munvepe Mulugu wenyu ira adirelihe.>> 33Eto hiya mwene Farawu bahi, aIjipitu atene na aliwene kohovenya roma atamangihamo aIzarayeli mwilamboni mule mobaranya, keraga: <<Ana Izarayeli kakalave mwilamboni mu, hiyo nnomala kwamo.>>
34Fwanyeya ira Ana Izarayeli kakumaga ilambo ya Ijipitu, kohokanda tirigu ohogumanihiwa na leverina mmabasiyani mwakandetcha atu. Evale kohomangiha mabasiya ale na nguwo, aliwa kapatcha, wendagana. 35Eto Ana Izarayeli kahanakume mwilamboni mwali atu mule, kohavepa annya a ilambo yenne jengo josakanyiwa na parata na jimohi josakanyiwa na oru, vamohi na jowara nnga mwemo mwawongele mulombwana Mozeji. 36Yehova eto ohosakanya ira aIjipitu kaafwewele murima aIzarayeli, fiyeda aIjipitu aliwa avahaga aIzarayeli jengo jatene javepa atu. Mwa enne Ana Izarayeli kohowanda awaka aIjipitu jorayela jiwa jidjindji.
Kuma wa aIzarayeli ilambo ya Ijipitu
37Ana Izarayeli kakumaga Ijipitu, kohovenyihana na mendo sidadi ya Ramesesi, aliwa fiya tatamo ya Sukoti. Muwari mwa Ana Izarayeli, alombwana ve indjiva uwa kafwanyeya 600.000, hiya agumaniha na ahiyana vamohi na ahima. 38Eto fwanyeya ira kavenyagavo, kohokalawo atu amohiwa oindjiva kahali aIzarayeli kavolowile vamohi, kadowaga. Eto fwanyeya ira kadowaga, kohokana jifuwo jidjindji roma mabila na mbuzi vamohi na ng'ombe. 39Kagaimenle, kohotukula masa a tirigu kakandile atu kagali muIjipitu, aliwa wotcha pawu dohosakanyiwana leverina mwasiwa kahanavenyemo, tchanna tempu ira kasakanye pawu dokana leverina. Aliwa kakumilemo muIjipitu muwari motamangihiwa eto tchanna tempu yopiya jodja ira kadjege mundila. 40Mwilamboni mwa Ijipitu Ana Izarayeli kamanlemo yaka 430. 41Vakwakwana atu yaka 430 dedi, siku nenne malogo matene a Yehova nnga mwakalele atu, kohokumamo mwilamboni mwa Ijipitu. 42Mahiyu anne ba mahiyu oira atu katchezege muwari momuumbuwela Yehova, mwasiwa ali mahiyu aakumihilemo liye Ana Izarayeli ilambo ya Ijipitu. Nona mahiyu a siku neno ba mahiyu a Yehova. Ba mahiyu otcheza para aIzarayeli atene vamohi na anamabaliwelamo ewa atene a musogolro.
43Yehova ohowonga na Mozeji vamohi na Arawu eraga: <<Mangano anafuna miyo uvahani zela makalelo osakanya Pwando ya Mavirelo ba ala. Kakalevo mmarala unafuna dja Pwando ya Mavirelo. 44Akalavo muzari wenno uguliwe na kobiri, ira liye adje pwando yenna, arome ineliwa. 45Mbwenye atu oza nari anamalaba analaba mabasa a tempu ya vang'ono vande vawo, aliwa kidje Pwando ya Mavirelo. 46Mwana nibila neno munapa nyo ira mudje pwando, mudjege mmba mmohive. Kakalevo mutu unafuna kumelana unde. Kawotchaga eto kadjaga nibila nne, kitwe nne nikuva nimohi. 47Mulogo watene wa aIzarayeli inafwanela kasakanyege Pwando ya Mavirelo. 48Akalavo mutu oza unakala vamohi na nyo ofuna nnga adje Pwando ya Mavirelo muwari momutamalela Yehova, ababihege ineliwa liye vamohi na alombwana atene kali vande vaye. Amala ineliwa eno, liye podi dja pwando vamohi na nyo. Era eno mumbalre nnga namurala wa ilambwinyu. Mbwenye wenno ahaineliwe, pwando yenno kadje. 49Malamulo anna anauvahani miyo ba amohive zela nyo anamurala vamohi na atu oza anakala vamohi na nyo.>>
50Evale Ana Izarayeli atene kohoirana jatene nnga mwemo Yehova mwamurumele liye Mozeji na Arawu. 51Siku nenne Yehova ohavenyihamo Ana Izarayeli ilambo ya Ijipitu, kaharanaga malogo matene nnga mwakalele atu.
Currently Selected:
Ezodu 12: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
Ezodu 12
12
Roma wa Pwando ya Mavirelo
1Yehova ohowonga na Mozeji vamohi na Arawu mwilamboni mwa Ijipitu. 2Liye kwi: <<Mwedi wenna unokala mwedi wenyu oroma muwari mwa medi datene. Va kada yaka, mwedi wenna gu mwedi oroma.#12:2 mwedi oroma: Medi da aIzarayeli wanle kadalingana na medi dehu da tchineneva. Mwedi wewa oroma, aroma magomelo wa Marsu eto yaka dimohi diwa akala maromelo wa Abirili. 3Mwaawandele mulogo watene wa aIzarayeli mangano anafuna miyo avaha ala. Kakwakwanaga malambo kumi a mwedi wenna, kada mundimuwa wa vande asakulrege mwana nibila owu mwana mbuzi. Va kada vande, kasakulrege mwanainyama imohi. 4Mwinnya wa vande aona ira: <Vande vihu va, nihiyevavo, mwana nibila siku nimohive kannamala dja>, adowe, avwanane na vande visimbwile wandamana, mavande menli ale kakayena nibila nimohive nenne ira kawande dja mwana nibila natene siku nimohive. 5Kasakulre nibila nari mbuzi, malringana ikale ya mulombwana, yapama, yohorangala, ya yaka imohi. 6Kamala sakulra mwanainyamiwa, kakoye fiyeda siku nanekumi na nnayi na mwedi wenna. Siku neno, yafiya igudugudu, aIzarayeli atene kasige mabilale. 7Kamala pa anavinyama ale, anerege tukula sangiri na vang'ono, kazolihege kaxilu ya musuwo wa nyumba yenno anafuna atu djelaga mwana nibila nne, kazolihe wu na wu na vazulu. 8Mahiyu anne anerege tukula mwana nibila nne, kawotchege veko, amala kadjege nyamiwa na pawu dohosakanyiwana leverina vamohi na matakuru owawa.#12:8 matakuru owawa anawongiwa veva hiyo kannawanda aiziwa. Matakuru owawa ale kadjaga, yatapulela ira aIzarayeli kafwanyeya muwari mwa makatamiho ohokala a masika eto kohokana kumbanya. 9Nyamiwa kamudje ititene eto kamupiye na mahindje. So mbwenye muirege wotcha veko nyama yompumbulene roma muru, manyalo vamohi na ja mbani. 10Kamuhiye yengo ili yatene ihale fiyeda mmetcheloni muwa. Mbwenye johala jili jatene muirege tumeya. 11Mwadjaga nyamele, mudjege mwagawarile jowara ja ulrendo, xineli domangiha dene eto mwaganna ikumbuzo mmandani mwinyu. Mudjege mobaranya. Tchi Pwando ya Mavirelo ya Yehova. 12Tchoira umahiyu wenne, miyo nnafuna divire muIjipitu mwatene mwene ira daapemo arandji baliwa, masiki jifuwo nari atu. Muwari moirana eno, miyo nnoatonga amilugu atene a Ijipitu.#12:12 miyo nnoatonga amilugu atene a Ijipitu. Ku wonga Mulugu afuna aonihe ira amilugu atene a Ijipitu kinna mabasa. Miyo dili Yehova! 13Sangiri nnafuna nyo zoliha kaxilu nnoza nikale ionihedo vili nyo na nyumba munakala nyo. Daonave sangiri, nnerege uvirani eto ntembelrelro nnafuna miyo airela aIjipitu kannaufwanyani.
14<<Va kada yaka, siku neno nnerege kala siku noumbuwela eto munerege dja pwando siku neno yaka datene muwari moditamalela miyo Yehova. Nyo na atu atene anabaliwelegemo musogolro, musakanyege pwando yenno. Neni ti nlamulo nohomala para nyo. 15Muwari mwa malambo matanu na menli mudjege pawu dohosakanyiwana leverina. Siku noroma mukumihegemo leverina mmavande mwenyu, mwasiwa mutu wenne unadje yengo ili yatene yoheliwa leverina muwari mwa malambo matanu na menli ale, mutu wenno agwadiwemo muwari mwa mulogo wa Izarayeli.#12:15 mutu wenno agwadiwemo muwari mwa mulogo wa Izarayeli. Ku wonga mutule kaoneyave nnga muIzarayeli eto kakana pandi no mutamalela Mulugu nne velela mikuto ira aleveleliwe jotega jaye. 16Siku noroma#12:16 Tempu yenno para aliwa, siku naroma nzuwa nagavirile. Siku noroma ku wonga kagapile mabila, nzuwa nagavirile, dowa mmetcheloni muwa. vamohi na siku nanetanu na mbinli inafwanela nyo mwatene mukayena gumana wotchena woditamalela. Muwari mwa malambo menli anno kamusakanyege mabasa amohiwa ali matene. So mabasa anafuna nyo hindaga kakale osakanya jodja bahi. 17Muwari mwa eno, inafwanela musakanyege Pwando ya Pawu Dohosakanyiwana Leverina moumbuwela ira ti siku daukumihileni miyo malogo matene a Ana Izarayeli nnga mukalele atu mwilamboni mwa Ijipitu. Nona inafwanela nyo na ahiminyu atene anabaliwelegemo musogolro, musakanyege pwando siku neni. Neni ti nlamulo nohomala para nyo. 18Roma ora ya tchiguwo ya diya 14 wa mwedi oroma fiyeda ora ya tchiguwo ya diya 21, pawu munadjege nyo dikalege pawu dohosakanyiwana leverina. 19Muwari mwa malambo matanu na menli anna munadjege nyo pwando yenno, mmba mwinyu kamufwanyeyege leverina. Mutu wenne unadje yengo yoheliwa leverina, masiki akale mutu oza masiki akale namurala wa evo, mutu wenno agwadiwemo muwari mwa mulogo wa aIzarayeli. 20Mwa malambo anno kamudjege yengo yoheliwa leverina. Mmavande mwenyu mwatene mudjege pawu dohosakanyiwana leverina.>>
Mozeji ohawandela aIzarayeli zela Pwando ya Mavirelo
21Evale Mozeji ohaitanaga andimuwa a aIzarayeli, liye awandela ira: <<Va kada nivande, musakulre mwana nibila nimohi. Mwamala, mupe mwana nibila nne ira musakanye Pwando ya Mavirelo. 22Mukase nikupu na isopo, mubwinihe mbasiyani muli sangiri, muzolihena kaxilu ya musuwo, wu na wu na vazulu. Eto mwavolowa mmba, kakalevo mutu unafuna kumela unde fiyeda mmetcheloni muwa.
23<<Tchoira Yehova unafuna avire ira aape aIjipitu. Mwa eno, liye aviraga, aona sangiri munafuna nyo zoliha kaxilu ya musuwo, wu na wu na vazulu, Yehova unovira eto kanamuhiya namatolotcha waye ira avolowe mmba mwenyu ira aape ahiminyu arandji baliwa.
24<<Inafwanela musakanyege pwando yenna roma nyo vamohi na ahiminyu a musogolro ira nikale nlamulo nenyu nohomala. 25Nyo mwafiya ilambo yenno Yehova inafuna liye uvahani nnga mwapanganne liye, inafwanela musakanyege pwando yenna. 26Eto ahiminyu kaufukani kaira: <Jeji jinera nyo jinatapulela nni?>, 27nyo munerege wonga ira: <Gu mukuto oumbuwela mavirelo a Yehova. Tchoira nagali muIjipitu Yehova ovira, liye apaga aIjipitu. Mbwenye mavande a Ana Izarayeli liye ovira vazulu.> Evale atwale kagavwile mazu anne, kohooramiha kove diwa, aliwa mutamalela Mulugu.>>
28Evale Ana Izarayeli kohokwakwaneliheda jatene jene. Nnga Yehova mwamurumele liye Mozeji na Arawu, na ibaribari kohoirana.
Ntembelrelro nanekumi: Kwa wa arandji baliwa a Ijipitu
29Vari va mahiyu, Yehova ohozaga, liye roma apa arandji baliwa atene kafwanyeya muIjipitu. Roma mwana murandji wa Farawu wenno agarati vampandoni vaye va umwene, nari mwana murandji wa ule afwanyeya mukadeya nari anavinyama atene arandji baliwa. 30Farawu na anamalabaye na aIjipitu atene kagavennye na mahiyu, kagaafwannye arandji baliwa kohomala kwa, dohoromaga vweya kuto dilukulu. Tchoira kavali nyumba yahafwanyeyagana mutu okwa.
31Mahiyu amohive anne mwene Farawu ohomuitanihaga Mozeji na Arawu, liye ira: <<Venyani, mukumemo mwilamboni muno, roma nyo vamohi na Ana Izarayeli atene, mudowege mwamutamalele Yehova nnga mwemo mwawongele nyo. 32Eto mutukule mabila enyu na ng'ombe dinyu nnga mwemo mwawongele nyo, mudowege. Eto munvepe Mulugu wenyu ira adirelihe.>> 33Eto hiya mwene Farawu bahi, aIjipitu atene na aliwene kohovenya roma atamangihamo aIzarayeli mwilamboni mule mobaranya, keraga: <<Ana Izarayeli kakalave mwilamboni mu, hiyo nnomala kwamo.>>
34Fwanyeya ira Ana Izarayeli kakumaga ilambo ya Ijipitu, kohokanda tirigu ohogumanihiwa na leverina mmabasiyani mwakandetcha atu. Evale kohomangiha mabasiya ale na nguwo, aliwa kapatcha, wendagana. 35Eto Ana Izarayeli kahanakume mwilamboni mwali atu mule, kohavepa annya a ilambo yenne jengo josakanyiwa na parata na jimohi josakanyiwa na oru, vamohi na jowara nnga mwemo mwawongele mulombwana Mozeji. 36Yehova eto ohosakanya ira aIjipitu kaafwewele murima aIzarayeli, fiyeda aIjipitu aliwa avahaga aIzarayeli jengo jatene javepa atu. Mwa enne Ana Izarayeli kohowanda awaka aIjipitu jorayela jiwa jidjindji.
Kuma wa aIzarayeli ilambo ya Ijipitu
37Ana Izarayeli kakumaga Ijipitu, kohovenyihana na mendo sidadi ya Ramesesi, aliwa fiya tatamo ya Sukoti. Muwari mwa Ana Izarayeli, alombwana ve indjiva uwa kafwanyeya 600.000, hiya agumaniha na ahiyana vamohi na ahima. 38Eto fwanyeya ira kavenyagavo, kohokalawo atu amohiwa oindjiva kahali aIzarayeli kavolowile vamohi, kadowaga. Eto fwanyeya ira kadowaga, kohokana jifuwo jidjindji roma mabila na mbuzi vamohi na ng'ombe. 39Kagaimenle, kohotukula masa a tirigu kakandile atu kagali muIjipitu, aliwa wotcha pawu dohosakanyiwana leverina mwasiwa kahanavenyemo, tchanna tempu ira kasakanye pawu dokana leverina. Aliwa kakumilemo muIjipitu muwari motamangihiwa eto tchanna tempu yopiya jodja ira kadjege mundila. 40Mwilamboni mwa Ijipitu Ana Izarayeli kamanlemo yaka 430. 41Vakwakwana atu yaka 430 dedi, siku nenne malogo matene a Yehova nnga mwakalele atu, kohokumamo mwilamboni mwa Ijipitu. 42Mahiyu anne ba mahiyu oira atu katchezege muwari momuumbuwela Yehova, mwasiwa ali mahiyu aakumihilemo liye Ana Izarayeli ilambo ya Ijipitu. Nona mahiyu a siku neno ba mahiyu a Yehova. Ba mahiyu otcheza para aIzarayeli atene vamohi na anamabaliwelamo ewa atene a musogolro.
43Yehova ohowonga na Mozeji vamohi na Arawu eraga: <<Mangano anafuna miyo uvahani zela makalelo osakanya Pwando ya Mavirelo ba ala. Kakalevo mmarala unafuna dja Pwando ya Mavirelo. 44Akalavo muzari wenno uguliwe na kobiri, ira liye adje pwando yenna, arome ineliwa. 45Mbwenye atu oza nari anamalaba analaba mabasa a tempu ya vang'ono vande vawo, aliwa kidje Pwando ya Mavirelo. 46Mwana nibila neno munapa nyo ira mudje pwando, mudjege mmba mmohive. Kakalevo mutu unafuna kumelana unde. Kawotchaga eto kadjaga nibila nne, kitwe nne nikuva nimohi. 47Mulogo watene wa aIzarayeli inafwanela kasakanyege Pwando ya Mavirelo. 48Akalavo mutu oza unakala vamohi na nyo ofuna nnga adje Pwando ya Mavirelo muwari momutamalela Yehova, ababihege ineliwa liye vamohi na alombwana atene kali vande vaye. Amala ineliwa eno, liye podi dja pwando vamohi na nyo. Era eno mumbalre nnga namurala wa ilambwinyu. Mbwenye wenno ahaineliwe, pwando yenno kadje. 49Malamulo anna anauvahani miyo ba amohive zela nyo anamurala vamohi na atu oza anakala vamohi na nyo.>>
50Evale Ana Izarayeli atene kohoirana jatene nnga mwemo Yehova mwamurumele liye Mozeji na Arawu. 51Siku nenne Yehova ohavenyihamo Ana Izarayeli ilambo ya Ijipitu, kaharanaga malogo matene nnga mwakalele atu.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral